“Ọnowo họ Ọthuke Mẹ”
1 Okenọ Jesu o vi ilele ọsosuọ riẹ uwou, ọ ta kẹ ae nọ: “Ri, me vi owhai wọhọ igodẹ udevie erao-imuomu.” (Mat. 10:16) Kọ oyena o lẹliẹ ozọ mu ai je sioma kpemu? Ijo. A dhesẹ uruemu nọ Pọl ukọ na o dhesẹ uwhremu na nọ ọ ta kẹ ibe Ileleikristi riẹ nọ: “Gbaudu tanọ, ‘Ọnowo họ ọthuke mẹ, ozọ o gbẹ sai mu omẹ hẹ; eme ohwo ọ sai ru omẹ?’ ” (Hib. 13:6) A ghọghọ fikinọ a rri rai vo fiki odẹ Jesu, yọ a ruabọhọ ewuhrẹ gbe ewhowho emamọ usi na.—Iruẹru 5:41, 42.
2 Nẹnẹ na iruo usiuwoma ota akpọ-soso na o rọ abọ urere riẹ. Wọhọ epanọ Jesu ọ ruẹaro riẹ, ma zihe ruọ ekwakwa omukpahe kẹ erẹwho na no. (Mat. 24:9) A wọso iruo usiuwoma ota mai jẹ rehọ iẹ se ẹkoko no, yọ evaọ abọjọ akpọ na, a tubẹ whaha iẹ no. Otẹrọnọ ma kare ẹrọwọ, ozọ o sai mu omai. Dede na, nọ ma tẹ riẹ nọ Jihova họ Ọthuke mai o rẹ sasa omai oma jẹ k’omai ẹgba thihakọ.
3 Aruọwha họ okwakwa nọ a rẹ rọ jọ gaga, w’udu, wharo. Oyehọ abọdekọ ozodhẹ, enuhu. Ilele Jesu e gwọlọ aruọwha ẹsikpobi re a thihakọ. O r’oja otẹrọnọ ma gwọlọ nọ iruemu gbe owojẹ akpọ nọ ọ rọ egrẹ kugbe Ọghẹnẹ na o lẹliẹ udu n’omai awọ họ. Ẹvẹ o rọ uduotahawọ te k’omai re ma roro kpahe oriruo okpehru Jesu, ọnọ o fi akpọ kparobọ! (Jọn 16:33) Ofariẹ, kareghẹhọ ikọ nọ e rọ udu whowho evaọ otọ edawọ egaga nnọ: “Ma re yo ẹme Ọghẹnẹ vi ọ rọ ahwo.”—Iruẹru 5:29.
4 Ma rọ Ahwo nọ I re Siuke Kpemu Hu: Ma rẹ ya re ma yọrọ uruemu oliọliọ kpahe iruo mai. (Hib. 10:39) Woi fihọ iroro ẹsikpobi inọ Jihova họ ọnọ o vi omai wọhọ odhesẹvia uyoyou gbe ohrọ riẹ kẹ ahwo-akpọ kpobi. Ọ rẹ yare mi idibo riẹ re a ru oware nọ o kare ẹjiroro vievie he. Oware kpobi nọ a k’omai nọ ma ru o rẹ ghinẹ wha ewoma se ahwo nọ a you Ọghẹnẹ.—Rom 8:28.
5 Eriwo ọliọliọ o re fiobọhọ k’omai re ma gbẹ hae gwọlọ enọ e wọhọ igodẹ evaọ ẹkwotọ mai. Ma rẹ sai rri ababọ osegboja ahwo na wọhọ odhesẹvia idhọvẹ gbe ababọ-ẹruore rai. Jọ uyoyou mai o w’omai re ma wo ororokẹ gbe odiri. Oke kpobi nọ ma fi obe họ ada hayo muẹro họ ogẹgẹ isiuru jọ, ute mai o rẹ jọ re ma ru ozihebro ababọ okioraha re ma kpare isiuru na viere. U fo re ma vro ẹgba mai hi onọ ma re ro muọ ewuhrẹ Ebaibol họ hayo ọriẹ-wuhrẹ riẹ. Ukpoye, ma rẹ gwọlọ uketha gbe ọkpọvio Jihova ẹsikpobi avọ oma olẹ, fi udu họ nọ o ti fiobọhọ k’omai.
6 Ma rọwo gaga inọ Jihova ọ te rẹro te iruo na rite ekuhọ riẹ. (Wawo Ahwo Filipai 1:6.) Eva nọ ma re fihọ iẹe riẹriẹriẹ wọhọ Ọthuke mai o rẹ bọ omai ga, re ‘oma oware uwoma uruo o se omai ba ẹrọ.’—Gal. 6:9.