Ta Usiuwoma je Se Isẹri Ziezi

¹ Wọhọ “osu gbe oletu,” Jesu o wuhrẹ ilele riẹ kẹ iruo ilogbo erọ usiuwoma ota nọ e rrọ obaro tha. (Aiz. 55:4; Luk 10:1-12; Iruẹru 1:8) Pita ukọ na ọ rehọ eme nana dhesẹ iruo nọ Jesu ọ kẹ rae na: “O je fi uzi họ kẹ omai re ma vuẹ ahwo je se isẹi nọ [ọnana] họ ọnọ Ọghẹnẹ o ro mu obruoziẹ enọ erọ uzuazọ gbe iwhuowhu.” (Iruẹru 10:42) Eme o gwọlọ re a se isẹri ziezi?

² Ma rẹ sai wuhrẹ eware buobu no eroro kpahe oriruo Pọl ukọ na ze. Nọ ọ jẹ gb’ẹgwae kugbe ekpako ukoko Ẹfẹsọs, ọ kareghẹhọ ae nnọ: “Mẹ [re] se oware ovo nọ o rẹ kẹ owhai erere, ba ẹta kẹ owhai hi, jehe wuhrẹ owhai evaọ aro ahwo kpobi, jehe no uwou ruọ uwou, je se isẹri rọkẹ ahwo Ju avọ Griki kpahọ eva-ikurẹriẹ rọ kẹ Ọghẹnẹ jegbe ẹruọrọsuọ Ọnowo mai Jesu Kristi.” (Ẹjẹlẹ ibieme na ọmai.) Dede nọ ọye omariẹ ọ rẹriẹ ovao ku edawọ, Pọl ọ daoma gaga re ọ rehọ usiuwoma na nyate ahwo buobu wọhọ epanọ o rẹ sae lọhọ te kpobi. Uzẹme nọ ọ rẹ ghale kugbe ahwo nọ a be kezọ kẹe ọvo o da riẹ ẹro ho, o ja riẹ oja re ọ vuẹ ae kpahe “ehrẹ Ọghẹnẹ [kpobi].” Re ọ sai ru onana gba, u no rie eva ze re o fi ẹgba họ iẹe jẹ r’oma dheidhe. Ọ ta h’aro nọ: “[Me] bi kele uzuazọ mẹ gbe odẹ oware ovoho wọhọ orọ oware nọ o jọ obọ mẹ ghare he, re mẹ ruẹse ru ẹkẹ iruo nọ ite omẹ re jegbe iruẹru odibo ọgba nọ omẹ jọ obọ Ọnowo Jesu mi, re me si isẹri usiuwoma aruoriwo Ọghẹnẹ.”—Ẹjẹlẹ ibieme na ọmai; Iruẹru 20:20, 21, 24, 27.

³ Ẹvẹ ma sae rọ raro kele oriruo Pọl nẹnẹ? (1 Kọr. 11:1) Ẹkwoma ẹgwọlọ ahwo gbe iviuwou nọ i te, dede nọ ma be rẹriẹ ovao ku edawọ, ẹkwoma omodawọ re ma rọ usiuwoma na nyate ahwo erua gbe evẹrẹ kpobi oma, gbe ẹkwoma osegboja nọ ma rẹ rọ bọ isiuru ahwo nọ ma ruẹ ga. (Mat. 10:12, 13) Onana o gwọlọ oke, omodawọ, gbe uyoyou rọkẹ ahwo.

⁴ Kọ Whọ Sai Ru Ọkobaro Obufihọ? March gbe April e sae jọ emamọ uvẹ kẹ owhẹ nọ who re ro se isẹri ziezi ẹkwoma ọkobaro obufihọ. Ẹvẹ o jọ uduotahawọ te evaọ ukpe n’ukpo nọ ma rọ ruẹ ahwo buobu nọ a ru obọdẹ omodawọ nọ a ro ru ọkobaro obufihọ!

⁵ Uduotahawọ nọ ukoko Jihova o be kẹ o wọ oniọvo ọmọtẹ jọ nọ ọ kpako te ikpe 80 no nọ o wo ebẹbẹ ẹyao buobu. O kere nọ: “O kpare isiuru nọ me wo fihọ udu mẹ no evaọ oke thethei, o tẹ lẹliẹ omẹ roro nọ mẹ rẹ rehọ ọkobaro obufihọ, o tẹ make kao ẹsiẹvo ọfa jọ.” O te mu ọ iroro riẹ họ ẹjẹ kpahe March. Ọ ta nnọ: “Oware ọsosuọ nọ me ru họ, mẹ keria re me roro oware nọ o te gwọlọ mi omẹ. Mẹ rọ omaa mẹ na lele ọmọtẹ mẹ jiroro kemena mẹ te gwọlọ uketha riẹ. O ru omamọ oware nọ u gb’omẹ unu ẹkwoma obe ọkobaro obufihọ nọ o mi kẹ omariẹ re.” Eva amara na, oniọvo-ọmọtẹ ọkpako nana ọ raha euwa 52 evaọ odibọgba na. “Unuẹse buobu mẹ lẹ se Jihova re o ru ẹgba mẹ kpokpọ eva okenọ me te roro nọ ẹgba mẹ o bi rolo no. Eva urere amara na, eva e were omẹ gaga me te je wo evevọwẹ, yọ me yere Jihova unuẹse buobu no nọ o ro fi obọ họ k’omẹ. Mẹ te wariẹ daoma ru ei.” Iku evawere nana nọ ọ reawere rai na e sae ta udu họ amọfa nọ a ghinẹ gwọlọ ru ọkobaro obufihọ ghelọ ebẹbẹ ẹyao nọ a rẹriẹ ovao ku.

⁶ Oniọvo ọmọzae jọ nọ a si n’iruo idudhe ọ rehọ uvẹ yena rehọ ọkobaro obufihọ. Nọ amara na ọ be nyaharo na, o te ti wo ajọwha viere kẹ iruo usiuwoma ota na, yọ taure amara na o te ti re, o muọ obe uwuhrẹ Ebaibol okpokpọ jọ họ. Nọ o roro kpahe eware ikuigbe yena, ọ ta nọ: “Amara na o woma kẹhẹ!” Rri epanọ eva e were riẹ te fikinọ o wo ọkpọvio gbe obufihọ Jihova! Ẹhẹ, Jihova o ku eghale ku ei fiki ẹgba ologbo nọ oniọvo ọmọzae na o fihọ iruo odibọgba na, yọ o ti ru epọvo na kẹ owhẹ re.—Mal. 3:10.

⁷ Rọkẹ ibuobu, iruo ọkobaro obufihọ na o lọhọ họ. Dede na, ghelọ iruo egọmeti gbe ewha-iruo uviuwou jegbe ebẹbẹ omobọ ohwo, inievo emezae gbe inievo emetẹ buobu e sai ru ere no. Re a sisẹri ziezi o gwọlọ nnọ ma re siobọno oke oghaghae gbe ẹgba mai, rekọ eghale nọ i re noi ze i wo umuo ho.— Itẹ 10:22.

⁸ March gbe April yọ emamọ oke nọ a re ro ru ọkobaro obufihọ. Urere-oka isoi e rrọ March. Eroruiruo uvẹ urere-oka isoi nana gbe usiuwoma nọ a rẹ nya evaọ owọwọ o rẹ sai ru ei lọhọ kẹ ahwo nọ a rrọ iruo oyibo re a ru ọkobaro obufihọ. Ofariẹ re, whọ sae jẹ rehọ uvẹ edẹ eriosehọ amara April na ro ru iruo ziezi. Ahwo jọ a sai wo uvẹ-eriosehọ no obọ isukulu hayo oria iruo rai ze, nọ o rẹ sai fi obọ họ kẹ ae nyate ute euwa 50 na. Re whọ sae ma omaa euwa 50 evaọ odibọgba na eva etoke amara March gbe April, kọ whọ sae rehọ omaa oriruo orọ ọkobaro obufihọ nọ ma fihọ ukere nana ro ruiruo? J’iroro omaa ra na kugbe amọfa; ababọ avro, o te kẹ ejọ udu-otahawọ re a kuomagbe owhẹ evaọ odibọgba na. Otẹrọnọ whọ sai ru ọkobaro obufihọ họ, fi ute jọ họ kẹ emerae nana, jẹ tha ahwo nọ a be sai ru iruo ọkobaro na uke. Ma omaa ra enẹna re whọ sai ru odibọgba ra kẹre evaọ March gbe April.

⁹ Dhesẹ Ovuhumuo kẹ Ekareghẹhọ Na: Eva ezi Ekareghẹhọ na k’ukpe k’ukpe, uyere kẹ ẹtanigbo na o rẹ wọ ibuobu re a ‘dẹ oke’ nọ a rẹ rọ jọ ekobaro obufihọ. (Ẹf. 5:15, 16) Ukpe n’ukpo evaọ Nigeria, ahwo nọ a bu te 16,101 a ru ọkobaro obufihọ eva March yọ ahwo 13,487 a ru ere evaọ April. Nọ a tẹ ghale iẹe fihọ emerae ivẹ na koyehọ ahwo 14,794 evaọ amara ọvuọvo. Rehọ oyena wawo unu ọ 4,837 nọ i ru ọkobaro obufihọ evaọ amara ọvuọvo nọ e vrẹ eva ukpe iruo na. Ezi Ekareghẹhọ nana yọ obọdẹ uvẹ ofa nọ ma re ro dhesẹ ovuhumuo mai nọ o no udu ze kẹ idhe ẹtanigbo Kristi ẹkwoma iruo odibọgba mai nọ ma re ru kẹre.

¹⁰ Nọ edẹ 16 April i bi si kẹle na, roro kpahe otofa nọ Ekareghẹhọ na u wo k’owhẹ. Roro kpahe oware nọ u su kpohọ uwhu Kristi gbe iroro nọ i wo nyẹ e udu. Je roro kpahe oghọghọ nọ o jọ obaro kẹ Jesu gbe epanọ u ro fi obọ họ kẹe thihakọ uye-oruẹ. Roro didi kpahe ọkwa nọ ọ rrọ enẹna wọhọ Ọnowuzou ukoko na, nọ ọ be r’ẹro te iruo usiuwoma ota gbe ilele-iruo na. (1 Kọr. 11:3; Hib. 12:2; Evia. 14:14-16) Who ve dhesẹ uyere ra kẹ eware kpobi nọ Kristi o ru na ẹkwoma abọ nọ who re wo vọvọ evaọ iruo usiuwoma ota na wọhọ epanọ uyero ra o kẹ uvẹ te.

¹¹ Ta Udu Họ Amọfa Awọ Re A Sisẹri Ziezi: Ẹkwoma abọ nọ a re wo evaọ iruo ọkobaro obufihọ na, ekpako gbe idibo iruiruo a rrọ emamọ oria nọ a jẹ ta udu họ amọfa awọ. Nọ a te bi ru iruo kugbe iwhowho-uvie evaọ odibọgba na gbe okenọ a bi ru iweze ẹruorote, a wo emamọ uvẹ nọ a re ro fi obọ họ kẹ amọfa re a w’obọ vọvọ evaọ obọdẹ iruo nana. Jọ mai kpobi ma lẹ kpahe onana, ma vẹ rọ ere bọ omodawọ mai ga evaọ ese emamọ isẹri.

¹² Nọ ekpako gbe idibo iruiruo kpobi a bi ruiruo-kugbe ọruẹrẹfihotọ ukoko ọrọ eru kẹre iruo eva etoke amara March gbe April na, ọsẹro usiuwoma ota na họ uzedhe ohwo nọ ọ rẹ mai mu ẹro họ ẹruorote iruo usiuwoma ota na. O re ru ọruẹrẹfihotọ eria nọ a re kokohọ jọ ru ewuhrẹ kẹ usiuwoma ota, edẹ, gbe oke nọ u kiehọ kẹ iwhowho-uvie buobu re a hai ru owhowhovia nana evaọ ewuhrẹ odibọgba kpobi. A sai ru ọruẹrẹfihotọ nọ a re ro ku oma gbe eva etoke sa-sa eva okpẹdẹ na, nọ o rẹ kẹ ahwo ukoko na kpobi uvẹ nọ a ro w’obọ evaọ isẹri-ise oghẹrẹ sa-sa. Enana e sae kẹre te iruo nọ a re ru evaọ ẹkwotọ ekiọthuọ, isẹri-ise eva iyẹrẹ, isẹri-ise n’uwou ruọ uwou, ekpohọ izihebro, gbe isẹri-ise ẹkwoma ifonu. Ofariẹ re, o re ru ọruẹrẹfihotọ ebe gbe emagazini nọ i re te ziezi, gbe ẹkwotọ nọ o re te jo ru iruo evaọ etoke emerae yena.

¹³ Obe nọ a ti fihọ ada evaọ March họ obe Eriariẹ na, avọ ẹjiroro emuhọ ebe-iwuhrẹ Ebaibol. Emamọ iroro-ejẹ nọ a re ro fi obe Eriariẹ na họ ada e r’oma via evaọ uko-obeva Odibọgba Uvie Mai ọrọ January 2002. Ebe nọ a ti fihọ ada eva April họ emagazini Uwou-Eroro Na gbe Awake! Daoma rehọ iroro-ejẹ nọ e be hae r’oma via evaọ “Ẹme nọ Whọ rẹ Ta Kpahe Emagazini Na” ruiruo. Jọ ohwo kpobi o fi oke họ nọ ọ rẹ rọ ruẹrẹ oma kpahe ziezi re ọ sai se emamọ isẹri.

¹⁴ Ẹvẹ eva e rẹ were omai te re ma ru iruo evaọ otọ ọkpọvio Ọnowuzou ukoko na, Kristi Jesu, je wo uvẹ ọghọ nọ ma be rọ ghale ovuẹ Uvie na kugbe amọfa! Nọ amara ọ March gbe April o bi si kẹle na, wha j’oma wariẹ daoma re ma ru ai họ emerae nọ e mai woma kpobi nọ ma re ro se isẹri nọ ma bi yoẹme kẹ uzi Kristi re ma whowho je se emamọ isẹri na.

[Box on page 4]

Idhere Sa-sa Nọ A Re Ro Ru Ọkobaro Obufihọ Evaọ March gbe April 2003

Ẹdẹ Euwa

Ẹdọvo-Oka 1 2 — — 2 —

Edivẹ-Oka 1 — 3 — — —

Edesa-Oka 1 2 — 5 — —

Edene-Oka 1 — 3 — — —

Edisoi-Oka 1 2 — — — —

Ẹdẹ-Ọmaha 5 4 3 5 6 7

Ẹdoka 2 2 3 2 2 3

March 56 56 54 55 50 50

April 50 50 51 53 — —

Kọ ojọ evaọ usu omaa nana ọ sai w’iruo kẹ owhẹ?