Epanọ Ọruẹrẹfihotọ Uwuhrẹ Obe Ukoko na U Bi ro Fi Obọ họ kẹ Omai
1. Ẹvẹ iwuhrẹ isoi nọ ma wo evaọ ẹkpoka na i bi ro fiobọhọ kẹ omai?
1 Ẹjiroro gbe oghẹrẹ nọ ma re ro ru iwuhrẹ isoi nọ ma wo evaọ ẹkpoka na i wo ohẹriẹ. Ghele na, aikpobi na e roja evaọ obọ nọ i re fihọ k’omai ‘jaja erivẹ mai oma, re ma wo uyoyou, je ru iruo ezi kpobi.’ (Hib. 10:24, 25) Kọ eware jọ vẹ i ru ọruẹrẹfihotọ Uwuhrẹ Obe Ukoko na rrọ oghẹrẹ sa je wuzou?
2. Irere vẹ i re no oma nọ ma re kugbe evaọ utu uwuhrẹ obe ukoko na ze?
2 U Bi Fi Obọ họ kẹ Omai Wo Ẹnyaharo Abọ-Ẹzi: Wọhọ epanọ o rrọ, unu-ahwo nọ a re kpohọ uwuhrẹ obe ukoko o kawo gaga vi unu-ahwo nọ a re kpohọ iwuhrẹ efa nọ ma wo na. Onana u bi ru ei lọhọ nọ ma re ro mu usu kugbe ahwo nọ a rẹ bọ omai ga evaọ abọ-ẹzi. (Itẹ 18:24) Kọ whọ daoma re whọ riẹ ahwo kpobi nọ a rrọ utu uwuhrẹ obe ukoko rai no, hayo ta kẹ ai omomọvo no re wha gbẹ nyusu evaọ odibọgba na? Ọruẹrẹfihotọ uwuhrẹ obe ukoko na u re ru nọ ọsẹro utu na ọ rẹ rọ riẹ ugogo iyero omomọvo nọ ọ rrọ utu na, ọ vẹ jẹ kẹ ai uduotahawọ nọ u fo.—Itẹ 27:23.
3. Ẹvẹ ọruẹrẹfihotọ uwuhrẹ obe ukoko na o sai ro ru ei lọhọ kẹ emọ-uwuhrẹ Ebaibol kuomagbe omai jẹ kuyo?
3 Kọ who zizie emọ-uwuhrẹ Ebaibol ra re a lele owhẹ kpohọ uwuhrẹ obe ukoko no? Ahwo nọ a wo isiuru nọ a rẹ sae vuoma ekpohọ iwuhrẹ mai efa, ẹsejọhọ oma o te vo ae he re a kpohọ iwuhrẹ utu esese, maero nọ e rrọ Ọgwa Uvie he na. Fikinọ a jọ uwuhrẹ na riẹ ohwohwo, u re ru ei lọhọ kẹ emaha na gbe ahwo nọ a bi kuomagbe ukoko na obọ nọ a jẹ kuyo. Yọ nọ utu na o rrọ kakao na, ma wo uvẹ nọ ma rẹ rọ kuyo unuẹse buobu, jẹ rọ ere wha ujiro se Jihova.—Ol. 111:1.
4. Idhere vẹ ọruẹrẹfihotọ uwuhrẹ obe ukoko o sai ro kiehọ?
4 A re ru uwuhrẹ obe ukoko evaọ eria sa-sa nọ i kiehọ ahwo ukoko na oma evaọ ẹkwotọ na. Dede nọ o lọhọ re a dhe ahwo kpobi fihọ oria nọ o mae kẹle ai hi, ẹsejọhọ ekpohọ utu uwuhrẹ obe ukoko nọ a ghale omai fihọ o te nwani thabọ wọhọ ẹsenọ ma bi kpohọ iwuhrẹ ukoko mai efa ha. Oria uwuhrẹ obe ukoko o sai je kiehọ nọ a je kuomagbe kẹ usiuwoma ota.
5. Ẹvẹ ọsẹro uwuhrẹ obe ukoko na ọ sai ro fiobọhọ k’omai evaọ odibọgba na?
5 U Bi Fiobọhọ K’omai Evaọ Odibọgba Na: O rrọ isiuru ọsẹro uwuhrẹ obe ukoko re o fiobọhọ kẹ ahwo utu na kpobi kpohọ usiuwoma ẹsikpobi, je wo evawere evaọ odibọgba na. Fikiere, ọ rẹ daoma lele ohwo kpobi evaọ utu na kpohọ usiuwoma ota, fiobọhọ kẹ ae evaọ kabọ kabọ odibọgba na. Otẹrọnọ abọ odibọgba na jọ ọ rrọ ẹbẹbẹ k’owhẹ, wọhọ eru izihebro, vuẹ ọsẹro uwuhrẹ obe ukoko ra. Ọ sai ru ọruẹrẹfihotọ nọ who re ro lele owhowho-uvie ọfa nọ o wo ona ziezi evaọ utu na kpohọ usiuwoma. Nọ who te bi muẹrohọ emamọ ona ewuhrẹ nọ ọsẹro uwuhrẹ obe ukoko na o bi ro ru uwuhrẹ obe ukoko na, who ti wo ẹnyaharo evaọ ona nọ who re ro wuhrẹ amọfa.—1 Kọr. 4:17.
6. Fikieme ma jẹ daoma re ma wo erere no ọruẹrẹfihotọ uwuhrẹ obe ukoko na ze vọvọ?
6 Oghale nọ Uwuhrẹ Obe Ukoko na o rrọ o rro kẹhẹ! Ọruẹrẹfihotọ oyoyou nana nọ o no obọ Jihova ze na o re fiobọhọ k’omai yọrọ edikihẹ abọ-ẹzi mai evaọ etoke obẹbẹ nana nọ ma be rria na.—Ol. 26:12.