Esẹro nọ E be k’Obaro—Iwuhrẹ ọ Uwuhrẹ Obe Ukoko
1 O rọ uvẹ-ọghọ ulogbo re ọkpako hayo odibo oruiruo nọ o te ziezi ọ jọ owuhrẹ ọ Uwuhrẹ Obe Ukoko. Re ọ rẹrote ẹgwọlọ abọ-ẹzi ahwo nọ a rrọ utu riẹ yọ owha-iruo ulogbo. Ọkwa-iruo riẹ o hẹriẹ oma kpohọ abasa.
2 Ọriẹwuhrẹ: O gwọlọ obọdẹ oma oruẹrẹkpahe re owuhrẹ ọ Uwuhrẹ Obe Ukoko na ọ sae kẹ utu na otoriẹ k’oka k’oka. Ọ rẹ daoma re ọ bọ ovuhumuo kẹ obe nọ a bi wuhrẹ na. Ukpenọ ọ rẹ kpahe eme thethei evaọ etoke ewuhrẹ na, nọ u te fo ọ rẹ nọ enọ ivevẹ ofiba re ọ sae rehọ igogo eme ewuhrẹ na lahwe. Use-abọ riẹ họ re o ru uwuhrẹ na siuru jẹ kẹ erere o ve je ru re ohwo kpobi o w’obọ evaọ ewuhrẹ na. Ẹjiroro riẹ họ re ọ bọ ae ga evaọ abọ-ẹzi, re o ru aghare uwuhrẹ na vevẹ, je ru ẹme na nyate iroro gbe udu rai.—1 Tẹs. 2:13.
3 Ẹruọsa nọ O re Fiobọhọ: Owuhrẹ ọ Uwuhrẹ Obe Ukoko na ọ “wọhọ oria nọ u sioma no ofou, oria nọ [u dhere] no ẹkporo.” (Aiz. 32:2) Ọ rẹ ghinẹ rẹrote ahwo kpobi nọ a rọ utu riẹ jẹ ruẹ nnọ okenọ ohwo jọ evaọ utu riẹ o te wo ewhrehe ọ rẹ rehọ obufihọ abọ-ẹzi kẹe.—Izik. 34:15, 16; 1 Tẹs. 2:7, 8.
4 Usiuwoma Ota Avọ Ọwhọ: Owuhrẹ ọ Uwuhrẹ Obe Ukoko na o re wo isiuru kpahe eruo ọruẹrẹkpahe obọdẹ rọkẹ ahwo kpobi nọ a rọ utu riẹ re a w’obọ vọvọ evaọ odibọgba na. Ọ rẹ k’obaro evaọ iruo usiuwoma ota na, riẹ nọ ọwhọ, osegboja, gbe ẹnyaze usiuwoma ẹsikpobi riẹ na o rẹ whaliẹ utu na soso. (Kọl. 4:17; 2 Tẹs. 3:9) U te te umuo jọ, ọ rẹ daoma lele omomọvo nọ ọ rrọ utu riẹ kpohọ usiuwoma. Ma tẹ gwọlọ wo ẹnyaharo evaọ ona ẹmeọta gbe ewuhrẹ mai evaọ odibọgba na, owuhrẹ ọ Uwuhrẹ Obe Ukoko na o re fiobọhọ k’omai nyate ute mai.—1 Tim. 4:16; 2 Tim. 4:5.
5 A ghinẹ rehọ ekẹ ọ ezae enana nọ u n’evaze re a k’omai obufihọ abọ-ẹzi gbe uketha uyoyou na rọ ghale omai. (1 Tẹs. 5:14) J’oma dhesẹ ovuhumuo mai kẹ ọruẹrẹfihọ ogbunu ọnana nọ o n’obọ Jihova ze na ẹkwoma abọ nọ ma re wo ẹsikpobi evaọ uwuhrẹ obe ukoko na gbe uketha ẹsikpobi mai rọkẹ iruo usiuwoma ota.—Hib. 10:25.