Kọ Ẹthẹ Iruo Ọkobaro O Rovie Fihọ k’Owhẹ no Enẹna?
1 Uzoẹme ọ ẹgbukpe 1999 mai na o kareghẹhọ omai nnọ ma gbẹ rrọ evaọ “ẹdẹ usiwo” Jihova. (2 Kọr. 6:2) Rekọ ẹdẹ usiwo riẹ o ti kuhọ kẹle. ‘Ẹdẹ ẹdhoguo’ riẹ o ve muhọ. (2 Pita 2:9) Nọ Jihova o gbe bi ru uvẹ usiwo na kẹre te ahwo-akpọ na, ẹvẹ o rrọ oware isiuru te re a ruẹ unu ahwo nọ u bi dhe ebuebuo nọ i bi dede iei rehọ!
2 Ahwo Jihova a kpomamu no rọkẹ use-abọ nọ a rẹ rọ nyate enọ e rẹ kezọ oma taure oke o tẹ te vrẹ. Rọkẹ iwhowho Uvie buobu, onana o gwọlọ iruo ọkobaro nọ a rueva. Kọ ẹthẹ iruo ọkobaro na o rovie fihọ k’owhẹ no enẹna? Fikieme ma jẹ nọ ere?
3 Ovuhumuo nọ A Dhesẹ: Wọhọ epanọ a whowho evaọ Odibọgba Uvie Mai ọrọ January 1999, a sino ute euwa kẹ ekobaro oke-kpobi gbe erọ obufihọ na. Re a nyate ute okpokpọ na, o gwọlọ re ekobaro oke-kpobi a raha euwa 70 evaọ odibọgba na k’amara k’amara re a wo euwa 840 evaọ ukpe iruo ovo. Ekobaro obufihọ e te raha euwa 50 evaọ iruo na k’amara k’amara. Enana yọ umutho jọ evaọ eme ovuhumuo nọ i t’omai obọ fiki inwene enana:
“Onana yọ okẹ oghale nọ u n’obọ Ọsẹ obọ odhiwu mai ze!”
“A rẹ sae ruẹ eme ro dhesẹ iroro oghọghọ, uyoyou, gbe evawere rọkẹ ọruẹrẹfihotọ ọnana ha!”
“U ti ru ẹnyate omaa mai lọhọ gaga!”
“Olẹ mai họ re amọfa buobu a ruọ odibọgba oke-kpobi na jẹ reawere eghale nọ i re no iruo Jihova ze evaọ edhere ologbo.”
4 Nọ ma be kẹle ekuhọ ẹdẹ usiwo Ọghẹnẹ na, u muẹro inọ Jihova ọ gwọlọ re ahwo riẹ a bo ubo ujiro urere, onọ u re do gaga. Ẹrruọ gbe ẹga ọrọ ovuẹ onana u re viharo (1) ẹkwoma ẹvi evaọ unu iwhowho Uvie na gbe (2) ẹkwoma omomọvo nọ ọ rẹ gwọlọ re o ru ẹkẹ-abọ riẹ viharo evaọ ovuẹ Uvie na. Jihova, ọnọ ‘o re ru ei rro,’ ọ wha obokparọ ze evaọ idhere ivẹ na no ẹkwoma ẹghale ẹzi unevaze ahwo kpobi nọ a jẹ usiwo rehọ.—1 Kọr. 3:6, 7; Ol. 110:3.
5 Who Ku Ẹjiroro Riẹ Fiẹ Hẹ: Ẹdẹ usiwo Jihova họ onọ Pọl o wo h’iroro rọ tuduhọ ibe Ileleikristi awọ nọ: “Nọ omai avọ iẹ [Jihova] agbẹrọ ogba-iruo na, fikiere ma lẹ owhai re wha se aruoriwo Ọghẹnẹ ba e mi kufiẹ.” Ma ti ku ‘aruoriwo riẹ fiẹ’ hẹ otẹrọnọ ma ruẹ onana wọhọ “oke ẹrehọ” nọ a re ro ruiruo kẹ usiwo amọfa evaọ uvẹ kpobi. (2 Kọr. 6:1, 2) Nẹnẹ na, eme ọ Pọl i wo ẹkpata nọ ọ rro vi epaọ ọsosuọ. Ileleikristi nọ i bi dhesẹ uyoyou kẹ Jihova a rehọ e riẹ wọhọ uvẹ-ọghọ re a w’obọ evaọ odibọgba nọ a kẹ rai na vọvọ te epanọ o sae lọhọ te. Kọ enẹna whọ sai w’obọ vọvọ viere evaọ odibọgba na wọhọ ọkobaro oke-kpobi?
6 Ute na U w’Iroro: Evaọ Nigeria, o rrọ ute mai re ma ruẹ ekobaro oke-kpobi 25,000 nọ i re fiodẹ h’otọ evaọ September 1. Ma rọwo nnọ onana yọ ute nọ u w’iroro gbe onọ a rẹ sai le t’obọ. Fikieme ma je wo evaifihọ tere? Evaọ March 1997 ma ruẹ inievo-emezae gbe erọ emetẹ 19,218 nọ i ru ọkobaro obufihọ, yọ evaọ April 1998 kẹle 17,000 a ru ere. Ibuobu rai a n’iyẹrẹ euwa 60—10 ọvo i no ute okpokpọ kẹ ekobaro oke-kpobi na! O tẹ make rrọ nọ 4,000 ọvo evaọ ahwo nọ a ru ọkobaro obufihọ na a fiodẹ h’otọ wọhọ ekobaro oke-kpobi taure urere ukpe iruo onana u te ti te, ma rẹ sai muọ September họ avọ ekobaro oke-kpobi 25,000 hayo bu vi ere!
7 O Gwọlọ Omaa: Kọ euwa 70 usiuwoma ota evaọ amara o gbẹ dina wọhọ nnọ o rro vi owhẹ obọ ẹnyate? Ẹsejọhọ ma te roro rri ofẹ euwa 17 evaọ ẹkpoka u ti fiobọhọ. Ẹkwoma omaa oriruo nọ o rrọ ẹwẹ-obe nọ o kẹle onana, daoma m’omaa iruo ọkobaro nọ u re kiehọ iyero ra. Nọ whọ tẹ be m’omaa na, t’ẹme kugbe ekobaro nọ i wo ona no re whọ riẹ iroro rai kpahe epanọ a ro ru iruo ọkobaro avọ ewha-iruo omobọ rai gbe erọ uviuwou fihọ owowa. Nọ ọsẹro okogho ra kpahe epanọ ekobaro nọ e rrọ okogho na a m’omaa iruẹru rai fihọ evaọ k’oka k’oka. Kẹsena whọ vẹ rẹro so Jihova re ọ ghale omaa ra kẹ iruo ọkobaro na.—Itẹ 16:3.
8 Ru Ei Fihọ Omaa Uviuwou: Kọ who roro kpahe iruo ọkobaro nọ a re ru fihọ omaa uviuwou no? Uviuwou na o sae keria wha vẹ ta kpahe epanọ omọvo hayo imava evaọ uviuwou na a sai ro ru iruo ọkobaro ẹkwoma omaa nọ a romatotọ ma avọ ọrọwokugbe. O rrọ ere inọ, ahwo jọ a te ruẹ nọ otẹrọnọ a kiẹ iyero rai riwi avọ oruọzewọ a rẹ sai ru iruo ọkobaro oke-kpobi enẹna ha. O tẹ rrọ ere, fi iruo ọkobaro họ ute obaro. Rekọ muọ omaa họ ẹma kẹ ugogo ẹdẹ nọ who re ro mu iruo ọkobaro họ. Ẹsejọhọ whọ sai ru ọkobaro obufihọ unuẹse buobu evaọ ukpe na re whọ nyate ẹgwọlọ ọkobaro oke-kpobi.
9 Ekobaro oke-kpobi nọ i bu vi 22,000 nọ ma wo evaọ Nigeria enẹna a wo iyero sa-sa. Orọnikọ aikpobi a wo omokpokpọ họ, yọ ibuobu rai i wo ewha iviuwou gbe erọ abọ ugho. Ejọ e kpako no, efa emaha yọ a te rọo ho. Ibuobu rai yọ inievo-emezae nọ i wo ewha-iruo uviuwou gbe erọ ukoko. Enana kpobi e be ‘dẹ oke uvẹ na’ kẹ iruo ọkobaro, onọ, evaọ ẹsebuobu, o gwọlọ uzuazọ olọlọhọ rekiyọ u wo edẹro ghele.—Kọl. 4:5.
10 Kọ O Gwọlọ re Who Ru Eware Lọhọ? Uzuazọ ra nọ who re ru lọlọhọ o sae jọ usiavẹ nọ u re rovie ẹthẹ kpohọ iruo ọkobaro k’owhẹ. Kọ uzuazọ ra o wọhọ uwou ulogbo nọ o vọ avọ ibruwou gbe ekwakwa nọ i fo ho, nọ e gwọlọ oke, igho, gbe iruo buobu nọ a rẹ rọ sẹro rai? O tẹ rrọ ere, enwene lele iyero owowa o rẹ sae k’uvẹ kẹ iruo ọkobaro. Kọ whọ sai bru unu oke iruo okọ ra kpẹre? Kọ whọ sae dẹ oke no iruo nọ e r’oja tere he ze hayo dhesẹ owowa evaọ unu oke nọ a rẹ raha fihọ aroza oma-urukpokpọ?
11 Ebaibol na, eva 1 Timoti 6:8, o tuduhọ omai awọ inọ: “Rekọ otẹrọnọ ma wo emuore gbe emuẹgọ jọ enana e da omai ẹro.” Edẹro evaọ umutho eware yọ oware nọ u w’uzou gaga evaọ ẹgba mai kpobi nọ ma re ro ru iruo Jihova u ve je ru ei lọhọ viere re ma rehọ isiuru abọ-ẹzi karo. (Mat. 6:22, 33) Eva ẹwẹ-obe avọ 104 ọrọ 1998 Yearbook evaọ iyẹrẹ kpahe Japan, a jiroro buobu kpahe oware nọ o soriẹ nọ ẹzi iruo ọkobaro owoma otiọye ọ rọ rrọ ẹkwotọ ọyena. Roro ovo jọ: “Uzẹme o rrọ inọ iwou ahwo Japan e rẹ jọ owowa, fikiere umutho oke ọvo a rẹ rọ r’ẹro te ai, yọ evaọ abọ ologbo riẹ, a ru izuazọ rai lọlọhọ.” Kọ o gbẹ rrọ nọ otofa ẹme ọ 1 Timoti 6:8 na oye?
12 Wariẹ akpọ na họ, idibo Ọghẹnẹ e be vuẹ emamọ usi na gaga vi epaọ anwẹdẹ kpobi taure ẹdẹ usiwo Jihova o te ti t’oba. Avọ isiuru, evaọ ukpe n’ukpo enwenọ ahwo 700,000 a w’obọ evaọ abọjọ iruo ọkobaro na k’amara k’amara. Kọ whọ sae kpọ uzuazọ ra vi re whọ ruẹsi kuomagbe ai? Ma zizie owhẹ re whọ roma totọ avọ olẹ kiẹ iyero ra riwi nọ whọ be k’uyo onọ na: “Kọ ẹthẹ iruo ọkobaro o rovie fihọ k’owhẹ no enẹna?”
[Blurb on page 3]
UTE: EKOBARO OKE-KPOBI 25,000!
[Boxes on page 4]
Oriruo Omaa ọ Iruo Ọkobaro Oke-Kpobi
Unu nọ a re ru: euwa 17 evaọ ẹkpoka
Ẹdẹ-Iruo Oka Ọvo avọ Urere Oka Na
Ẹdẹ Euwa
Edisoi-Oka 8
Ẹdẹ-Ọmaha 6
Ẹdoka 3
Unu Euwa na Kpobi: 17
Edẹ-Iruo Oka Ivẹ gbe Ẹdẹ-Ọmaha
Ẹdẹ Euwa
Edivẹ-Oka 7
Edene-Oka 7
Ẹdẹ-Ọmaha 3
Unu Euwa Na Kpobi: 17
Edẹ-Iruo Oka Esa gbe Ẹdoka
Ẹdẹ Euwa
Ẹdọvo-Oka 5
Edesa-Oka 5
Edisoi-Oka 5
Ẹdoka 2
Unu Euwa na Kpobi: 17
Owọwọ Ivẹ gbe Urere-Oka Na
Ẹdẹ Euwa
Ẹdọvo-Oka 3
Edesa-Oka 3
Ẹdẹ-Ọmaha 8
Ẹdoka 3
Unu Euwa na Kpobi: 17
Ru Omaa Ọkobaro Oke-Kpobi Obọra
Ẹdẹ Euwa
Ẹdọvo-Oka
Edivẹ-Oka
Edesa-Oka
Edene-Oka
Edisoi-Oka
Ẹdẹ-Ọmaha
Ẹdoka
Unu Euwa na Kpobi:17