Kọ Ma te Wariẹ Ru Ei?—Use Ofa kẹ Ekobaro Ubroke

¹ Kọ ma te wariẹ ru eme? Kọ ma ti ru iruo ọkobaro ubroke evaọ ezi ehaa Ekareghẹhọ na? Uko-obeva Odibọgba Uvie Mai ọrọ February 1997 u si iroro mai avọ uzoẹme nọ u mu gbalọ na: “Ma Gwọlọ—Ekobaro Ubroke 30,000.” Ma wo imuẹro nnọ wha ti se use oyena gboja. Okenọ a koko iyẹrẹ usiuwoma ota March 1997 họ, dede nọ ma sai te ute 30,000 ha, eva e were omai nọ ma riẹ nọ ahwo 19,218 i fi obe họ kẹ iruo ọkobaro ubroke na! Ma te ku unu ọ ekobaro oke-kpobi 19,295 kugbei avọ ekobaro obọdẹ 398 nọ e n’iyẹrẹ evaọ amara ọyena, ma ruẹ nọ enwenọ iwhowho-uvie 20 evaọ udhusoi a jọ iruo ọkobaro na.

² Ma rehọ oma osasa jiri enọ e daoma re a fi ẹvi họ iruo usiuwoma ota rai evaọ ukpe n’ukpo. Vevẹ na, uvi uyoyou kẹ Jihova Ọghẹnẹ jẹ rọ kẹ erivẹ rai o wọ owhai na. (Luk 10:27; 2 Pita 1:5-8) Iwhowho-uvie evaọ uyero uzuazọ sa-sa a ru uvẹ kẹ iruo ọkobaro ubroke. Evaọ ukoko jọ, iwhowho-uvie 51 a ru iruo ọkobaro na kugbe evaọ amara ọvo na, kugbe ekpako na buobu, oni nọ ọmọtẹ emerae 15 ọ rọ obọ, oniọvo-ọmọtẹ nọ o no iruo riẹ re ọ gwọlọ iruo ubroke re ọ sai ruiruo ọkobaro, gbe oniọvo-ọmọtẹ ọkpako jọ nọ o ti ruiruo ọkobaro ẹdọvo ho. Ọsẹro okogho na o kere nọ: “Omodawọ ulogbo evaọ iruo usiuwoma ota na o be nyaharo. . . . Orọnikọ onana o be jọ ẹkwotọ na ruiruo ọvo ho rekọ ọwhọ ọ vọ ikoko na oma. Inievo na e be reawere omoma rai nọ a be riẹ viere jẹ be ruẹ emamọ iyẹrẹ evaọ odibọgba na.”

³ Emoha na a r’abọ muoma ha evaọ ukpe n’ukpo na. Owhowho-uvie ikpe 13 jọ nọ ọ te họ-ame he ọ be kpakpa oma hẹrẹ okenọ o ti dhesẹ omarọkẹ Jihova riẹ via. Nọ ọ họ-ame no evaọ February, o te kere kpahe isiuru riẹ re o ruiruo ọkobaro ubroke evaọ March: “Avọ oware ovo nọ u gbe bi kru omẹ kpemu hu, me te fi obe họ vẹrẹ vẹrẹ. . . . Ma hae reawere eware igbunu buobu nọ ma nyaku hu o gbẹ rọ uzizie uyoyou rai kẹ iruo ọkobaro ho. Me yere Jihova kẹ uvẹ-ọghọ ọnana re mẹ jọ usu enọ e kuyo.” O fi ute họ no re ọ wariẹ ru ei.

⁴ Ẹsejọhọ whọ jọ usu ahwo 19,218 nọ i ru ọkobaro ubroke na evaọ March n’ukpo, hayo usu 18,662 evaọ April, hayo 13,434 evaọ May. Kọ whọ te wariẹ ru ei evaọ enukpe ọnana? Otẹrọnọ whọ sai ru iruo ọkobaro ukpe n’ukpo ho, kọ whọ sai ru ei enukpe ọnana? Kọ ma sae te vrẹ unu 22,199, nọ i ruiruo ọkobaro ubroke evaọ April 1990 re ma daoma vrẹ ute 30,000 evaọ ukpe ọnana? Unu ọ 1990 na họ unu ekobaro ubroke nọ e mai bu kpobi evaọ amara ọvo evaọ Nigeria.

⁵ Tẹro vi April avọ May: Enukpe ọnana, ehaa Ekareghẹhọ na u kie fihọ Ẹdẹ-Ọmaha, April 11, nọ u ru April fihọ obọdẹ amara kẹ ubu iruo evaọ odibọgba na. (2 Kọr. 5:14, 15) Evaọ edẹ 11 emuhọ amara na, ma te tẹro vi ezizie enọ i wo isiuru nọ ma rẹ sai zizie kpobi re a ziọ ehaa Ekareghẹhọ na. Whọ tẹ moma iruo ọkobaro ubroke, iviena kaki fi obe ra họ kẹ ẹdẹ nọ whọ gwọlọ ro muhọ.—1 Kọr. 14:40.

⁶ Nọ May u wo urere eka isoi na, o rẹ sae lọhọ kẹ iwhowho-uvie nọ i bi kpohọ isukulu hayo enọ i bi ruiruo ẹsikpobi re a ruiruo ọkobaro ubroke evaọ amara ọyena. Whọ tẹ moma euwa ikpe kẹ urere eka isoi na kpobi, kọ euwa ikpe ọvo whọ rẹ m’oma re who fibae evaọ amara na re who le ute euwa 60 na mu.

⁷ Evaọ emerae April gbe May na, ma ti ru ahwo vi Uwou-Eroro Na gbe Awake! wọhọ ebe nọ ma ti fihọ ada. Onana o rẹ tubẹ tudu họ ibuobu mai awọ re ma te kẹ iruo ọkobaro na. Fikieme ma jẹ ta ere? O rẹ lọlọhọ re a dhesẹ emagazini na kẹ ahwo o tẹ jẹ rọ omawere re a rehọ ai ruiruo evaọ odibọgba na. I re kiehọ abọ iruo usiuwoma ota na kpobi—usiuwoma n’uwou ruọ uwou gbe uhie-eki ruọ uhie-eki, gbe okenọ ma tẹ nyabru ahwo evaọ iyẹrẹ, evaọ eria eriosehọ, gbe eria nọ imoto e rẹ kpahe gbe eria efa itieye. Maero, Uwou-Eroro Na gbe Awake! e be kpare uzẹme Uvie kpehru. I re si iroro kpohọ orugba eruẹaruẹ Ebaibol, dhesẹ nnọ Uvie Ọghẹnẹ u muhọ esuo no. I re je duobọ te izuazọ enọ i bi se na ẹkwoma ẹgwọlọ ahwo na nọ i re dhobọ te. Ma te roro epanọ ebe eghaghae enana i kpomahọ izuazọ mai no, oma o rẹ wọ omai re ma vaha ai kẹre te epanọ ẹgba mai o te evaọ April gbe May re ma jẹ tudu họ amọfa buobu awọ re a vi ebe enana.

⁸ Evaọ omaruẹrẹhọ kẹ iruo ilogbo emagazini, who ti wo erere no ẹkiẹriwo izoẹme enana ze: “Uwou-Eroro Na gbe Awake!—Ebe Ẹruoke Uzẹme” (Uwou-Eroro ọ January 1, 1994 [ọrọ Oyibo]), “Rehọ Emagazini Mai ru Emamọ Iruo” (Odibọgba Uvie Mai ọrọ March 1996), gbe “Ruẹrẹ Odhesẹvia Emagazini Obọra Họ” (Odibọgba Uvie Mai ọrọ October 1996).

⁹ Ekpako E rẹ Kobaro: Re o lọhọ iwhowho-uvie buobu nọ i ru iruo ọkobaro na oma evaọ ukpe n’ukpo, ekpako na evaọ ukoko jọ a fi Ẹdẹ-Ọmaha jọ họ evaọ amara na wọhọ ẹdẹ obọdẹ usiuwoma ota kẹ ukoko na kpobi. A ru eruẹrẹfihotọ re a kuomagbe unuẹse buobu evaọ okpẹdẹ na, nọ o kẹ ahwo ukoko na kpobi uvẹ re a w’abọ evaọ abọ sa-sa isẹri-ise na. Enana i kugbe eruo eria eki, isẹri-ise evaọ iyẹrẹ, usiuwoma ọ n’uwou ruọ uwou, gbe eruo izihebro. Uyo nọ a kẹ u gbunu, avọ iwhowho-uvie 117 nọ e ta usiuwoma evaọ ẹdẹ ọyena. A raha euwa 521 evaọ odibọgba na je fi emagazini, ibroshọ, gbe ebe 617 họ ada! A wha oghọghọ Ẹdẹ-Ọmaha ọyena ruọ Ẹdoka, avọ ahwo nọ e mai bu kpobi nọ e ziọ Ewuhrẹ Ogbotu na gbe Uwuhrẹ Uwou-Eroro Na.

¹⁰ Evaọ Ewuhrẹ Odibọgba kpobi evaọ April gbe May, a rẹ kareghẹhọ ukoko na kpahe oke gbe oria nọ a ti kokohọ kẹ usiuwoma ota evaọ oka obaro na, maero a te ru eruẹrẹfihotọ efa nọ e hẹriẹ no enọ e riẹ anwẹdẹ. Ma tudu họ ekobaro oke-kpobi gbe iwhowho-uvie nọ e rọ ekobaro ubroke he awọ re a tha eruẹrẹfihotọ ogbotu ọnana uke wọhọ epanọ uyero rai o kẹ rai uvẹ te.

¹¹ U fo re ọsẹro usiuwoma ota na ọ t’ẹme kugbe oniọvo nọ o bi dhe ekwotọ na re o ru eruẹrẹfihotọ kẹ eria nọ a re ru kẹse kẹse he. A rẹ mai muẹrohọ ahwo nọ a jọ uwou hu gbe isẹri-ise iyẹrẹ gbe n’uhie-eki ruọ uhie-eki. A rẹ sai fiẹgba họ isẹri-ise owọwọ evaọ April. A re vi emagazini buobu kẹ April gbe May hẹrẹ iruo ilogbo na.

¹² Iwhowho-Uvie Buobu A Sai Te: Uhie-ẹme ọsosuọ evaọ efọmo ọkobaro ubroke na o ta nọ: “Fiki uyoyou mẹ kẹ Jihova gbe isiuru mẹ re me fiobọhọ kẹ amọfa wuhrẹ kpahe iẹe gbe ẹjiroro oyoyou riẹ, mẹ gwọlọ fi ẹvi họ ẹkẹ abọ mẹ evaọ usiuwoma na ẹkwoma obe nọ me bi fihọ wọhọ ọkobaro ubroke.” Uyoyou kẹ Jihova gbe ẹgwọlọ obufihọ kẹ amọfa evaọ abọ-ẹzi e r’oja kẹ omarọkẹ mai. (1 Tim. 4:8, 10) Re a te kẹ ọkobaro ubroke, ohwo na ọ rẹ họ-ame no, o re wo emamọ edikihẹ, o ve je te ọnọ ọ rẹ raha euwa 60 evaọ odibọgba na evaọ amara na. Nọ mai kpobi a bi roro kpahe iyero mai na, kọ otu mai jọ nọ i ti ru ọkobaro ẹdọvo ho a sai ru ei enukpe ọnana evaọ April hayo May?

¹³ Ibuobu evaọ ikoko na a rẹ sai vuhumu nnọ a rẹ sai ruiruo ọkobaro re nọ a tẹ ruẹ amọfa nọ i fi obe họ nọ iyero rai e wọhọ erai. Emọ isukulu, enọ e kpako no, enọ i bi ruiruo oke kpobi, kugbe ekpako gbe idibo iruiruo, gbe amọfa a ruiruo ọkobaro ubroke no oma kọkọ. Aye uwou-orọo avọ emọ ivẹ nọ o bi ruiruo oke kpobi o le euwa 60 mu, fi emagazini 108 họ ada, mu iwuhrẹ Ebaibol 3 họ evaọ amara ọvo nọ o ruiruo ọkobaro ubroke. Ẹvẹ ọ sai ro ru ei? Ọ rehọ oke eriosehọ iruo riẹ ro se isẹri evaọ ẹkwotọ ekẹloma, o se isẹri ẹkwoma ileta kere, ọ tẹ jẹ ta usiuwoma evaọ oria nọ imoto e rẹ kpahe gbe isẹri-ise iyẹrẹ. Ọ tẹ jẹ rehọ uvẹ ẹdọvo ẹkpoka riẹ nọ o re ruiruo ho ro lele ukoko na kpohọ usiuwoma. Dede nọ ọ kaki roro vẹre nnọ iruo ọkobaro ubroke yọ ute nọ ọ sai le mu hu, avọ uduotahawọ amọfa gbe oma nọ ọ ruẹrẹ họ ziezi, o te fi ezadhe na kparobọ.

¹⁴ Jesu ọ kẹ ilele riẹ imuẹro nọ: “Owhowha mẹ o rẹ lọlọhọ, owha mẹ u re vovovo.” (Mat. 11:30) Oyena họ uzoẹme uduotahawọ jọ evaọ Uwou-Eroro Na ọrọ August 15, 1995 (ọrọ Oyibo). O ta kpahe oniọvo-ọmọtẹ jọ nọ o bi ruiruo oke kpobi nọ o wo uvumọ uvẹ hẹ. Kọ o roro nọ iruo ọkobaro ubroke o sae kiehọ kẹe he? Ijo. Evaọ uzẹme, ọ daoma ruiruo ọkobaro ubroke k’amara k’amara. Fikieme? Keme o roro nọ iruo ọkobaro u re ghine fiobọhọ kẹe kpomamu. Re o fiobọhọ kẹ ahwo nọ i bi wuhrẹ uzẹme Ebaibol na re ọ jẹ rue rai nọ a bi nwene izuazọ rai re a wo ọjẹrehọ Ọghẹnẹ yọ ehri oghọghọ nọ o mae rro kpobi evaọ uzuazọ ababọ uvẹ riẹ.—Itẹ 10:22.

¹⁵ Eghale nọ ohwo ọ rẹ reawere riẹ i re ruru omolahiẹ gbe inwene nọ ohwo o re ru re ọ ruẹsi ruiruo ọkobaro na. Oniọvo-ọmọtẹ jọ o kere kpahe eware nọ ọ jọ iruo ọkobaro ubroke ruẹ: “U fiobọhọ k’omẹ siọ oriobọ ba re mẹ mae rẹriẹ aro ku amọfa nọ me re fiobọhọ kẹ. . . . Jọ enọ o rẹ sae lọhọ kẹ a ru ei.”

¹⁶ O Gwọlọ Emamọ Oma: Evaọ ẹwẹ-obe urere uko-obeva onana, ma wariẹ kporo oriruo oma nọ ọ roma via evaọ Odibọgba Uvie Mai ọrọ February 1997 na. Ẹsejọhọ ovo jọ evaọ usu enana i ti kiehọ owhẹ oma. Nọ whọ be kiẹ ai riwi na, roro kpahe iruẹru amara ra vẹre. Iruo vẹ whọ rẹ sae jọ uwou na ru fihọ otọ no taure oke ọkobaro na u te te hayo onọ a rẹ sae r’obọ nẹ tao? Kọ whọ sae whaha oke jọ nọ whọ be raha evaọ eriosehọ, arozaha, hayo eghẹrẹ ẹkeriotọ efa? Ukpenọ whọ tẹro vi euwa 60 nọ a gwọlọ na, moma okpokpẹdẹ hayo ẹkpẹkpoka. O gwọlọ euwa 2 ọvo okpẹdẹ hayo euwa 15 ẹkpoka re a ruiruo ọkobaro ubroke. Rri oriruo oma na, avọ opẹsoro, moma usiuwoma ota omobọ ra nọ o te mai kiehọ uviuwou ra oma.

¹⁷ Emamọ uyo gbe uketha nọ ukoko na u dhesẹ kẹ odibọgba na ukpe n’ukpo o tua ajọwha ọkobaro oke-kpobi jọ ọnọ o kere nọ: “Me yere owhai kẹ uduotahawọ oyoyou otiọye na nọ wha rọ daoma tha iruo ekobaro ubroke uke. . . . Ẹjiroro oma nọ wha kẹ u fiobọhọ kẹ ibuobu nọ i ti ruiruo ọkobaro ẹdọvo ho ruẹ nọ a sai ru ei. . . . Eva e be were omẹ gaga inọ mẹ rọ abọ ukoko Jihova re me je lele esuo oyoyou ọrigbo ẹrọwọ avọ areghẹ na.”

¹⁸ Itẹ 21:5 o k’omai imuẹro nọ: “Oma omamọ ohwo o rẹ rehọ ọruẹriọ tha.” Itẹ 16:3 o tuduhọ omai awọ nọ: ‘Ghelie iruo ra kẹ ỌNOWO na, o re ti ru ẹjiroro ra gba.’ Ẹhẹ, ẹkwoma Jihova nọ ma re kugbe olẹ evaọ ẹjiroro mai re ma je fievahọ iẹe ziezi re o fiobọhọ k’omai kparobọ, ma rẹ sae rehọ emamọ ẹro rri ẹjiroro mai re ma ruiruo ọkobaro. O sae jọ nọ okenọ ma tẹ ruẹ epanọ oma mai u ruiruo te no evaọ amara hayo emerae ivẹ evaọ iruo ọkobaro mai, ma rẹ sai kpoka họ ẹkpẹti obe ọkobaro ubroke na nọ u se nọ: “Kpoka họ etenẹ whọ tẹ gwọlọ ruiruo ọkobaro ubroke ribri.” Oghẹrẹ nọ o rrọ kpobi, ma rẹ sai rri kparo kpohọ ẹwariẹ ruo iruo ọkobaro ubroke evaọ August, nọ u ti wo urere eka isoi vọvọ. Okenọ ma ti kuọ ukpe iruo na họ evaọ August, ma te daoma kugbe re ohwo kpobi o w’obọ vọvọ ziezi evaọ odibọgba na.

¹⁹ Jesu ọ ruẹaro nọ: “Ọ nọ ọ [rọwo] omẹ, iruo nọ me ru o re ti ruẹ re; o re ti ru iruo ilogbo nọ i vie enana.” (Jọn 14:12) O rọ uvẹ-ọghọ oghọghọ mai re ma ruiruo wọhọ ibe iruiruo Ọghẹnẹ nọ eruẹaruẹ ọnana o bi wo orugba ologbo na. Enẹna họ oke nọ a rẹ rọ ta emamọ usi na avọ ẹgba vi epaọ ọsosuọ, dẹ uvẹ oke nọ ma re ro ruiruo na. (1 Kọr. 3:9; Kọl. 4:5) Re ma w’abọ nọ oma u te vẹ omai evaọ iruo ọkobaro ubroke na o rọ obọdẹ edhere nọ ma re ro ru ẹkẹ abọ mai wọhọ iwhowho Uvie. Ma be rọ ọwhọ hẹrẹ epanọ ile ujiro o te rro te evaọ ezi ehaa Ekareghẹhọ ọnana no obọ ekobaro ubroke ze. (Ol. 27:6) Nọ ma bi roro kpahe iyẹrẹ ukpe n’ukpo na, u re gb’omai unu, ‘Kọ ma ti ru ei enukpe ọnana?’ Ma wo udu nnọ ma ti ru ei!

[Box on page 3]

Kọ Whọ Sai Ruiruo Ọkobaro Ubroke?

“Epanọ uyero ra o rọ kpobi, whọ tẹ họ-ame no, who te wo emamọ edikihẹ, otẹrọnọ whọ sae ruẹrẹ oma họ re whọ jọ amara ọvo raha euwa 60 evaọ usiuwoma na je wo irẹro nọ whọ sai ru amara ọvo hayo bu viere wọhọ ọkobaro ubroke, eva e te were ekpako ukoko re a roro kpahe obe nọ who fihọ na kẹ uvẹ-ọghọ iruo ọnana.”—Organized to Accomplish Our Ministry, ẹwẹ-obe avọ 114.