Ute nọ U Fo ELe Evaọ Ukpe Iruo Okpokpọ Na

1. Utee vẹ ma rẹ sai fihọ kẹ ukpe-iruo okpokpọ na?

¹ Ma re fi itee họ otẹrọnọ ma gwọlọ wo ẹnyaharo abọ-ẹzi. Ute vẹ who fihọ nọ who ti le evaọ ukpe-iruo okpokpọ na? Obọdẹ utee jọ họ ọkobaro obufihọ nọ who re ru evaọ amara ọvo hayo bu viere. Nọ o rrọ nọ iruo evawere nana e rẹ gwọlọ omaa nọ a rẹ ma kpahotọ na, enẹna họ oke nọ who re ro mu omaa na họ ẹma. Fikieme who je roro kpahe ọkobaro obufihọ wọhọ utee?

2. Fikieme ma je fi iruo ọkobaro obufihọ họ utee mai?

² Oware no Ma Je Ru Ọkobaro Obufihọ: Ọkobaro obufihọ u re fiobọhọ k’omai ru eva were Ọsẹ obọ odhiwu mai gaga ẹkwoma oke nọ ma rẹ jọ odibọgba na raha vi epaọ ọsosuọ. (1 Tẹs. 4:1) Nọ ma te roro kpahe eware kpobi nọ Jihova o ru k’omai no, oma o rẹ w’omai re ma nyae vuẹ amọfa kpahe iẹe. (Ol. 34:1, 2) Jihova o bi muẹrohọ omodawọ mai gbe eware nọ ma fihọ akotọ re ma sae jọ odibọgba na ru vi epaọ ọsosuọ, yọ onana o be dae ẹro fia. (Hib. 6:10) Nọ ma tẹ riẹ nọ ma be rọ iruo iwoma mai ru eva were Jihova o rẹ k’omai oghọghọ ulogbo.—1 Irv. 29:9.

3, 4. Irere vẹ ma re wo no iruo ọkobaro obufihọ ze?

³ Wọhọ epanọ o rẹ mae jọ, nọ who te bi dhe oware erueruo, ẹsiẹe o rẹ mae lọhọ owhẹ obọ jẹ k’owhẹ omaweromẹ. Oke nọ whọ rẹ jọ odibọgba na raha vi epaọ ọsosuọ u ti fiobọhọ k’owhẹ kpọ oma mu nọ whọ tẹ be ta usiuwoma kẹ ohwo. O te lẹliẹ owhẹ wo onaa ziezi nọ who re ro mu ẹme họ lọlọhọ jẹ rehọ Ebaibol na ruiruo ziezi. Epanọ whọ ta kpahe ẹrọwọ te, ere ọ rẹ ga te. Ahwo buobu nọ a jẹ sai ru obe-uwuhrẹ Ebaibol kugbe amọfa vẹre he a sae to obe-uwuhrẹ Ebaibol họ evaọ etoke nọ a ro ru ọkobaro obufihọ.

⁴ Ọkobaro obufihọ o sai je fiobọhọ kẹ ohwo nọ oyẹlẹ abọ-ẹzi o be ruọ oma no wariẹ wo ajọwha. Oniọvo-ọmọzae jọ nọ ọ jọ ọkobaro oke-kpobi vẹre o vuhumu inọ ọ be raha oke ga hrọ fihọ iruo obọ riẹ, fikiere ọ tẹ jiroro nọ o re ru ọkobaro obufihọ evaọ amara ọvo. Ọ ta nọ: “Ẹgba abọ-ẹzi nọ amara ọvo yena ọ kẹ omẹ u gbe omẹ unu kẹhẹ! Me te ru ọruẹrẹfihotọ nọ me ro ru ọkobaro obufihọ ababọ eriosehọ, onana u te fiobọhọ k’omẹ wariẹ mu ọkobaro oke-kpobi họ.”

5. Ẹvẹ ma sai ro fi ẹbẹbẹ ọrọ iroro ọ me te he kparobọ?

⁵ Epanọ A re ro Fi Ezadhe Kparobọ: Ozọ o rẹ sai mu ahwo jọ nọ a gbe fi obe họ kẹ iruo ọkobaro obufihọ họ fikinọ a roro nọ a wo ona usiuwoma ota ha. Otẹrọnọ onana u bi ru nọ who gbe bi fi obe họ kẹ iruo ọkobaro obufihọ họ, Jihova ọ rẹ sai fiobọhọ k’owhẹ wọhọ epanọ o fiobọhọ kẹ Jerimaya na. (Jeri. 1:6-10) Dede nọ Mosis ọ riẹ ẹme ẹta tere he, Jihova ọ rehọ e riẹ ru ẹjiroro Riẹ gba. (Ọny. 4:10-12) Otẹrọnọ who roro nọ whọ sai ru ei hi, lẹ se Jihova kẹ ẹgba.

6. Ẹvẹ o sae rọ lọhọ re ohwo o ru ọkobaro obufihọ ghelọ ẹbẹbẹ ẹyao hayo uvẹ nọ ohwo ọ rẹ kaki wo ho?

⁶ Kọ ozọ iruo ọkobaro obufihọ u bi mu owhẹ fiki ẹbẹbẹ ẹyao hayo fikinọ who re wo uvẹ hẹ? Otẹrọnọ oma ra o ga tere he, whọ rẹ sai ru ọkobaro obufihọ ghele nọ whọ tẹ be hai ru umumutho noke toke wọhọ epanọ oma na u voro owhẹ te. Otẹrọnọ whọ rẹ kaki wo uvẹ hẹ, whọ sae jọ iruẹru ra ruẹ eware jọ nọ i wuzou tere he nọ whọ rẹ sae kpae kpohọ amara ọfa. Ahwo jọ nọ iruo rai e rẹ rehọ oke rai kpobi a sae kpaviẹ oke jọ ro ru ọkobaro obufihọ no ẹkwoma uvẹ ẹdẹ-ọvo hayo edẹ-ivẹ nọ a mi evaọ obọ iruo rai.—Kọl. 4:5.

7. Fikieme o jẹ rrọ oware erere re ma lẹ se Jihova kpahe iruo ọkobaro obufihọ?

⁷ Epanọ Whọ Sai Ro Ru Ei: Lẹ se Jihova kpahe isiuru ra. Lẹe re ọ ghale omodawọ ra nọ whọ rọ gwọlọ ru odibọgba ra kẹre. (Rom 12:11, 12) Ọ sai fiobọhọ k’owhẹ jẹ emamọ iroro kpahe epanọ whọ sae rọ ruẹrẹ omaa ra họ. (Jem. 1:5) Otẹrọnọ who wo isiuru na ha, lẹ se Jihova re o fiobọhọ k’owhẹ wo omawere evaọ iruo usiuwoma ota na.—Luk 10:1, 17.

8. Ẹvẹ efihiruo eme nọ e rrọ Itẹ 15:22 e sai ro fiobọhọ k’owhẹ ru ọkobaro obufihọ?

⁸ Wha jọ uviuwou rai ta kpahe utee ọkobaro obufihọ nọ wha re le. (Itẹ 15:22) Avọ uketha nọ ahwo uviuwou a rẹ kẹ, omọvo jọ evaọ uwou na ọ sai ru ọkobaro obufihọ. Ta isiuru nọ whọ rọ gwọlọ ru ọkobaro kẹ amọfa evaọ ukoko na, maero kọ ahwo nọ a wo iyero nọ e wọhọ era. Onana o sae lẹliẹ amọfa wo ajọwha nọ a re ro ru ọkobaro obufihọ.

9. Emerae vẹ whọ sae salọ nọ whọ rẹ jọ ru ọkobaro obufihọ?

⁹ Nọ whọ be ma omaa odibọgba ra rọkẹ ukpe-iruo okpokpọ na, oke vẹ who roro nọ whọ te sai ro ru ọkobaro obufihọ? Otẹrọnọ who bi ru iruo nọ e rẹ rehọ oke ra kpobi hayo whọ rrọ isukulu, whọ sai roro kpahe emerae nọ i wo edẹ ehọlide hayo emerae nọ i wo Edẹ-Ọmaha isoi hayo Edoka isoi. Wọhọ oriruo, amara ọ Azie, Akpegbivẹ, Asa gbe Aria i wo urere-oka isoi. Amara Asoi o wo Edẹ-Ọmaha isoi, yọ amara ọ Azeza o wo Edoka isoi. Otẹrọnọ who wo ẹbẹbẹ ẹyao, roro kpahe emerae nọ oke o rẹ mae jọ ghraghraghra. O sai je kiehọ re who ru ọkobaro evaọ amara nọ ọsẹro okogho o ti ro weze ziọ ukoko rai. Evaọ etoke iweze riẹ, whọ te reawere uvẹ-ọghọ nọ whọ te rọ jọ abọ ọsosuọ ẹgwae nọ ọ te gba kugbe ekobaro oke-kpobi na. Nọ Ekareghẹhọ ukpe notha o kie fihọ March 22 na, amara Asa, Ane, gbe Asoi e te jọ obọdẹ emerae nọ a re ro ru ọkobaro obufihọ. Nọ whọ tẹ salọ amara hayo emerae nọ whọ gwọlọ jọ ru ọkobaro obufihọ no, mu omaa nọ o te k’owhẹ uvẹ nyate utee euwa na họ ekere fihotọ.

10. Eme whọ rẹ sai ru otẹrọnọ o gbẹ lọhọ re who ru ọkobaro obufihọ họ?

¹⁰ O tẹ make rọnọ who roro nọ whọ sai ru ọkobaro obufihọ evaọ ukpe-iruo notha na ha, whọ sae jọ odibọgba na dhesẹ ajọwha ghele. Ruabọhọ utho nọ whọ rẹ sai ru kpobi evaọ odibọgba na, avọ udufihọ inọ utho ẹgba ra kpobi nọ who bi ru na o be were Jihova eva. (Gal. 6:4) Kẹ ahwo nọ a bi ru ọkobaro obufihọ uketha, jẹ tuduhọ ae awọ. Ẹsejọhọ whọ sai fi ẹdẹ jọ họ evaọ udevie ẹkpoka na nọ who re ro lele ekobaro kpohọ usiuwoma ota.

11. Fikieme ma je wo epanọ oke nana o nwẹnwẹ te họ iroro?

¹¹ Idibo Jihova a riẹ epanọ oke nọ ma rrọ na o nwẹnwẹ te. Iruo e riẹ nọ a re ru te oka—ewhowho emamọ usi na. Uzuazọ ahwo o rrọ ọza, yọ oke nọ u kiọkọ u tulo ho. (1 Kọr. 7:29-31) Uyoyou nọ ma wo kẹ Ọghẹnẹ gbe erivẹ mai o te w’omai dao ẹgba mai kpobi evaọ odibọgba na. Nọ ma tẹ ma emamọ omaa jẹ daoma ziezi, ma te sai ru ọkobaro obufihọ o tẹ kawo amara ọvo evaọ ukpe-iruo notha na—utee nọ u gine fo ele!