Enẹna Họ Oke nọ Ma rẹ rọ Ta Usiuwoma!
1 “Dhozọ Ọghẹnẹ jẹ rehọ oruaro kẹ e.” Evaọ otọ ekpakpọ injẹle, a bi whowho ovuẹ nana “rọkẹ erẹwho gbe erua gbe evẹrẹ gbe ahwo kpobi.” Fikieme? ‘Keme oke oziẹobro Ọghẹnẹ u te no.’ Ma be rria evaọ ‘etoke oziẹobro’ ọyena enẹna, onọ u ti kuhọ evaọ ọraha eyero akpọ nana. U wuzou gaga enẹna re ahwo ‘a gọ Ọnọ ọ ma odhiwu gbe akpọ gbe abade, gbe iyeri ame na.’ Iruo efa nọ a bi ru enẹna nọ i wuzou hayo nọ e kpata te iruo ewhowho “usiuwoma ebẹdẹ bẹdẹ” na e rrọ họ. Ẹhẹ, enẹna họ oke nọ ma rẹ rọ ta usiuwoma na!—Evia. 14:6, 7.
2 Eva etoke ikpe ikpe nọ e vrẹ na, idibo Jihova a raha euwa nọ i bu te oware wọhọ ima-odu 12 evaọ iruo usiuwoma ota Uvie na gbe ilele-iruo na. Ibuobu a ru inwene evaọ uzuazọ rai no re a sai wo abọ vọvọ viere evaọ ivuẹvu abọ-ẹzi na. (Mat. 9:37, 38) Wọhọ oriruo, evaọ ukpe nọ o vrẹ na, a tẹ ghale iẹe ẹrẹrẹe, iwhowho-uvie nọ i bu vi 850,000 a ruiruo wọhọ ekobaro kamara kamara. Rọkẹ ekobaro oke-kpobi, onana o gwọlọ euwa 70 nọ a rẹ raha ro ru iruo usiuwoma ota na kamara kamara. Rọkẹ ekobaro obufihọ, ute rai họ euwa 50.
3 Oware nọ O Gwọlọ re A Sai Ru Iruo Ọkobaro: Fikinọ a vuhumu nọ ‘oke nọ u kiọkọ o re kpẹkpẹe’ ekobaro a be daoma ru uzuazọ rai lọlọhọ. (1 Kọr 7:29, 31) A rẹ gwọlọ edhere nọ a re ro bru araha rai kpotọ re a siọ oke buobu ba ẹraha ro ru iruo okọ ugho. Wọhọ oriruo, ahwo jọ a kwa no iwou ilogbo ruọ esese no. Efa a kpairoro vrẹ ekwakwa efe nọ e roja ha no. (Mat. 6:19-21) Yọ a re je bru ilale omobọ-ohwo kpẹre re. A bi ru enana kpobi re a ruẹsi wo oke gbe uvẹ buobu kẹ iruo odibọgba na. (Ẹf 5:15, 16) Avọ ithihakọ, ẹzi omaromudhe, gbe ẹrorọsuọ Jihova evaọ olẹ, iwhowho-uvie buobu a sae ruẹrẹ omaa nọ u w’iruo họ no nọ u bi fiobọhọ kẹ ai sai ru iruo ọkobaro.
4 Kọ whọ sai ru iruo ọkobaro? Kọ whọ gbẹ nọ mi enọ i ru iruo ọkobaro na kri no re a ta k’owhẹ oghẹrẹ nọ a bi ro ru ei? Lele ai kpohọ usiuwoma re whọ ruẹ oghọghọ nọ a be jariẹ wo. Hai se izoẹme nọ e ta kpahe iruo ọkobaro nọ e romavia evaọ ebe mai. Fi itee nọ i w’iruo họ kẹ oma ra nọ e rẹ sai ru owhẹ jowọ ruọ iruo ọkobaro. Otẹrọnọ who wo ebẹbẹ jọ nọ e be whaha owhẹ iruo ọkobaro, fodẹ ae evaọ olẹ kẹ Jihova, jẹ yare iẹe re o fiobọhọ k’owhẹ ku ae họ.—Itẹ 16:3
5 Eghale gbe Oghọghọ: Iruo ọkobaro o rẹ lẹliẹ ona mai nọ ma rẹ rọ rehọ Ebaibol na ru iruo woma viere, nọ o rẹ wha oghọghọ ulogbo ze. Oniọvo-ọmọtẹ ọkobaro ọmaha jọ ọ ta nọ: “Nọ whọ tẹ be sai dhesẹ uzẹme Ẹme Ọghẹnẹ gbagba kẹ amọfa o rẹ kẹ owhẹ evawere.” Ọ ta haro nọ: “Whọ tẹ rrọ ọkobaro, whọ rẹ rọ Ebaibol na ruiruo enwenọ oke kpobi. Nọ me bi no uwou ruọ uwou enẹna, mẹ sai roro kpahe ikere nọ i kiehọ ọnọ o wo uwou kpobi nọ me nyate.”—2 Tim. 2:15
6 Iruo ọkobaro i re je wuhrẹ ohwo obọdẹ ena buobu nọ i re fiobọhọ kẹe yeri uzuazọ. O sai fiobọhọ kẹ izoge wuhrẹ oghẹrẹ nọ a rẹ rọ ghale oke rai avọ areghẹ, oghẹrẹ nọ a rẹ rọ raha ugho owowa, gbe oghẹrẹ nọ a re yeri kugbe ahwo. Iruo ọkobaro o lẹliẹ ibuobu wo eriwo abọ-ẹzi viere no evaọ uzuazọ. (Ẹf. 4:13) Ofariẹ, ekobaro a wo obọdẹ uvẹ nọ a be rọ ruẹ obufihọ gbe eghale Jihova oke kpobi.—Iruẹru 11:21; Fil. 4:11-13.
7 Oghale ulogbo jọ nọ o sae jọ iruo ọkobaro te omai họ, u re fiobọhọ k’omai si kẹle Jihova. Onana o rẹ sae sẹro mai evaọ etoke edawọ. Oniọvo-ọmọtẹ jọ nọ o thihakọ odawọ ogaga jọ ọ ta nọ: “Usu okpekpe nọ me wo kugbe Jihova ẹkwoma iruo ọkobaro na u fiobọhọ k’omẹ thihakọ ẹbẹbẹ na toka.” O fibae nọ: “Eva e be were omẹ gaga fikinọ mẹ rehọ etoke udhu mẹ kpobi gọ Jihova vọvọ. Ufiobọhọ k’omẹ fialoma via evaọ idhere nọ me roro ho.” (Iruẹru 20:35) Ma te reawere eghale re nọ ma be dao ẹgba mai kpobi eva iruo usiuwoma ota nọ i wuzou gaga na.—Itẹ 10:22.
[Study Questions]
1. Fikieme enẹna o rọ rrọ oke nọ a rẹ rọ ta usiuwoma na?
2. Ẹvẹ idibo Jihova a bi ro dhesẹ nọ a vuhu oghẹrẹ nọ oke nọ ma be rria na o be dhẹ kpata te?
3. Didi inwene o gwọlọ nọ iwhowho-uvie a re ru re a sai ru iruo ọkobaro?
4. Owojẹ vẹ o rẹ sai fiobọhọ k’omai nyate ute iruo ọkobaro?
5. Oghẹrẹ vẹ iruo ọkobaro i re ro fiobọhọ k’omai wo ẹnyaharo evaọ ona mai evaọ odibọgba na?
6. Uwuhrẹ vẹ iruo ọkobaro o sae kẹ ohwo?
7. Ẹvẹ iruo ọkobaro i re ro fiobọhọ k’omai si kẹle Jihova?