‘Se Isẹri Kpahe Emamọ Usi na Ziezi’
1. Emamọ usi vẹ ma wo nọ ma bi whowho?
1 Evaọ akpọ nọ a be kake jọ yo emamọ usi hi na, ma wo uvẹ-ọghọ nọ ma bi ro se “isẹri usiuwoma aruoriwo Ọghẹnẹ.” (Iruẹru 20:24) Emamọ usi nana o kẹre te ahwo nọ ma be vuẹ inọ “edẹ urere” nana i ti t’oba kẹle, akpọ ọkpokpọ Jihova nọ ẹrẹreokie ọ te vọ ọ vẹ te ze, oke yena yọ “eware anwae evrẹ no.” (2 Tim. 3:1-5; Evia. 21:4) Ẹyao ọ gbẹ te jariẹ hẹ. (Aiz. 33:24) Iyoyou mai nọ i whu no e vẹ te kparoma ze jẹ wariẹ kuomagbe iviuwou gbe egbẹnyusu rai. (Jọn 5:28, 29) Akpọ na soso o ti zihe ruọ aparadase owowoma. (Aiz. 65:21-23) Enana yọ umutho iriruo jọ erọ emamọ usi nọ ma bi whowho na!
2. Fikieme ezi Ekareghẹhọ na o jẹ rrọ obọdẹ ezi k’omai nọ ma rẹ rọ ta usiuwoma?
2 Amara ọ Asa, Ane, gbe Asoi e te k’owhẹ uvẹ obọdẹ nọ who re ro whowho emamọ usi na. Evaọ etoke emerae yena nọ oke o rẹ jọ ghraghraghra evaọ abọ akpọ na buobu na, o rrọ emamọ ezi nọ a sae rọ jọ odibọgba na raha oke ziezi. Ofariẹ, evaọ Ẹdẹ-Ọmaha, March 22 nọ ọre o te kiediwi no, a te jọ akpọ na so-so ru oware jọ nọ o mai wuzou evaọ ukpe na, oyehọ Ekareghẹhọ uwhu Olori na. Enẹna họ oke nọ ma re ro mu oma họ ẹruẹrẹhọ re ma jọ odibọgba na wobọ ziezi.
3. Eme o ti fiobọhọ kẹ ahwo uviuwou ru odibọgba rai kẹre?
3 Ọkobaro Obufihọ: Kọ whọ sae momaa re whọ rọ amara ọvo jọ, ivẹ, hayo esa ru ọkobaro obufihọ? Wha daoma rehọ omoke jọ rehọ onana jiroro kugbe evaọ uwuhrẹ uviuwou rai notha. Nọ whai kpobi wha tẹ jiroro na kugbe ziezi je bi fiobọhọ kẹ ohwohwo, o sai ru ei lọhọ nọ omọvo hayo unuahwo jọ evaọ uviuwou na a sai ro ru ọkobaro obufihọ. (Itẹ 15:22) Lẹ kpahe ẹme nana, whọ te ruẹ nọ Jihova ọ te ghale omodawọ ra. (Itẹ 16:3) O tẹ make rọnọ uvumọ ohwo ọ sae jọ uviuwou na ru ọkobaro obufihọ họ, ahwo uviuwou na kpobi a sai fi ugogo itee họ re a ru odibọgba rai kẹre ẹkwoma oma nọ a re kugbe ahwo nọ a bi ru ọkobaro kpohọ usiuwoma ota.
4. Ẹvẹ ma sae rọ ma omaa re ma ru ọkobaro obufihọ otẹrọnọ iruo mai e rẹ k’omai uvẹ tere he?
4 Whọ tẹ rrọ iruo nọ e rẹ k’owhẹ uvẹ tere he, emamọ omaa nọ whọ rẹ ma u ti fiobọhọ k’owhẹ ru ọkobaro obufihọ. O tẹ lọhọ, whọ sae rọ abọjọ etoke eriosehọ uvo ra rọ ta usiuwoma. Hayo whọ sae yare ẹkwotọ usiuwoma ota obọra kẹle uwou ra hayo oria iruo ra, re whọ sae jariẹ ta usiuwoma evaọ auwa ọvo hayo bu vrẹ ere taure who te mu iruo họ hayo nọ who te ku iruo họ no. Whọ sae jẹ jọ omaa ra ru uvẹ fihọ ẹkwoma eware nọ i wuzou tere he nọ whọ rẹ kpare kpohọ amara ọfa, gbe ẹkwoma usiuwoma nọ whọ rẹ ta no ohiohiẹ rite owọwọ evaọ urere-oka. Ahwo jọ a rẹ jọ oria iruo rai mi uvẹ ẹdẹ-ọvo hayo edẹ-ivẹ re a sae jọ odibọgba na wobọ ziezi.
5. Ẹvẹ whọ sai ro fiobọhọ kẹ enọ e kpako no hayo enọ oma rai o ga tere he re a ru ọkobaro obufihọ?
5 Otẹrọnọ whọ kpako no hayo oma ra o ga tere he, ẹsejọhọ whọ te sai ru ọkobaro obufihọ nọ whọ tẹ be hai ru umutho kẹdẹ kẹdẹ evaọ odibọgba na. Lẹ se Jihova re ọ k’owhẹ “ogaga ulogbo nọ othesiwa.” (2 Kọr. 4:7) Oniọvo-ọmọtẹ jọ nọ ọ kpako te ikpe 106 no ọ sai ru ọkobaro obufihọ! Ẹkwoma uketha nọ imoni riẹ nọ e rrọ ukoko na gbe inievo efa a kẹ riẹ, ọ ta usiuwoma no uwou ruọ uwou, ru izihebro, kpohọ ebe-iwuhrẹ Ebaibol, je wobọ evaọ abọfa odibọgba na. O fiobọhọ evaọ ẹtohọ ebe-iwuhrẹ Ebaibol kugbe imakpe. Ọ ta nọ: “Nọ me te roro kpahe uvẹ-ọghọ ulogbo nọ me wo nọ mẹ sai ro ru ọkobaro obufihọ, udu mẹ o rẹ vọ avọ uyoyou gbe uyere kẹ Jihova, Ọmọ riẹ, gbe ukoko Riẹ. O Jihova, me yere owhẹ!”
6. Ẹvẹ izoge nọ e họ-ame no nọ e gbẹ rrọ isukulu a sai ro ru ọkobaro obufihọ?
6 Otẹrọnọ whẹ yọ uzoge nọ ọ họ-ame no nọ ọ gbẹ rrọ isukulu, whọ sai fi obe họ re who ru ọkobaro obufihọ. Whọ sai ru oware nọ ahwo nọ iruo rai e rẹ kẹ ae uvẹ tere he a be hai ru, oyehọ urere oka nọ whọ rẹ ruẹrẹ họ kẹ usiuwoma ota vọvọ. Ofariẹ, whọ sae rọ auwa ọvo hayo bu vrẹ ere kpohọ usiuwoma nọ who te no isukulu ze evaọ edẹ jọ. Kọ oke ehọlide jọ o riẹ nọ whọ sai ro wobọ evaọ odibọgba na? Whọ tẹ gwọlọ ru ọkobaro obufihọ, vuẹ ọsẹgboni ra kpahe iẹe.
7. Eme ekpako ukoko e rẹ sai ru ro fi ajọwha họ ahwo kpobi oma evaọ ezi Ekareghẹhọ na?
7 Fi Ọwhọ họ Amọfa Oma: Ekpako ukoko a sae rọ oriruo rai ro fi ọwhọ họ amọfa oma evaọ ukoko na. (1 Pita 5:2, 3) A sae ma omaa omakugbe kẹ usiuwoma ota sa-sa fihọ kẹ ahwo nọ a ti kpohọ usiuwoma evaọ ohiohiẹ, nọ isukulu e tẹ fa no, hayo nọ iruo i te kuhọ no. Ọsẹro usiuwoma ota na ọ rẹ daoma ruẹ nọ a ta kẹ iwhowho-uvie nọ i te kpahotọ re a ru ewuhrẹ omakugbe kẹ usiuwoma ota, je muẹrohọ nnọ ebe gbe ẹkwotọ nọ i re te ahwo ru ziezi e riẹ evaọ etoke emerae iruẹru obọdẹ nana.
8. Eme ma wuhrẹ no oriruo ukoko jọ ze?
8 Evaọ ukoko jọ, ekpako na a muọ udu họ ẹtahọ ahwo awọ evaọ ẹruoke re a ru ọkobaro obufihọ. Koka koka a jẹ hai whowho kẹ ukoko na unu iwhowho-uvie nọ i fi obe họ no kẹ ọkobaro obufihọ. Onana o kẹ ahwo nọ a gwọlọ wobọ ziezi evaọ odibọgba na imuẹro inọ a wo ahwo buobu nọ a ti gbe ru iruo na kugbe. A ru ọruẹrẹfihotọ omakugbe kẹ usiuwoma ota kẹ ohiohiẹ gbe owọwọ kẹdẹ kẹdẹ. Onana o wha riẹ ze nọ iwhowho-uvie 53, enwenọ abọvo ukoko na, a ro ru ọkobaro obufihọ evaọ amara ọ Ane!
9. Fikieme ezi Ekareghẹhọ na o jẹ rrọ emamọ oke nọ ahwo nọ a te epanọ a rẹ rọ jọ iwhowho-uvie a re ro mu usiuwoma ota họ?
9 Fiobọhọ kẹ Amọfa Ta Usiuwoma: Nọ ahwo ọkpokpọ gbe emaha na a te te epanọ a re ro mu usiuwoma họ ẹta no, a sai dhe ai kugbe iwhowho-uvie nọ i wo onaa ziezi. Uvẹ utioye na o sae roma via evaọ ezi Ekareghẹhọ na nọ ibuobu evaọ ukoko na a te jọ odibọgba na wobọ ziezi na. Kọ who wo ọmọ-uwuhrẹ Ebaibol nọ o bi wo ẹnyaharo ziezi nọ o bi yeri uzuazọ riẹ lele itee ikiẹrẹe Jihova? Kọ who wo emọ nọ i wo emamọ uruemu nọ i bi wo ẹnyaharo rekiyọ a rrọ iwhowho-uvie he? Otẹrọnọ ahwo otiọye na a dhesẹ isiuru nọ a rọ gwọlọ jọ iwhowho-uvie nọ e re họ-ame he yọ who rri nọ a gine te, vuẹ ọkpako ukoko rai jọ. Ọsẹro ukoko na o ti ru ọruẹrẹfihotọ nọ ekpako ivẹ a ti ro lele owhẹ avọ ọmọ ra hayo ọmọ-uwuhrẹ ra na tẹme.
10. Eme ekpako na a rẹ sai ru ro fiobọhọ kẹ ahwo nọ a siọ iruo Uvie ba no?
10 Emerae nọ e be tha na e te jọ obọdẹ oke kẹ enọ e siọ iruo Uvie ba no re a wariẹ mu iruẹru Uvie na họ kugbe ukoko na. Esẹro Uwuhrẹ Obe Ukoko gbe ekpako efa a rẹ daoma ziezi re a weze bru ahwo otiọye na jẹ tuduhọ ae awọ inọ a gwọlọ nọ a gbe kpohọ usiuwoma kugbe. Otẹrọnọ u kri no nọ ohwo na ọ rọ siọ iruo Uvie na ba no, ekpako ivẹ a re lele iei tẹme tao sọ o gbe te ohwo nọ o re kpohọ usiuwoma ota.—km-IS 11/00 ẹwẹ. 7.
11. Eme họ odhesẹvia nọ ọ mae rro ọrọ “aruoriwo Ọghẹnẹ”?
11 Ruẹrẹ Oma Kpahe kẹ Ekareghẹhọ Na: Ẹtanigbo na họ odhesẹvia nọ ọ mae rro ọrọ “aruoriwo Ọghẹnẹ.” (Iruẹru 20:24) Ima ahwo buobu nọ i wo ovuhumuo kẹ onana a ti kokohọ evaọ Ẹdẹ-Ọmaha, March 22, nọ ọre o te kiediwi no re a ru ekareghẹhọ uwhu Kristi. Ma gwọlọ nọ ma re zizie je fiobọhọ kẹ ahwo nọ a wo evezi kpobi re a ziọ ekareghẹhọ obọdẹ nana nọ u se isẹri kpahe aruoriwo Jihova kẹ ahwo-akpọ.
12. Amono ma re zizie kẹ Ekareghẹhọ na?
12 Kere edẹ ahwo nọ whọ gwọlọ zizie họ otọ. Ababọ avro, usu ahwo nọ who ti kere na a te jọ imoni ra, erivẹ, ahwo iruo, ibe emọ-isukulu ra, emọ-uwuhrẹ Ebaibol ra nọ who je wuhrẹ kugbe vẹre gbe enọ who bi wuhrẹ enẹna, gbe amọfa kpobi nọ a rrọ izihebro ra. Otẹrọnọ ahwo jọ nọ who zizie a nọ enọ kpahe Ekareghẹhọ na, whọ sae rọ eme-ofiba nọ e ta kpahe Emu Owọwọ Olori na evaọ ẹwẹ-obe avọ 206-208 ọrọ obe Ebaibol Wuhrẹ na rọ kẹ ae uyo. Onana o sai tube rovie uvẹ obe-uwuhrẹ Ebaibol fihọ k’owhẹ, nọ orọnọ o te k’owhẹ uvẹ rehọ obe nọ ma re ro ru obe-uwuhrẹ Ebaibol ro lele ohwo na tẹme na.
13. Ẹvẹ Jihova ọ rọ ghale omodawọ iwhowho-uvie ivẹ jọ nọ a daoma ruẹ nọ a zizie amọfa kpohọ Ekareghẹhọ na?
13 Oniọvo-ọmọtẹ jọ o kere edẹ ahwo iviuwou 48 fihotọ nọ o re zizie. Nọ o te zizie ohwo no, o ve si usi họ odẹ na je kere ẹdẹ nọ o ro zizie iei na fihotọ. Eva e were e riẹ gaga nọ ọ ruẹ nọ ahwo 26 evaọ usu ahwo nọ o zizie na a ziọ Ekareghẹhọ na! Oniọvo-ọmọzae jọ nọ o wo uwou-eki o zizie ohwo jọ nọ o bi ru iruo kẹe nọ ọ jọ ozerẹ ichọche vẹre. Ọzae nana ọ ziọ Ekareghẹhọ na, ọ tẹ ta uwhremu na nọ, “Eware nọ me wuhrẹ no Ebaibol na ze evaọ auwa ọvo nana i vi eware nọ me wuhrẹ evaọ ikpe 30 soso nọ mẹ rọ jọ Ichọche Kathọlik.” Nọ a ru Ekareghẹhọ na no, ọ tẹ rọwo nọ a wuhrẹ Ebaibol kugbei, nọ a rọ obe Ebaibol Wuhrẹ na muhọ.
14. Didi uzizie u ti muhọ evaọ March 1 wariẹ akpọ-soso họ?
14 Epanọ Ma ti ro Whowho iei: Muhọ no Ẹdẹ-Ọmaha, March 1 rite March 22, ma te ghale obe-uzizie obọdẹ orọ Ekareghẹhọ na wariẹ akpọ-soso họ. Mai kpobi ma rẹ daoma ruẹ nọ ma wobọ vọvọ evaọ ẹghale obe-uzizie nana. O rẹ mai woma re whọ rọ obe-uzizie na họ ohwo obọ viukpenọ whọ rẹ nya siẹe ba unuẹthẹ. Rekọ otẹrọnọ ẹkwotọ rai ọ rrọ ruaro, ekpako na a sae jiroro sọ u fo re a rọ areghẹ nya siọ obe-uzizie na ba iwou nọ a di ahwo họ họ. Evaọ urere-oka, ma ti fi emagazini họ ada bae.
15. Oghẹrẹ vẹ ma sae rọ rehọ obe-uzizie na kẹ ohwo?
15 Fikinọ oke nọ ma te rọ ghale ebe-uzizie na u tulo ho, u re woma re ma ru ẹme mai kpẹre. Jọ sasasa avọ ajọwha. Whọ sae ta ẹme otiọnana: “Ma bi zizie owhẹ, ahwo uviuwou ra, gbe egbẹnyusu ra kpohọ ekareghẹhọ jọ nọ i wuzou gaga nọ ma ti ru evaọ March 22. Obe-uzizie ra ona. A jọ obe-uzizie na dhesẹ oware nọ ma ti ru na vevẹ.” Ohwo na ọ sai wo enọ. Hayo ọ sae rehọ obe-uzizie na jẹ ta nọ ọ te nyaze. Kere odẹ ohwo nọ o dhesẹ isiuru fihotọ je ru ọruẹrẹfihotọ nọ who re ro zihe.
16. Oriruo vẹ o dhesẹ epanọ u wuzou te re ma rọ obe-uzizie na ro zizie ahwo nọ e rrọ ẹkwotọ mai kpohọ Ekareghẹhọ na?
16 Evaọ ukpe nukpo, osoja jọ ọ jọ unuẹthẹ riẹ ruẹ obe-uzizie Ekareghẹhọ na. Ọ tẹ jiroro nọ ọ rẹ ziọ Ekareghẹhọ na, rekọ o gwọlọ nọ o re mi ọga riẹ uvẹ tao. Nọ o dhesẹ obe-uzizie na kẹ ọga riẹ, ọga na o te dhizu, kẹsena ọ tẹ ta nọ ọsẹgboni riẹ yọ Isẹri Jihova yọ ọ jẹ hai lele ai kpohọ iwuhrẹ. Nọ ẹdẹ na o te, orọnikọ ọga na ọ kẹe uvẹ nọ ọ nya ọvo ho, rekọ tei te ọga na a gbe kpohọ Ekareghẹhọ na!
17. Ẹvẹ ma sai ro dhesẹ nọ ma bi ku ẹjiroro aruoriwo Ọghẹnẹ fiẹ hẹ?
17 Dhesẹ Ovuhumuo: Nọ ezi Ekareghẹhọ ukpe 2008 na o bi si kẹle na, jomai kpobi ma roro kpahe aruoriwo nọ Jihova o wo k’omai. Pọl ukọ na o kere nọ: “Ma lẹ owhai re wha se aruoriwo Ọghẹnẹ ba e mi kufiẹ.” (2 Ahwo Kọrint 6:1) Ẹvẹ ma re ro dhesẹ nọ ma bi ku ẹjiroro aruoriwo Ọghẹnẹ fiẹ hẹ? Pọl o kere nọ: “Rekọ eva eware kpobi ma dhesẹ oma mai, wọhọ iruiruo Ọghẹnẹ.” (2 Ahwo Kọrint 6:4) Fikiere, ma re dhesẹ ovuhumuo mai kẹ okẹ Jihova nana ẹkwoma uruemu uwoma nọ ma re dhesẹ gbe usiuwoma na nọ ma rẹ ta avọ ajọwha. Ezi Ekareghehọ na o te k’omai obọdẹ uvẹ nọ ma re ro ru odibọgba mai kẹre, rọ ere se isẹri ziezi kẹ emamọ usi na.
[Etehe nọ e rrọ ẹwẹ-obe avọ 3]
Amono A rẹ Sai Ru Ọkobaro Obufihọ?
◼ Iviuwou
◼ Enọ i bi ru iruo nọ a re jo wo uvẹ tere he
◼ Enọ e kpako no gbe enọ oma rai o ga tere he
◼ Emọ-isukulu
[Etehe nọ e rrọ ẹwẹ-obe avọ 4]
Whọ tẹ be Ghale Obe-Uzizie Ekareghẹhọ Na:
◼ Ru ẹme ra kpẹkpẹe; tẹme avọ ajọwha
◼ Kere ahwo nọ a dhesẹ isiuru fihotọ je zihe bru ai oke ofa
◼ Fi emagazini họ ada evaọ urere-oka kpobi