Kọ Who Bi Ru Odibọgba Ra Gba Ziezi?
1 Evaọ obe Iruẹru, a ta k’omai nọ ilele Jesu a ru odibọgba rai gba ẹkwoma ‘isẹri-ise ziezi’ kẹ ahwo na. (Iruẹru 2:40; 8:25; 28:23) Oye o ghinẹ jọ ute Pọl ukọ na. (Iruẹru 20:24) Kọ o gbẹ rọnọ oyena họ ute ra wọhọ ọgbodibo emamọ usi na? Ẹvẹ whọ sai ro ru onana gba?
2 Ruẹrẹ Eme Ra Họ: Re u mu owhẹ ẹro nọ who se emamọ isẹri evaọ odibọgba na, omaruẹrẹhọ u wuzou. Onana o mae rọ uzẹme evaọ okenọ who te bi fi emagazini họ ada, nọ o rọnọ izoẹme rai i re nwene ẹsikpobi na. Re u fiobọhọ thomai kpahe viere, ukere Odibọgba Uvie Mai onana u bi mu ọruẹrẹfihotọ jọ họ—uzoẹme nọ o rọ abọ ẹkpẹlobọ na, onọ o kẹ eme iriruo nọ a sai ro fi emagazini Uwou-Eroro gbe Awake! na họ ada. A te t’ẹme kpahe uzoẹme ẹruoke jọ nọ u ti si ahwo buobu urru evaọ ukere ovuovo. Ẹvẹ whọ sai ro ru eme ekpẹkpẹe enana kẹre?
3 Salọ ojọ nọ who roro nọ o te mai w’iruo evaọ ẹkwotọ ra. Romatotọ se uzoẹme nọ a t’ẹme kpahe na, je muẹrohọ igogo eme nọ e rẹ sae kpare isiuru. Gwọlọ ikereakere jọ nọ a fodẹ evaọ emagazini na nọ u w’obọ kpahe ẹmeọta na nọ whọ rẹ sai se kẹ ọnọ o wo uwou na. Fi eme ekuhọ jọ bae rọ tuduhọ ọnọ ọ be gaviezọ k’owhẹ na awọ re o se emagazini na, yọ u te fo, ẹme ọkpẹkpẹe jọ inọ ọnọ o wo uwou na ọ sai ru azọhọ unevaze kẹ iruo akpọ-soso erọ Isẹri Jihova. Who te ru ere no, who ve wuhrẹ eme nọ whọ te ta na.
4 M’Omaa re Whọ Rehọ Ebaibol na Ruiruo: Avọ emamọ omaa-oma, whọ rẹ sai fi ikereakere jọ ba ẹme ra. Wọhọ oriruo, iwhowho-uvie nọ i wo ona evaọ eria buobu a bi wo obokparọ ẹkwoma ẹnya kpohọ ethẹ ahwo avọ Ebaibol nọ a kru, a ve yere ọnọ o wo uwou na, jẹ ta nọ:
◼ “Ma be nọ ahwo sọ a rọwo kugbe onana . . . ” Se Emuhọ 1:1, jẹ nọ inọ: “Kọ whọ rọwo ẹme ọyena?” Otẹrọnọ ohwo na ọ rọwo, whọ vẹ ta nọ: “Mẹ rọwo e riẹ re. Dede na, kọ who roro nọ otẹrọnọ Ọghẹnẹ ọ ma eware kpobi, ọye ọ be wha emuemu ze re?” Who te yere ohwo na kẹ uyo riẹ no, se Ọtausiuwoma Na 7:29. Rovie obe Eriariẹ na kpohọ ẹwẹ-obe avọ 71, je se edhe-ẹme avọ 2. Tuduhọ ohwo na awọ re o se obe na.
5 Nya Lele Isiuru Kpobi: Whọ gbẹ nya lele isiuru nọ who duku hu whọ rẹ sai ru odibọgba ra gba vọvọ họ. Who te lele ohwo jọ t’ẹme ziezi, o tẹ make rọnọ who fi emagazini hayo obe họ ada ha, kere odẹ gbe adrẹse ohwo na fihotọ. Daoma gaga re whọ bọ isiuru ohwo na ẹkwoma ezihe ababọ oke oraha. Evaọ edhere kpobi, t’ẹme kpahe uwuhrẹ Ebaibol kẹ ohwo na.
6 Ilele ikpe-udhusoi ọsosuọ na a riẹ nọ Jesu o vi rai re a ‘se isẹri ziezi.’ (Iruẹru 10:42) Ujaje ovona u kie kpahe omai re, keme oye ọvo họ edhere nọ ma sai ro ru ilele. (Mat. 28:19, 20) J’oma daoma mai kpobi re ma ru odibọgba mai gba ziezi.—2 Tim. 4:5.