Eghale ọ Iruo Ọkobaro

¹ Oniọvo ọmọzae jọ nọ ọ rrọ ọkobaro ọ ta nọ: “Mẹ riẹ nọ uvumọ iruo efa e hẹ sae k’omẹ evevọwẹ nọ me wo no na ha evaọ ẹghale uzẹme na kugbe amọfa.” Ọfa jọ ọ ta nọ: “Evaọ owọwọ okpẹdẹ kpobi, mẹ rẹ wezẹ tou, udu mẹ o vẹ jẹ vọ avọ oghọghọ.” Ekobaro nana e ta iroro inievo emezae gbe erọ emetẹ buobu nọ e reawere eghale odibọgba ọkobaro na no.—Itẹ 10:22.

² Obọ nọ a re fihọ kẹ amọfa re a wo eriariẹ Ẹme Ọghẹnẹ nọ i re siwi uzuazọ o rẹ wha obọdẹ evevọwẹ ze. (Iruẹru 20:35; 1 Tẹs. 2:19, 20) Oniọvo jọ nọ o ru iruo ọkobaro kri no o kere nọ: “O rẹ sasa oma jẹ bọ ẹrọwọ ga re a ruẹ epanọ Ẹme Ọghẹnẹ o wo ẹgba te evaọ oghẹrẹ nọ o rẹ rọ wọ ahwo ru inwene evaọ izuazọ rai re a ruẹsi ru eva were Jihova.” Ẹhẹ, ẹkwoma unevaze nọ a re ro fi obọ họ kẹ ahwo je ru iwuhrẹ Ebaibol, ekobaro e rẹ reawere ọ eghale itiena.

³ Ẹro-Ọrọso Jihova: Ẹro nọ a rẹ rọ so ẹzi Ọghẹnẹ kẹdẹ kẹdẹ nọ a be wha odibọgba rai haro na u re fi obọ họ kẹ ekobaro bọ “ubi Ẹzi” na, o tẹ jẹ rrọ uketha kẹ ae. (Gal. 5:16, 22, 23) Ofariẹ re, nọ a be rọ Ẹme Ọghẹnẹ ruiruo ẹsikpobi na, ekobaro i wo ona nọ a rẹ rọ rehọ Ikereakere na thọ uzẹme na jẹ bọ amọfa ga. (2 Tim. 2:15) Oniọvo ọmọzae jọ nọ o ruiruo ọkobaro evaọ ikpe buobu no ọ ta nnọ: “Iruo ọkobaro i fi obọ họ kẹ omẹ wo eriariẹ ididi Ebaibol na no, yọ mẹ rehọ eriariẹ na fi obọ họ kẹ ahwo buobu no re a riẹ kpahe Jihova gbe ẹjiroro riẹ.” Erere riẹ ọ rro kẹhẹ!

⁴ Ekobaro oke-kpobi a rẹ jẹ rehọ ẹro so Jihova evaọ idhere efa buobu. O rẹ bọ ẹrọwọ rai ga nọ a tẹ ruẹ epanọ Jihova ọ be ghale omodawọ rai evaọ ẹya kẹ ẹgwọlọ abọ-iwo rai. Ọkobaro oke-kpobi jọ nọ ọ kpako te ikpe 72 no, yọ o ruiruo ọkobaro te ikpe 55 no ọ ta nnọ: “Jihova ọ re se omẹ ba ha.” Ofariẹ, ẹkwoma uzuazọ rai nọ a bi ru lọhọ, ekobaro e be thọ oma rai no awa-ọruọ uzuazọ buobu. Kọ onana u si owhẹ urru?—Mat. 6:22; Hib. 13:5, 6.

⁵ Esikẹle Ọghẹnẹ: Usu mai kugbe Jihova yọ oware nọ o ghare gaga. (Ol. 63:3) Nọ ma te bi w’obọ vọvọ evaọ odibọgba na fiki uyoyou nọ ma wo kẹ Jihova, usu mai na o rẹ ga viere. (Jem. 4:8) Ọniọvo jọ nọ o ruiruo ọkobaro vrẹ ikpe 18 no ọ ta nọ: “Iruo ọkobaro na e rẹ lẹliẹ omai ‘jawo jẹ ruẹ nọ Jihova o re ziezi,’ o rẹ lẹliẹ omai bọ usu okpekpe kugbe Ọnọma mai kẹdẹ kẹdẹ.”—Ol. 34:8.

⁶ U te no uyero rai nọ o rẹ kuvẹ kẹ iruo na no, o gbahọ nọ ekobaro i re wo ẹrọwọ ọgaga, uvi uyoyou kẹ Ọghẹnẹ gbe ọrivẹ, gbe unevaze re ạ fialoma via kẹ iruo. (Mat. 16:24; 17:20; 22:37-39) Dede na, wọhọ epanọ ovao osasa ọ ekobaro evaọ oria kpobi u dhesẹ, eghale odibọgba ọkobaro e rro w’umuo ho. (Mal. 3:10) Orọnikọ ekobaro na ọvo eghale nana e rrọ kẹ hẹ, rekọ iviuwou rai gbe ukoko na i re wo erere no emamọ ẹzi nọ ekobaro na i bi dhesẹ ze.—Fil. 4:23.

[Study Questions]

1, 2. Irere vẹ e rrọ iruo ọkobaro, kọ fikieme?

3, 4. Ẹvẹ iruo ọkobaro i re ro wuhrẹ ohwo epanọ a rẹ rọ rehọ ẹro so Jihova, kọ ẹvẹ onana u re ro fi obọ họ kẹ ohwo rro haro evaọ abọ-ẹzi?

5. Ẹvẹ iruo ọkobaro i re ro fi obọ họ kẹ ohwo si kẹle Jihova?

6. Eme o gbahọ nọ ekobaro i re wo, kọ u te no ekobaro na no amono ọfa a re wo erere?