Wo Erere No Ewuhrẹ Obe ọ Si Kẹle Jihova na Ze
1 Eva Okokohọ Ubrotọ “Iwhowho Uvie Ajọwha” na, eva e were omai gaga nọ ma ro wo obe na Si Kẹle Jihova. Ahwo buobu a se obe na nọ o nwani te ai obọ. Ababọ avro, oma o wọ ibuobu re a ru ere fiki uzoẹme ẹgbukpe rọkẹ 2003 na: “Si kẹle Ọghẹnẹ, o re ti si kẹle owhẹ.”—Jem. 4:8.
2 Evaọ March ma ti mu obe ọ Si Kẹle Jihova na họ ewuhrẹ evaọ Uwuhrẹ Obe Ukoko. Ẹvẹ ma te sai ro wo erere ziezi no ewuhrẹ obe nana ze? Omaruẹrẹhọ o roja. Eka ivẹ a te hai ro wuhrẹ uzoẹme ovo, avọ umutho idhe-ẹme nọ a maa fihọ kẹ ewuhrẹ oka ovuovo. Onana o te lẹliẹ oke jariẹ nọ whọ rẹ rọ kẹ uvi iyo fikinọ whọ rọ oma totọ wuhrẹ je roro kpahe oria nọ a bi ti wuhrẹ na. Ofariẹ re, umutho idhe-ẹme jọ ọvo a te hai wuhrẹ evaọ oka nọ a te rọ kiẹ abọ urere uzoẹme kpobi riwi, re oke o ruẹse jariẹ nọ a rẹ rọ kiẹ obọdẹ abọ jọ nọ a ruẹrẹhọ obe na.
3 Muhọ no uzou avọ 2 na vrẹ, ẹkpẹti nọ o wo uzoẹme na “Enọ nọ A re Roro Kpahe” ọ roma via kẹle urere uzou kpobi. Nọ a te wuhrẹ edhe-ẹme urere uzou na no, ọsẹro uwuhrẹ obe ukoko na ọ vẹ rọ ẹkpẹti na jiroro kugbe utu na. Ọ te ta udu họ ahwo utu na awọ re a ta iroro rai, re a ta emamọ eware nọ a wuhrẹ ẹkwoma eroro kpahe Ikereakere na. (Itẹ 20:5) Fiba enọ nọ e rrọ ẹkpẹti na, ẹsejọ ọ te hae nọ enọ wọhọ: “Eme ovuẹ nana o ta kẹ owhẹ kpahe Jihova? Ẹvẹ u ro kpomahọ uzuazọ ra? Ẹvẹ whọ sae rọ rehọ iẹe fi obọ họ kẹ amọfa?” Ute riẹ o te jọ epanọ o re ro ru re ahwo utu na a kpahe eme no udu rai ze, orọnikọ ọ rẹ rehọ enọ esese nọ i wuzou tere he dawo utu na ha.
4 Obe ọ Si Kẹle Jihova na o rrọ oghẹrẹ-sa. Dede nọ ebe ‘ọrigbo nọ o wo ẹrọwọ avọ areghẹ na’ kpobi i bi jiri Jihova, ẹjiroro obe nana kpobi họ re o ta kpahe ekwakwa Jihova. (Mat. 24:45-47) Uvẹ-ọghọ nọ o rrọ omai aro na u gbunu kẹhẹ! Ma ti ghine wo erere no uvi uwuhrẹ kpahe ekwakwa Jihova ze vọvọ. Jọ uwuhrẹ na u fi obọ họ kẹ omai si kẹle Ọsẹ obọ odhiwu mai viere, yọ joma ruabọhọ amọfa nọ ma re fi obọ kẹ ziezi re a ru epaọvo na re.