Whowho Oruaro Jihova Nya Akpọ na Soso Wariẹ
1. Eme ọ be wọ omai whowho oruaro Jihova?
1 “O ra, O Ọnowo, oruaro, ogaga, gbe oro gbe obokparọ gbe udu-ogaga; keme e nọ e rọ obọ idhiwu gbe evaọ akpọ na e ra.” (1 Irv. 29:11) Ẹvẹ uyoyou gbe ovuhumuo nọ ma wo kẹ Jihova u bi kpomahọ omai? O be wọ omai whowho ‘iruo urirẹ ọnọ o se omai no ebi e ruọ eva elo ọnwranwra riẹ.’ (1 Pita 2:9) Ma sae se amọfa ba ẹvuẹ kpahe Ọghẹnẹ ologbo mai hi! Ma ti wo uvẹ obọdẹ nọ ma re ro whowho oruaro Jihova evaọ amara ọ Asa, Ane, gbe Asoi.
2. Usi-uwhowho obọdẹ vẹ a ruẹrẹhọ nọ ma te rọ vuẹ ahwo kpahe Ekareghẹhọ na, kọ amono a sae jariẹ wobọ?
2 Usi-Uwhowho Obọdẹ nọ Ma Ti ro Zizie Ahwo Ziọ Ekareghẹhọ Na: Eva Ẹdọvo-Oka, April 2, ma ti fielo họ oruaro Jihova ẹkwoma Emu Owọwọ Olori na nọ ma ti ru. A te jọ akpọ na soso ghale obe-uzizie obọdẹ orọ Ekareghẹhọ nana no March 17 rite April 2. Ma ta udu họ ahwo kpobi awọ re a wobọ vọvọ evaọ ewhowho na. Onana o te jọ uvẹ obọdẹ kẹ ahwo ọkpokpọ nọ a re ro mu usiuwoma ota họ otẹrọnọ a te. Who te wo emọ-uwuhrẹ Ebaibol hayo emọ obọra nọ who roro nọ a te epanọ a ro mu usiuwoma ota họ, whọ sae jọ ekpako na riẹ.
3. Eme ma rẹ sae ta ro zizie ahwo kẹ Ekareghẹhọ na?
3 Usi-uwhowho nana o te wọhọ onọ ma rọ vuẹ ahwo kpahe Ekokohọ Ubrotọ “Esiwo Ọ Kẹlino!” na. A ti vi ebe-uzizie buobu se ikoko na re owhowho-uvie ọvuọvo ọ sai wo te 50, ọkobaro ọvuọvo kọ 150. Ru ẹme ra kpẹkpẹe, whọ sae ta nọ: “Ma be rehọ obe-uzizie nana ro zizie owhẹ kẹ oware jọ nọ u wuzou gaga nọ ma re ru ẹsiẹvo ẹgbukpe. O te were omai ziezi whọ tẹ sae nyaze. A jọ obe-uzizie na dhesẹ oware nọ ma ti ru na vevẹ.” Rekọ otẹrọnọ ohwo na o wo enọ, raha oke jọ kugbei rọ za enọ na. Eme-ofiba nọ e ta kpahe Emu Owọwọ Olori na evaọ obe Ebaibol Wuhrẹ na nọ u muhọ evaọ ẹwẹ-obe avọ 206 na e sai fi obọ họ evaọ onana. Evaọ urere-oka, ma te hai fi emagazini ba obe-uzizie na kẹ ahwo. Daoma muẹrohọ ahwo nọ a dhesẹ isiuru je ru ọruẹrẹfihotọ epanọ who re ro zihe.
4. Ẹvẹ ma te rọ ghale ebe-uzizie Ekareghẹhọ na?
4 Oria nọ o jọ lọhọ, u fo re who fi obe-uzizie na họ obọ ohwo nọ who bi zizie na dẹẹ. Fikiere kere eria nọ whọ jọ di ahwo họ uwou hu fihotọ je ru epanọ who re ro zihe evaọ oke ofa. Ikoko nọ erai i gbe kiọkọ buobu a sae nyasiọ ebe-uzizie ba eria nọ a jọ di ahwo họ uwou hu evaọ oka urere taure Ekareghẹhọ na i te te, rekọ a re ru ere taure oka yena u te ti te he. Daoma ruẹ nọ whọ rehọ ebe-uzizie na kẹ ahwo ozihebro ra, emọ-uwuhrẹ Ebaibol, imoni, ibe iruiruo ra, ahwo nọ wha gbẹ rrọ ogbe, gbe amọfa nọ whọ riẹ.
5. Fikieme ma jẹ jọ enẹna mu omaa họ ẹma kẹ eruo ọkobaro obufihọ?
5 Ọkobaro Obufihọ: Kọ whọ sai wobọ vọvọ evaọ ewhowho oruaro Jihova ẹkwoma ọkobaro obufihọ nọ who re ru evaọ amara ọ Asa, Ane, gbe Asoi? Ẹsejọhọ ere oruo o te gwọlọ inwene jọ nọ who re ru evaọ omaa ikẹdẹ kẹdẹ ra. (Ẹf. 5:15-17) Jọ u mu owhẹ ẹro inọ oma nọ whọ rẹ dawo re who fiba iruẹru ra evaọ egagọ Jihova o rẹ wha oghọghọ gbe eghale Jihova ze. (Itẹ 10:22) Nọ ezi Ekareghẹhọ na o bi si kẹle na, enẹna họ oke nọ ma re ro mu oma họ ẹruẹrẹhọ.—Itẹ 21:5.
6. Eme ma sai wuhrẹ no oriruo oniọvo-ọmọtẹ ikpe 90 nọ o ru ọkobaro obufihọ evaọ ukpe nukpo ze?
6 Eva ukpe nukpo, oniọvo-ọmọtẹ jọ nọ ọ kpako te ikpe 90 no ọ re omaweromẹ ọkobaro obufihọ. Ọ ta nọ: “Dede nọ ẹkọ eware ọ rẹ were omẹ, yọ mẹ jẹ gwọlọ mu ekakọ họ, me vuhumu nọ u fo re mẹ rehọ eware nọ i wuzou rọ karo. Fiki isiuru nọ mẹ rọ gwọlọ rọ iruo Uvie na karo, mẹ tẹ jiroro nọ me re ru ọkobaro obufihọ evaọ amara Asa.” Kọ eghale jọ i te rie fiki ere oruo? Ọ ta haro nọ: “Onana o lẹliẹ omẹ si kẹle inievo nọ e rrọ ukoko na, o tẹ jẹ lẹliẹ omẹ si kẹle Jihova vi epaọ ọsosuọ.” Kọ u gbe fo re ma kiẹ eware nọ ma rọ karo riwi re ma ru inwene nọ i fo?
7. Kọ o rrọ bẹbẹ re a ru ọkobaro obufihọ?
7 Ẹnyate utee euwa 50 orọ iruo ọkobaro obufihọ o te nwane ga te epanọ who bi roro ho. Lẹ se Jihova kpahe iruẹru ikẹdẹ kẹdẹ ra, ma omaa, re who je kere onana kugbe omaa iruẹru abọ-ẹzi ra. Whẹ whọ mae riẹ iyero ra vi amọfa. Otẹrọnọ whọ be hae mọ yọ who wo ẹgba tere he, ẹsejọhọ whọ te sae jọ odibọgba na ru umutho euwa jọ kẹdẹ kẹdẹ. Otẹrọnọ whọ rrọ iruo oke-kpobi hayo who bi kpohọ isukulu, ẹsejọhọ whọ te sai ru ọkobaro obufihọ ẹkwoma usiuwoma nọ whọ rẹ nya evaọ owọwọ hayo urere-oka.
8. Eme o fi obọ họ kẹ ọzae avọ aye jọ ru ọkobaro obufihọ?
8 Iviuwou buobu a sai ru ọkobaro obufihọ no. Evaọ ikpe nọ e vrẹ, ọzae jọ avọ aye riẹ a jẹ gwọlọ fi obe họ kẹ iruo ọkobaro obufihọ họ fikinọ a roro nọ iyero rai e te kẹ ae uvẹ ru iruo na ha. Kọ eme a ru? A ta nọ: “Ma lẹ se Jihova re o fi obọ họ kẹ omai ru oware nana nọ ma gwọlọ nọ ma re ru ugbo anwẹdẹ na.” A nyate utee rai fiki omaa nọ a riẹ ma. A fibae nọ: “O, u woma kẹhẹ! Eghale nọ i te omai i wo umuo ho. Iroro nọ ma be jẹ k’owhẹ họ, dawo iẹe rri. Otẹrọnọ ma sai ru iruo na, ẹsejọhọ whọ te sai ru ei re.”
9. Eme wha rẹ sai ru evaọ uwuhrẹ uviuwou rai notha re wha ruẹrẹ oma kpahe kẹ emerae iruẹru obọdẹ nọ e be tha na?
9 Kọ wha gbẹ daoma fi oke họ evaọ etoke uwuhrẹ uviuwou rai notha re wha ta epanọ whai kpobi wha sai ro ru odibọgba rai kẹre evaọ emerae nọ e tha na? O tẹ make rrọ nọ uviuwou na kpobi o sai ru ọkobaro obufihọ họ, ẹsejọhọ omọvo jọ ọ sai ru ei nọ ahwo uviuwou na a tẹ thae uke. Hayo, nọ o tẹ lọhọ, uviuwou ra o sai fi utee họ re a jọ odibọgba na raha oke vi epanọ a be hai ru vẹre evaọ etoke emerae obọdẹ nana.
10. Fikieme ma jẹ vuẹ inievo efa kpahe isiuru nọ ma rọ gwọlọ jọ ezi Ekareghẹhọ na ru ọkobaro obufihọ?
10 Wha Fi Obọ họ kẹ Ohwohwo: Ohwo ọ rẹ whẹ ajọwha họ ohwo. Ta isiuru nọ whọ rọ gwọlọ ru ọkobaro obufihọ kẹ amọfa. Onana o sae ta udu họ amọfa awọ nọ a je fi obe họ. Ofariẹ re, ahwo nọ a ru ọkobaro no evaọ oke nọ u kpemu a sae jẹ iroro nọ i re fi obọ họ kẹ owhẹ ruẹrẹ iruẹru ra họ jẹ ma omaa nọ u re fi obọ họ kẹ owhẹ nyate utee ra. (Itẹ 15:22) Otẹrọnọ whọ sai ru ọkobaro obufihọ, kọ whọ gbẹ daoma zizie owhowho-uvie ọfa, ẹsejọhọ ohwo nọ iyero riẹ e wọhọ era, re o kuomagbe owhẹ evaọ iruo omawere nana?
11. Ẹvẹ ekpako na a sae rọ ta udu họ amọfa awọ re a ru ọkobaro obufihọ evaọ emerae n’etha na?
11 Ekpako ukoko buobu a re ru emamọ eruẹrẹfihotọ re a wobọ evaọ etoke iruẹru obọdẹ nana. (Hib. 13:7) Onana o rẹ ginẹ jọ oware ọbọga kẹ ukoko na! Ekpako na a rẹ rọ ẹmeunu rai bọ ajọwha họ amọfa. O sae jọ nọ umutho eme ọbọga hayo obọdẹ iroro nọ a rẹ jẹ kẹ ae ọvo họ oware nọ ejọ e gwọlọ re a sai ru ọkobaro obufihọ. Ẹsejọhọ ọsẹro usiuwoma ota na o ti ru ọruẹrẹfihotọ oma ukokohọ efa kẹ usiuwoma ota re ahwo kpobi a sai kpohọ isẹri-ise ogbotu, makọ nọ iruo i kuhọ no hayo nọ isukulu e tẹ fa no. U fo re a woro onana kẹ ukoko na n’oke t’oke. Ọsẹro usiuwoma ota na o ti je muẹrohọ nnọ te ebe gbe ẹkwotọ nọ o re te ahwo na kpobi ru ziezi e riẹ.
12. Eme whọ rẹ sai ru otẹrọnọ whọ sai ru ọkobaro obufihọ họ?
12 O tẹ make rrọ nọ iyero ra e gbẹ kẹ owhẹ uvẹ ru ọkobaro obufihọ họ, whọ sae ta udu họ ahwo nọ a fi obe họ awọ, jẹ sae lẹ roro ae. (Itẹ 25:11; Kọl. 4:12) Ẹsejọhọ whọ te sai ru ọruẹrẹfihotọ nọ ma re ro lele ai kpohọ usiuwoma ota evaọ ẹdẹ ẹkpoka na jọ hayo rria kri vrẹ epa anwẹdẹ.
13. Didi utee ma jọ Nigeria fihọ, kọ ẹvẹ ukoko rai o sae rọ zọhọ fihọ ẹnyate utee na?
13 Utee Ekobaro Obufihọ 30,000 Evaọ Amara Ane: Unu ekobaro obufihọ nọ e mae bu nọ ma jọ Nigeria wo no họ 23,002, yọ onana o jọ April 2003. Fikiere, ma rẹro nọ ma sai ti wo unu ekobaro obufihọ 30,000 evaọ amara Ane nọ ọ be tha na. Ma sae nyate utee nana otẹrọnọ omọvo eva iwhowho-uvie 9 evaọ ukoko kpobi a fi obe họ kẹ ọkobaro obufihọ. Ma riẹ nọ evaọ ikoko jọ, iyero iwhowho-uvie na o sae kẹ ai uvẹ wo ekobaro obufihọ vi unu nọ ma rẹro riẹ na. Utee nana yọ onọ ikoko buobu a rẹ sai le tobọ lọlọhọ. Dai roro oghọghọ nọ onana o rẹ wha se ukoko rai gbe ẹnyaharo nọ o rẹ wha fihọ iruo usiuwoma ota na evaọ ẹkwotọ rai!
14. Fikieme amara Ane ọ jẹ rrọ obọdẹ amara kẹ ọkobaro obufihọ?
14 Fikieme amara Ane ọ jẹ rrọ obọdẹ amara kẹ ọkobaro obufihọ? Ekareghẹhọ na o kie fihọ emuhọ amara na, yọ onana o te lẹliẹ omai jọ amara na gbe wo oke ziezi nọ ma re ro zihe bru ahwo kpobi nọ ma zizie ziọ Ekareghẹhọ na. Ma te hai fi emagazini na họ ada avọ ẹjiroro obe ọ Ebaibol Wuhrẹ na nọ ma ti fihọ ada kẹ ahwo nọ ma ti zihe bru, jẹ to ebe-iwuhrẹ Ebaibol họ. Fikiere, ọkobaro obufihọ nọ ma re ru evaọ amara Ane u ti rovie uvẹ buobu fihọ nọ ma rẹ rọ to ebe-iwuhrẹ Ebaibol họ. U te no ere no, amara Ane o wo Edoka isoi gbe edẹ ehọlide, nọ u ru rie lọhọ kẹ ahwo nọ a bi ruiruo egọmeti gbe enọ i bi kpohọ isukulu re a sai ru ọkobaro obufihọ.
15. Fikieme ma je wo iroro ovẹrẹ nọ ezi Ekareghẹhọ na o bi si kẹle na?
15 Ezi Ekareghẹhọ kpobi nọ ọ vrẹ yọ ma bi si kẹle urere eyero-akpọ nana. Oke nọ u kiọkọ nọ ma rẹ rọ vuẹ amọfa kpahe Ọghẹnẹ mai u tulo ho. (1 Kọr. 7:29) Nọ ezi Ekareghẹhọ nana ọ tẹ vrẹ no yọ obọdẹ uvẹ-ọghọ nọ ezi yena ọ kẹ omai nọ ma re ro jiri Ọsẹ obọ odhiwu mai o vrẹ no bẹdẹ bẹdẹ. Joma ma omaa fihọ nọ ma rẹ rọ dao ẹgba mai kpobi evaọ amara ọ Asa, Ane, gbe Asoi re ma whowho oruaro Jihova!
[Box on page 4]
Kọ Ma Sai Wo Ekobaro Obufihọ 30,000 Evaọ Amara Ane?
◼ Kiẹ eware nọ whọ rọ karo riwi
◼ Wha rọ utee na jiroro kugbe wọhọ uviuwou
◼ Ta kẹ ibe-Ileleikristi kpahe omaa ra