Kọ Who bi Se Emagazini Na?
1 Enẹ ọzae avọ aye jọ nọ a rọ imishọnare evaọ Africa a ta kpahe emagazini mai: “Uwou-Eroro Na u re fiobọhọ k’omai jaja aro vi evaọ abọ-ẹzi evaọ ẹkwotọ mai. Ma re wo uduotahawọ gbe ẹgba no uvitha kpobi ze.” Kọ who wo ovuhumuo odidi ọvona kẹ emagazini mai? Kọ o r’owhẹ oja re who se ai tere?
2 O rẹ rehọ oke buobu re a kere izoẹme emagazini nọ a rẹ sai se evaọ umutho iminiti gheghe. Nọ o rọ ere na, kọ whọ rẹ rọ ẹro dhẹ izoẹme na duwu, riwi ifoto na, hayo ẹmẹsejọ who ve se izoẹme nọ i si owhẹ urru ọvo? O rẹ jọ areghẹ k’omai nọ ma te ru vi oyena. U fo re ma raha oke se jẹ kiẹ izoẹme kpobi nọ e rọ uvitha ọ emagazini mai na. Uwou-Eroro Na yọ ugogo emagazini mai nọ ma je wo emu abọ-ẹzi ẹruoke. Awake! ọ rẹ wha izoẹme nọ i re siuru gbe eme ikokodo kpahe eware sasa. Eware nọ ma re wuhrẹ ẹkwoma isase emagazini enana ze orọnikọ e rẹ b’omai ga evaọ abọ-ẹzi ọvo ho rekọ e rẹ ruẹrẹ omai kpahe kẹ abọ nọ ma re wo ziezi evaọ odibọgba na. Nọ ma tẹ rrọ isisase oke-kpobi, ma re wo ajọwha evaọ emagazini na nọ ma rẹ rọ kẹ amọfa.
3 Epanọ A re ro Wo Ẹnyaharo Evaọ Uruemu Isase: Kọ whọ sae daoma viere evaọ ẹnya lele ọ isase emagazini ra? Ẹjiroro ivẹ jọ nọ i bi ruiruo kẹ ahwo buobu ena. (1) Fi omaa isase ọ ikẹse kẹse họ. Ẹkwoma iminiti 10 hayo 15 ọvo nọ whọ rẹ ruẹrẹ fihọ ro se kẹdẹ kẹdẹ, u ti gb’owhẹ unu kpahe epanọ whọ rẹ sai se bu te evaọ k’oka k’oka. (2) Wo edhere nọ whọ rẹ rọ kareghẹhọ eria nọ who se no. Ẹsejọhọ whọ sai kpoka họ emuhọ uzoẹme kpobi nọ who se no. Ababọ onana, whọ rẹ sai vo ese izoẹme jọ hayo tubọ emagazini jọ soso. O r’oja re whọ m’omaa isase nọ u re kiehọ kẹ owhẹ whọ vẹ jẹ nya lele ei.—Wawo Ahwo Filipai 3:16.
4 Avọ areghẹ, ‘ọrigbo ẹrọwọ avọ areghẹ’ na ọ j’owọ lele etoke nọ o bi nwene no ẹkwoma ekporo izoẹme nọ e be ta kpahe uzedhe ẹgwọlọ ahwo dẹẹ. (Mat. 24:45) Uzẹme, emagazini na i duobọ te izuazọ mai no. Evaọ abọ ologbo, ẹnyharo abọ-ẹzi mai o roma hwa epanọ ma bi se ebe ukoko na te. Efe ọ eghale abọ-ẹzi ọ be hẹrẹ enọ e ruẹrẹ oke họ re a se emagazini na kpobi.