Ẹkpẹti Onọ

◼ Okevẹ u re ro fo re a wo utu Uwuhrẹ Obe Ukoko ofa?

A rẹ jiroro ọ emuhọ utu okpokpọ evaọ okenọ u te fo re oware wọhọ ima 15 hayo kpotọ viere a ruẹse jọ oria obe uwuhrẹ kpobi, te evaọ Ọgwa Uvie na. Fikieme ma jẹ jiroro nana?

Nọ ahwo nọ a rọ utu Uwuhrẹ Obe Ukoko a tẹ rọ kakao, o rẹ lọhọ kẹ owuhrẹ na viere re o muẹrohọ omomọvo nọ ọ be nyaze. Fibae, ohwo kpobi o re wo uvẹ ziezi re ọ kpahe fihọ enọ evaọ uyero nọ u fo kẹ ẹtavia ẹrọwọ rai. (Hib. 10:23; 13:15) Nọ a te wo utu osese evaọ eria sa-sa evaọ ẹkwotọ ukoko na u re ru ei lọhọ re a kpohọ Uwuhrẹ Obe Ukoko gbe omakugbe kẹ usiuwoma ota. Ikoko nọ i ru unu eria rai bu no a ruẹ no nọ eroro-kugbe unu ahwo nọ a bi kpohọ obe uwuhrẹ na u vihọ no re.

Ẹsejọhọ uyero obọdẹ jọ o sae jariẹ nọ u re ru ei re a wo utu ofa, o tẹ make rọnọ o te jọ kakao. Onana o sae jọ ere evaọ oria nọ u therabọ hayo nọ oria nọ a bi jo ru uwuhrẹ na o tẹ keke hrọ. Nọ o tẹ gwọlọ ere, a rẹ sai wo utu jọ nọ u re ru uwuhrẹ evaọ aruvo rọkẹ erere enọ e kpako no, enọ i bi ruiruo aso, hayo inievo-emetẹ nọ ezae rai a rọ Isẹri hi.

Utu obe uwuhrẹ kpobi u re wo iwhowho-uvie nọ e rrọ gaga evaọ abọ-ẹzi, nọ e rrọ jajaja jegbe owuhrẹ avọ osisase nọ i te ziezi. Inievo-emezae e rẹ fialoma via re a nyate ẹgwọlọ nana evaọ ukoko na.

Ekpako e rẹ sai fiba ẹnyaharo ukoko na ẹkwoma ẹromuhọ inọ ahwo nọ a rọ itu uwuhrẹ obe ukoko na a bu ga hrọ họ yọ a be rẹrote ae evaọ abọ-ẹzi ziezi gbe nnọ a bi kokohọ evaọ eria nọ i kiehọ oma. Oria nọ u jo w’iruo, a re mu utu okpokpọ họ re ohwo kpobi ọ sai wo irere ọ ọruẹrẹfihotọ abọ-ẹzi obọdẹ nana. Kọ whọ sae ruẹrẹ uwou ra họ kẹ oria obe uwuhrẹ? Ibuobu nọ i ru ere a ruẹ eghale abọ-ẹzi no.