Ekobaro A re Fiobọhọ k’Amọfa

¹ Jesu ọ ta nọ: “Ivuẹvu na i ghine bu, rekọ iruiruo e rẹ kakao; fikiere wha lẹ Olori ivuẹvu na re o vi iruiruo kpo obọ ivuẹvu riẹ.” Nọ ivuivuẹvu ikpe-udhusoi ọsosuọ na e jọ kakao na yọ a wo ẹkwotọ ologbo nọ a re ru na, Jesu ọ hẹ sae ta kẹ ae nọ a rehọ emamọ usi na nyate ahwo buobu oma ẹkwoma omomọvo nọ ọ hae vi. Ukpoye, o “vi [rai] imimava.” (Luk 10:1, 2) Fikieme o je vi ai imimava?

² Ilele eyena a jọ ahwo ekpokpọ jẹ kare eriariẹ. Ẹkwoma iruo nọ a re ru kugbe a rẹ sai wuhrẹ mi ohwohwo jẹ tudu họ ohwohwo awọ. Wọhọ epanọ Solomọn o fi rie họ, “imava i woma vi omọvo.” (Ọtausi. 4:9, 10) Makọ okenọ a ku ẹzi ọfuafo ku ai no dede eva Pẹntikọst ọrọ 33 C.E., Pọl, Banabas, gbe amọfa a lele ibe enọ e rọwo evaọ odibọgba na. (Iruẹru 15:35) Didi uvẹ o rẹ sae jọ re uvi ezae itieye na a wuhrẹ ahwo jọ!

³ Obọdẹ Ọruẹrẹfihotọ Ewuhrẹ: Wọhọ ọkpọ ikpe-udhusoi ọsosuọ riẹ, ukoko Ileleikristi ọgbọna yọ ukoko usiuwoma ota. U bi je wuhrẹ omai re. Wọhọ omomọvo, u fo re ẹgwọlọ udu mai o jọ onọ ma jẹ vuẹ emamọ usi na ziezi. Re iwhowho-uvie buobu e sae nyaharo evaọ ọriẹta ẹme rai, uketha o riẹ.

⁴ Eva Isukulu Odibọgba Uvie nọ a ru kẹle na, Society o whowho ọruẹrẹfihotọ jọ re ekobaro i fiobọhọ k’amọfa evaọ usiuwoma ota. Kọ ẹgwọlọ jọ ọ rọ kẹ onana? Ẹhẹ, ẹgwọlọ ọ rọ. Iwhowho-uvie nọ e họ-ame evaọ ikpe esa nọ i kpemu na a bu vi ima ọvo no, yọ ibuobu ahwo nana a gwọlọ ewuhrẹ re a riẹ iruo usiuwoma ota na ru viere. Kọ amono a sae rọ kẹ obufihọ oyena?

⁵ Ekobaro oke-kpobi a rẹ sai fiobọhọ. Ukoko Jihova o kẹ rai ithubro gbe ewuhrẹ buobu no. A kẹ ekobaro ithubro nọ a ruẹrẹhọ lele ẹgwọlọ rai evaọ Isukulu Iruo Ekobaro ọrọ eka ivẹ na. A bi je wo erere no ẹgwae kugbe esẹro okogho gbe ubrotọ ze, je no ọkpọvio ekpako na ze. Dede nọ orọnikọ ekobaro kpobi a wo ona wọhọ Pọl avọ Banabas he, a kẹ rae uwuhrẹ oghaghae no nọ a gwọlọ nọ a rẹ ghale kugbe amọfa.

⁶ Amono A ti Wo Erere? Kọ iwhowho-uvie ekpokpọ hayo ahwo nọ a họ-ame obọ ọvo họ enọ i ti w’obọ evaọ ọruẹrẹfihotọ ọnana? Vievie! Emaha gbe ekpako e riẹ nọ e riẹ uzẹme na ikpe buobu no rekọ o te were ae re a fiobọhọ kẹ ae evaọ abọjọ odibọgba na. Ejọ e be riẹ ru evaọ ebe ifihọ ada rekọ o rẹ jọ bẹbẹ kẹ ae re a ru izihebro hayo muọ iwuhrẹ Ebaibol họ. Amọfa a rẹ sai muọ iwuhrẹ Ebaibol họ lọlọhọ rekọ a ve muẹrohọ nọ emọ-iwuhrẹ rai e be nyaharo ho. Kọ eme o bi kru rai daji? A sae yare obufihọ ekobaro nọ i wo ona evaọ abọ nana. Ekobaro jọ a rẹ riẹ ru evaọ ẹkpare isiuru, emuhọ iwuhrẹ Ebaibol, gbe emọ-iwuhrẹ ekpokpọ nọ a rẹ kpọ ziọ ukoko na. Eriariẹ rai i ti fiobọhọ evaọ ọruẹrẹfihotọ ọkpokpọ nana.

⁷ Kọ whọ ruẹ nọ omaa ra o rẹ k’owhẹ uvẹ re whọ tha iwuhrẹ usiuwoma ota ukoko uke he, wọhọ epanọ whọ gwọlọ? Ọkobaro ọ rẹ sai lele owhẹ ruiruo ẹsejọ nọ iwhowho-uvie efa e gbẹ riẹ hẹ.

⁸ O Gwọlọ Emamọ Ọrọwokugbe: Isiava ẹgbukpe, ekpako na i ti ru ọruẹrẹfihọ kẹ iwhowho-uvie nọ e gwọlọ obufihọ re a w’obọ evaọ ọruẹrẹfihotọ ọrọ Ekobaro A re Fiobọhọ k’Amọfa na. Whọ tẹ gwọlọ nọ a k’owhẹ uketha utioye, nyakugbe ọkobaro nọ a ro mu nọ o fiobọhọ k’owhẹ na, ruẹrẹ emamọ omaa fihọ kẹ usiuwoma ota, jẹ nya lele ei. Nya lele omaa kpobi nọ wha fihọ. Nọ wha bi ruiruo kugbe na, muẹrohọ obọdẹ idhere nọ a rẹ rọ vuẹ emamọ usi na. Roro oware nọ oghẹrẹ idhere usiuwoma ota jọ i ro ruiruo. Roro kpahe iroro nọ ọkobaro na ọ te jẹ re who wo ẹnyaharo evaọ usiuwoma ota ra. Nọ who bi fi eware nọ who wuhrẹ họ iruo na, ẹnyaharo ra evaọ odibọgba na ọ te jọ vevẹ, rọkẹ owhẹ gbe amọfa. (Rri 1 Timoti 4:15.) Wha ruiruo kugbe kpere kpere, bi w’obọ evaọ abọ odibọgba na kpobi, kugbe isẹri-ise ọnyakuo rekọ whọ vẹ hae t’ova vi abọ nọ whọ jọ gwọlọ uketha.

⁹ Ọsẹro iruo usiuwoma ota na o wo isiuru kpahe ẹnyaharo nọ ọ te roma via. N’oke ruoke, ọ te hae nọ mi owuhrẹ ọ Uwuhrẹ Obe Ukoko na re ọ riẹ epanọ who bi wo erere no ọruẹrẹfihotọ ọnana ze. Ọsẹro okogho na o ti je fiobọhọ k’owhẹ evaọ okenọ o te weze ziọ ukoko na.

¹⁰ Jihova ọ gwọlọ nọ a wuhrẹ ahwo riẹ “jẹ thomavẹre kẹ iruo iwoma i ruo kpobi.” (2 Tim. 3:17) Rri ọruẹrẹfihotọ ọrọ Ekobaro A re Fiobọhọ k’Amọfa na wọhọ ọruẹrẹfihotọ obọdẹ nọ a re ro fiobọhọ kẹ ahwo nyaharo evaọ ẹgba rai nọ a rẹ rọ vuẹ ẹme na. Otẹrọnọ uvẹ na u t’owhẹ obọ re whọ jariẹ w’obọ, ru ere avọ uyere okẹ, omarokpotọ, gbe oghọghọ.