Ma Ti Wuhrẹ Obe ọ Daji Uyoyou Ọghẹnẹ na Muhọ No Oka ọ April 21, 2014 Vrẹ
1. Ẹjiroro vẹ a ro kere obe ọ Daji Uyoyou Ọghẹnẹ na?
1 Ma be rọ ọwhọ rẹro oke nọ ma te rọ jọ Uwuhrẹ Ebaibol Ukoko wuhrẹ obe ọ Daji Uyoyou Ọghẹnẹ na muhọ no oka ọ April 21, 2014 vrẹ. Ileta nọ Ugboma Esuo na o kere se ohwo kpobi nọ o you Jihova nọ o rrọ ẹwẹ-obe avọ 3 evaọ obe na, o jọ obọ ukuhọ riẹ ta nọ: “U mu omai ẹro nọ obe nana u ti fi obọ họ kẹ owhẹ ruabọhọ nya lele oware nọ Ebaibol na e ta evaọ uzuazọ ra, jẹ rọ ere daji ‘uyoyou Ọghẹnẹ avọ irẹro uzuazọ ebẹdẹ bẹdẹ.’—Jud 21.”
2. Abọ sa-sa vẹ evaọ uzuazọ mai obe nana o te jọ fi obọ họ k’omai?
2 Eware nọ Ma re Rẹro Rai: Ẹvẹ ma sai ro fi izi Ebaibol họ iruo evaọ abọ usu, eware ẹkeriotọ, adhẹẹ rọkẹ udu-esuo, uruemu mai, orọo, ẹmeunu, gbe iruẹru akpọ na? Obe na u ti fi obọ họ kẹ omai nọ ma te rọ rehọ Ebaibol na wuhrẹ obroziẹ-iroro mai. (Ol. 19:7, 8) Nọ ma ti wuhrẹ epanọ Jihova o re rri eware na, onana o te lẹliẹ omai gwọlọ ru oreva riẹ, ma ve ti yoẹme kẹe evaọ kabọ kabọ uzuazọ mai.—Itẹ 27:11; 1 Jọn 5:3.
3. Fikieme ma jẹ daoma kuyo evaọ ewuhrẹ na koka koka?
3 Gbaemu nọ Whọ rẹ Kuyo: Whọ tẹ be ruẹrẹ oma kpahe, jọ o jọ utee ra inọ whọ rẹ jọ iraro ukoko na soso jiri Ọghẹnẹ. (Hib. 13:15) Ukoko na soso u ti wuhrẹ obe nana kugbe. Nọ orọnọ oria nọ ma te hai wuhrẹ u ti theri tere he na, o te k’omai uvẹ ruẹrẹ oma kpahe ziezi, jẹ kuyo evaọ uwuhrẹ na. Iyo ọbọga nọ e rrọ kpẹkpẹe nọ ma rẹ kẹ e te wọ amọfa dhesẹ uyoyou je ru iruo iwoma, yọ onana u ti ru ewuhrẹ na jọ sasasa jẹ kẹ inievo na kpobi erere. (Hib. 10:24) Ofariẹ, eva e te were omai viere nọ mai omomọvo ma te ta kpahe ẹrọwọ mai na.
4. Fikieme o jẹ r’oja re ma koko izi Ọghẹnẹ?
4 Aso urere taure Jesu o te ti whu, ọ ta nọ o r’oja re ma koko izi Ọghẹnẹ re ma sae daji uyoyou Ọghẹnẹ. (Jọn 15:10) Nọ ma bi ti wuhrẹ obe ọ Uyoyou Ọghẹnẹ na, ma te gbaemu inọ ma re fi izi Ebaibol họ iruo evaọ uzuazọ ikẹdẹ kẹdẹ mai, ma vẹ te ‘daji uyoyou Ọghẹnẹ.’—Jud 21.