Ruabọhọ Ewhowho Iruo Igbunu Jihova
1 Ohwo ọvo nọ ọ wọhọ Ọghẹnẹ ologbo mai, Jihova, ọ rrọ họ! Devidi o kere nọ: “Iruo ibuobu ra nọ who ru, O Ọnowo ỌGHẸNẸ mẹ, iruo igbenu who ru kẹ omai; a sae rehọ ọvuọvo wawo owhẹ hẹ!” (Ol. 40:5) Iruo igbunu Jihova e kẹre te ẹma ehrugbakpọ na, Uvie Mesaya na, iruo uyoyou-ẹwo kẹ ahwo riẹ, gbe iruo usiuwoma ota akpọ soso na. (Ol. 17:7, 8; 139:14; Dan. 2:44; Mat. 24:14) Uyoyou nọ ma wo kẹ Jihova gbe ovuhumuo nọ ma wo kẹ eware nọ o ru no o be wọ omai vuẹ amọfa kpahe iẹe. (Ol. 145:5-7) Evaọ March, April, gbe May, ma ti wo uvẹ nọ ma re ro ru onana viere.
2 Wọhọ Ọkobaro Obufihọ: Kọ whọ sae ruẹrẹ omaa ra họ re whọ jọ odibọgba na raha euwa 50 evaọ amara ọvo hayo bu viere eva usu emera iruẹru obọdẹ nana? U ti ghine te oware nọ who re ru enwene kẹ evaọ omaa iruẹru ra. (Ẹf. 5:16) Ibuobu e ruẹ no nnọ ọkobaro obufihọ o bi fi obọ họ kẹ ae wo ẹnyaharo evaọ odibọgba rai. Udu u re bru rae he nọ a tẹ nyate unuẹthẹ, yọ a be rehọ Ebaibol na ruiruo ziezi. Oke nọ a be raha ziezi evaọ odibọgba na u ru rie lọhọ kẹ ae re a nya lele isiuru kpobi nọ a ruẹ, yọ ahwo jọ nọ a ri ru obe uwuhrẹ Ebaibol vẹre he a mu ọvo jọ họ eru no nọ a bi ru ọkobaro obufihọ na. Fikinọ iruo ọkobaro e kẹre te oma nọ ma rẹ dawo gaga re ma fi obọ họ kẹ amọfa, e rrọ iruo nọ e rẹ kẹ evawere.—Iruẹru 20:35.
3 Whọ nwani ku ei họ vẹrẹ hẹ inọ iyero ra e be kẹ owhẹ uvẹ w’obọ họ. Ọkpako ukoko jọ nọ o ru ọkobaro obufihọ evaọ ukpe nukpo o wo emọ ivẹ gbe iruo nọ ọ rẹ jọ wo uvẹ hẹ. Ẹvẹ oniọvo nana nọ o re wo uvẹ hẹ na ọ sai ro ru ei? Nọ o re ru iruo evaọ ẹkpoka soso na, ọ tẹ maa omaa nọ ọ rẹ rọ ta usiuwoma okikpo evaọ edẹ urere-oka na, evaọ Ẹdẹ-Ọmaha ọ rẹ rọ isẹri-ise iyẹrẹ muhọ eva 7:00 a.m. Ahwo buobu nọ a wo iyero itieye na evaọ ukoko na a ru iruo ọkobaro re, yọ a tha omoma rai uke jẹ ta udu họ ohwohwo awọ. Evaọ ukoko ofa, oniọvo-ọmọtẹ jọ nọ ọ kpako te ikpe 99 no ọ jiroro nnọ o re ru iruo ọkobaro evaọ May nọ ọmọtẹ riẹ ọ ta kẹe no inọ o ku oma kugbei. Amọfa nọ a rrọ ukoko na a fi obọ họ kẹ oniọvo-ọmọtẹ nana nọ ọ kpako no na re ọ sae nya no ẹthẹ ruọ ẹthẹ je ru ebe iwuhrẹ Ebaibol ẹkwoma akaba-ọmo riẹ nọ a je tu kẹe. O je ru isẹri-ise ifonu, isẹri-ise iyẹrẹ, gbe ẹkwoma ileta ikere re. U mu rie ẹro inọ orọnikọ ẹgba riẹ ọ sai ro ru onana ha rekọ ẹkwoma obufihọ Jihova.—Aiz. 40:29-31.
4 Daoma kere omaa nọ o mai kiehọ iyero ra fihotọ. Omaa oriruo nọ o rrọ Odibọgba Uvie Mai nana o sai fi obọ họ kẹ owhẹ. Kọ who bi ru iruo nọ e rẹ lẹliẹ owhẹ wo uvẹ hẹ hayo kpohọ isukulu? Omaa nọ whọ rẹ ruerẹ họ re who kpohọ usiuwoma ota ziezi maero evaọ urere-oka na o sae jọ onọ o rẹ mai wiruo kẹ owhẹ. Otẹrọnọ who wo ẹbẹbẹ ẹyao yọ ẹgba ra o te epanọ whọ rẹ rọ jọ odibọgba na ruiruo oke krẹkri hi, ẹsejọhọ omaa nọ whọ rẹ maa re whọ raha umutho oke jọ kẹdẹ kẹdẹ evaọ odibọgba na o te mai kiehọ kẹ owhẹ. Ta isiuru ra nọ whọ rọ gwọlọ ru ọkobaro obufihọ kẹ amọfa. Ẹsejọhọ a ti ru ei fihọ ute rai re.
5 Idhere nọ Izoge A Sai ro Wo Abọ: Eva e rẹ were Jihova nọ emaha na e tẹ be ta kpahe iruo igbunu riẹ. (Ol. 71:17; Mat. 21:16) Whọ tẹ rrọ ọmaha nọ ọ họ-ame no, ẹsejọhọ whọ sai ru ọkobaro obufihọ eva amara nọ whọ rrọ ehọlide. Otẹrọnọ whọ sai ru ọkobaro obufihọ họ, kọ whọ sai fi uzedhe itee jọ họ nọ who re ro ru odibọgba ra kẹre je wo ẹnyaharo eva edhere usiuwoma ota ra evaọ emera nana? Otẹrọnọ whọ be hai lele ọsẹgboni ra kpohọ usiuwoma ota rekiyọ who ri te owhowho-uvie nọ ọ re họ-ame he, oke nana o te jọ emamọ oke nọ whọ rẹ rọ daoma re who te. Who du roro nọ whọ rẹ jọ ọgba evaọ enọ Ebaibol nọ whọ rẹ kuyo rai hayo riẹ wọhọ ekpako nọ e họ-ame no tao ho. Kọ who wo ugogo otoriẹ iwuhrẹ Ebaibol? Kọ who bi koko itee ẹfuọ uruemu Ebaibol? Kọ whọ gwọlọ nọ a riẹ owhẹ wọhọ omọvo Iseri Jihova? O tẹ rrọ ere, whọ ta onana kẹ ọsẹgboni ra. A rẹ sai ru ọruẹrẹfihotọ nọ whẹ avọ ae wha rẹ rọ nya bru ekpako na re a kiẹ riwi sọ who te.—Rri obe ọ Our Ministry na, ẹwẹ-obe avọ 98-99.
6 Obọ Ufihọ kẹ Amọfa re A Ta Usiuwoma: Emọ-Uwuhrẹ Ebaibol nọ i bi wo ẹnyaharo a sai te re a ku oma gbe omai wọhọ iwhowho-uvie evaọ etoke emera iruẹru obọdẹ nọ e rrọ obaro tha na. Otẹrọnọ who wo ọmọ-uwuhrẹ Ebaibol nọ o bi wo ẹnyaharo ziezi, gwọlọ obufihọ mi ọsẹro uwuhrẹ obe ukoko hayo ọsẹro usiuwoma ota ra. Omọvo rai jọ ọ sai ku oma gbe owhẹ evaọ uwuhrẹ na re ọ wawo ẹnyaharo ọmọ-uwuhrẹ na. Otẹrọnọ ọmọ-uwuhrẹ na o te, yọ o wo isiuru re ọ jọ owhowho-uvie, ọsẹro ukoko na ọ rẹ sae ruẹrẹ ekpako ivẹ efa họ re a lele owhẹ gbe ọmọ-uwuhrẹ na tẹme. (Rri Uwou-Eroro Na ọ Novẹmber 15, 1988 [ọrọ oyibo], ẹwẹ-obe avọ 17.) Nọ a tẹ nwani kuenu kẹ ọmọ-uwuhrẹ na no, mu ei họ ewuhrẹ evaọ odibọgba na ababọ oke oraha.
7 Esẹro uwuhrẹ obe ukoko a re fi ẹro họ otọ ziezi kẹ enọ e se iruo Uvie ba no hayo enọ e rrọ ẹdhigodo evaọ utu rai. Zizie ae re a lele owhẹ ru iruo evaọ odibọgba na. Otẹrọnọ a se iruo Uvie ba kri no, u re woma re ekpako ivẹ a lele ai tẹme re a ruẹ sọ a te. (Rri Ẹkpẹti Onọ evaọ Odibọgba Uvie Mai ọrọ November 2000.) Ajọwha ukoko na evaọ etoke emerae iruẹru obọdẹ nana o sae kpare isiuru rai re a wariẹ ru odibọgba na fihọ oware ikẹse kẹse evaọ uzuazọ rai.
8 Jọ Enẹna Ruẹrẹ Oma Kpahe kẹ Erukẹre Iruo: Ekpako, wha jọ oke nana muọ ajọwha họ ẹbọ họ iruo ọkobaro obufihọ evaọ ukoko na. Ẹkwoma eme uduotahawọ gbe oriruo ra, whọ rẹ sai ru abọ ologbo. (1 Pita 5:3) Ẹvẹ unu ekobaro obufihọ nọ ukoko na u wo vrẹ no u bu te? Kọ o sai bu viere evaọ ukpe nana? Esẹro uwuhrẹ obe ukoko gbe ethabọ rai a rẹ gwọlọ idhere nọ a rẹ rọ ta udu họ ahwo nọ a rrọ utu rai awọ re a ru iruo rai kẹre. Esẹro usiuwoma ota a sae ma omaa efa orọ iwuhrẹ kẹ usiuwoma ota. Jọ ukoko na riẹ evaọ ẹruoke kpahe ọruẹrẹfihotọ na. Muẹrohọ nnọ a rọ iwhowho-uvie nọ i te ziezi mu re a rọ ẹro te ahwo na, jẹ ruẹ nọ a muọ iwuhrẹ kẹ usiuwoma ota na họ evaọ ẹruoke je kuhọ evaọ ẹruoke. (Rri Ẹkpẹti Onọ ọrọ Odibọgba Uvie Mai ọrọ September 2001.) Ọsẹro usiuwoma ota na o re je ru ọruẹrẹfihotọ re ẹkwotọ, emagazini, gbe ebe nọ i re te ziezi e jariẹ.
9 Evaọ ukpe nukpo, ekpako ukoko jọ a rọ ajọwha muọ udu họ ẹta họ ahwo awọ evaọ ẹruoke re a muọ iruo ọkobaro obufihọ họ, yọ ibuobu rai a fi obe họ. A ru eruẹrẹfihotọ efa erọ iwuhrẹ kẹ usiuwoma ota—ọjọ eva 5:30 ohiohiẹ rọkẹ isẹri-ise iyẹrẹ, ọfa 3:00 uvo rọkẹ ahwo nọ a bi no isukulu ze, gbe ọrọ avesa kọ 6:00 owọwọ rọkẹ ahwo nọ a bi no iruo ze. Fibae, a ruẹrẹ iwuhrẹ kẹ usiuwoma ota esa fihọ kẹ Ẹdẹ-Ọmaha. Ahwo ukoko na nọ a fi obe họ kẹ ọkobaro obufihọ evaọ April a te bu te ahwo 66!
10 Kọ whọ gbẹ daoma re whọ jọ ewuhrẹ uviuwou rai nọtha fi itee nọ a rẹ sai le tobọ họ kẹ emera nọ e rrọ obaro tha na? Avọ emamọ omaa gbe ọrọwokugbe, ejọ hayo ahwo kpobi evaọ uviuwou na a te sai ru ọkobaro obufihọ. Otẹrọnọ oyena o gbẹ lọhọ họ, fi itee họ nọ whọ rẹ rọ ta usiuwoma kri vi epanọ who je ru vẹre hayo fiba unuẹse nọ who re kpohọ usiuwoma ota. Wha lẹ kpahe ẹme nana wọhọ uviuwou. O re sai mu owhẹ ẹro inọ Jihova ọ te ghale omodawọ rai.—1 Jọn 3:22.
11 Iruo Ọghẹnẹ nọ E Mai Gbunu: Odhesẹvia uyoyou Ọghẹnẹ nọ o mae rro kpobi họ Ọmọ riẹ nọ o vi ze wọhọ ẹtanigbo fiki mai. (1 Jọn 4:9, 10) Idhe ẹtanigbo na họ edhere nọ ọ nya lele uzi nọ a rẹ rọ ta ahwo-akpọ no igbo uzioraha gbe uwhu. (Rom 3:23, 24) Azẹ Jesu nọ o hwẹ o ru ọvọ ọkpokpọ na mu iruo họ, u ru rie lọhọ kẹ ahwo-akpọ sebaẹgba re a zihe ruọ emọ Ọghẹnẹ avọ irẹro inọ a ti su evaọ Uvie obọ odhiwu. (Jeri. 31:31-34; Mak 14:24) Mai wuzou, owojẹ Jesu orọ ẹmeoyo ọgbagba u ru odẹ Jihova fo. (Izie. 32:4; Itẹ 27:11) Eva Ẹdoka, April 14, nọ ọre o te kie diwi no, a ti ru Ekareghẹhọ uwhu Kristi wariẹ akpọ na soso họ.
12 Ekoko Emu Owọwọ Olori na o rẹ kpare iruo igbunu Jihova kpehru. Ẹme Ekareghẹhọ na ọ rẹ lẹliẹ otoriẹ gbe ovuhumuo mai rro haro kẹ oware nọ Jihova o ru nọ ọ rọ kẹ ẹtanigbo na. Ahwo nọ a dhesẹ isiuru nọ e nyaze a te sai muẹrohọ iruo igbunu efa Ọghẹnẹ. A te sae ruẹ okugbe avọ uyoyou oruọruọ nọ Jihova o wuhrẹ ahwo riẹ nọ a dhesẹ. (Ẹf. 4:16, 22-24; Jem. 3:17, 18) Ehaa obọdẹ nana nọ ohwo ọ rẹ jọ o rẹ sai kpomahọ iroro riẹ ziezi, fikiere ma gwọlọ nọ ahwo a nyaze buobu te epanọ o rẹ sae lọhọ te kpobi.—2 Kọr. 5:14, 15.
13 Ezizie Amọfa re A Jariẹ: Jọ oke nana muọ edẹ ahwo nọ whọ gwọlọ zizie họ ekere fihotọ. Who re kere edẹ ahwo uviuwou ra nọ a rrọ ukoko ho, erivẹ, egbẹrioma iruo hayo evaọ obọ isukulu, emọ obe-uwuhrẹ Ebaibol ra nọ who wo vẹre gbe erọ obọnana, gbe izihebro ra kpobi. Esẹro uwuhrẹ obe ukoko a re kere edẹ iwhowho-uvie nọ e se iruo Uvie ba no fihọ obe rai kugbe.
14 Rehọ obe uzizie Ekareghẹhọ nọ a kere na ro ru iruo, je kere oke gbe oria Ekareghẹhọ na fihọ iẹe vevẹ. Hayo whọ sae rehọ obe uzizie nọ o roma via evaọ uke Uwou-Eroro ọ April 1, 2004, hayo Awake! ọ March 22, 2004, na ro ru iruo. Nọ April 4 o bi si kẹle na, kareghẹhọ ahwo nọ who kere fihọ obe na, ẹkwoma eweze nọ who re weze bru ae hayo efonu nọ who re fonu rai.
15 Eva Ekareghẹhọ Na: Daoma kaki te obei evaọ aso Ekareghẹhọ na. Dhesẹ oma odederehọ ẹkwoma ahwo ọkpokpọ nọ who re yere ziezi. (Rom 12:13) Who wo obọdẹ owha-iruo kpahe erara nọ who zizie na. Ru oma sasa ae, je dhesẹ ae kẹ amọfa evaọ ukoko na. Whọ sae gwọlọ oria nọ o kẹle owhẹ kẹ ae re a keria. Otẹrọnọ ọjọ o wo Ebaibol hayo obe-ile he, ru ọruẹrẹfihotọ kẹe re o lele owhẹ hayo omọfa rri. Nọ ehaa na i te kuhọ no, jọ kugbe ai re whọ kuyo onọ kpobi nọ a te nọ. Otẹrọnọ onana họ orọ ọsosuọ nọ ejọ e rọ nya, nọ ae sọ a te gwọlọ gbe wuhrẹ kpahe Ẹme Ọghẹnẹ gbe ẹjiroro riẹ. Ta kẹ ae nọ whọ gwọlọ ru obe uwuhrẹ Ebaibol kugbe ai.
16 Ruabọhọ Obọ Ufihọ kẹ Ahwo nọ A Nyaze: Evaọ eka nọ i lele Ekareghẹhọ na, ahwo nọ a nyaze Ekareghẹhọ na a sae gwọlọ obufihọ ofa. Onana o kẹre te ahwo nọ a jẹ hai kpohọ iwuhrẹ ẹsikpobi rekọ enẹna a gbe bi ku oma gbe ukoko na ziezi hi. Ekpako na a re mu ẹro họ otọ ziezi re a ruẹ nọ a rri ahwo otiọye na vo vievie he, a rẹ nọ re a riẹ oware nọ o whaha ahwo nana nọ a gbe bi wo ẹnyaharo abọ-ẹzi hi. Ru ai vuhumu re a riẹ epanọ oke na o kpata te. (1 Pita 4:7) Fi obọ họ kẹ aikpobi re a ruẹ erere nọ o re no efihiruo uduotahawọ Ikereakere na nọ o ta nọ ma hai ku oma gbe ahwo Ọghẹnẹ ẹsikpobi na ze.—Hib. 10:24, 25.
17 Iruo Jihova i gbunu vi epanọ ma sai ro wo otoriẹ rai re he o tẹ make rọnọ ma rria bẹdẹ bẹdẹ. (Job 42:2, 3; Ọtausi. 3:11) Fikiere, ma re du eware nọ ma re ro jiri ei bẹ vievie he. Ma rẹ sae jọ ezi Ekareghẹhọ nana dhesẹ ovuhumuo mai kẹ iruo igbunu Jihova ẹkwoma oma nọ ma rẹ dawo re ma ru odibọgba mai kẹre.
[Study Questions]
1. Iruo igbunu Jihova jọ vẹ whẹ oma ra who rri ghaghae?
2. Ẹvẹ ma re ro wo erere kẹ omobọ mai ẹkwoma ọkobaro obufihọ?
3. Ẹvẹ ahwo jọ a sai ro ru ọkobaro obufihọ dede nọ a wo iyero ebẹbẹ?
4. Eware vẹ ma rẹ sai roro kpahe nọ ma tẹ be maa omaa re ma ru ọkobaro obufihọ?
5. Itee vẹ izoge e rẹ sai fihọ kẹ March, April, gbe May?
6. Ẹvẹ ma sai ro fi obọ họ kẹ emọ-uwuhrẹ Ebaibol re a sae jọ iwhowho-uvie emamọ usi na?
7. Ẹvẹ a sai ro fi obọ họ kẹ ahwo nọ a rrọ ẹdhigodo gbe enọ e se iruo Uvie ba no?
8, 9. Eme ekpako na e rẹ sai ru re a bọ ajọwha kẹ iruẹru ọbọdẹ na?
10. Ẹvẹ iviuwou e sae rọ ruẹrẹ oma kpahe re a ru odibọgba rai kẹre?
11. (a) Eware igbunu vẹ idhe Kristi i bi rugba? (b) Oke gbe oria vẹ a te jọ ru Ekareghẹhọ na?
12. Ẹvẹ ekpohọ Emu Owọwọ Olori na o sae rọ jọ erere kẹ ahwo nọ a dhesẹ isiuru?
13, 14. Amono ma re zizie kpohọ Ekareghẹhọ na, kọ eva oghẹrẹ vẹ?
15. Ẹvẹ ma sai ro dhesẹ oma odederehọ eva aso Ekareghẹhọ na?
16. Eme a rẹ sai ru ro fi obọ họ kẹ ahwo nọ a ziọ Ekareghẹhọ na re a wo ẹnyaharo abọ-ẹzi?
17. Fikieme ma jẹ ruabọhọ ewhowho iruo igbunu Jihova?
[Chart on page 5]
Kọ Whọ Sai Ru Ọkobaro Obufihọ Ẹkwoma Omaa Nana Jọ nọ Who Re ro Ruiruo?
March Su M* Tu* W* Th F Sa Aikpobi Amara
Ẹdẹ Kpobi 2 1 1 1 1 1 5 51
Edẹ Ivẹ 0 5 0 5 0 0 0 50
Urere-Oka 5 0 0 0 0 0 8 52
Urere-Oka gbe Edẹ Ivẹ Evaọ Oka 2 0 0 2 0 2 6 50
April Su M Tu W Th* F* Sa Aikpobi Amara
Ẹdẹ Kpobi 2 1 1 1 1 1 5 50
Edẹ Ivẹ 0 0 0 0 5 5 0 50
Urere-Oka 5 0 0 0 0 0 8 52
Urere-Oka gbe Edẹ Ivẹ Evaọ Oka 2 0 0 2 0 2 6 50
May Su* M* Tu W Th F Sa* Aikpobi Amara
Ẹdẹ Kpobi 2 1 1 1 1 1 4 51
Edẹ Ivẹ 0 5 0 0 0 0 5 50
Urere-Oka 3 0 0 0 0 0 7 50
Urere-Oka gbe Edẹ Ivẹ Evaọ Oka 2 0 0 2 0 2 5 51
* Isoi evaọ amara na