Epanọ Esẹro ọ Uwuhrẹ Obe Ukoko A Re Ro Dhesẹ Isiuru
1 A ruẹrẹ Uwuhrẹ Obe Ukoko na họ re u ru ei “lọhọ re a rẹrote orro abọ-ẹzi omomọvo viere. . . . Onana yọ odhesẹvia uyoyou-ẹwo Jihova gbe ẹruọsa owowou nọ o wo kẹ ahwo riẹ.” (om-E ẹwẹ. 75; Aiz. 40:11) Ọsẹro uwuhrẹ obe ukoko na o wo abọ ologbo evaọ ẹruorote otiọye na.
2 Eva Obọ Uwuhrẹ Obe Ukoko Na: Nọ a ru itu uwuhrẹ obe ukoko kakao avọ ẹjiroro na, ọsẹro uwuhrẹ obe ukoko na ọ rẹ sae riẹ ahwo nọ a rrọ utu riẹ ziezi. (Itẹ 27:23) Uvẹ o rẹ jariẹ nọ a re ro lele ohwohwo t’ẹme taure uwuhrẹ na u te ti muhọ gbe oke nọ u te kuhọ no k’oka k’oka. Bẹsenọ amara o re ro re, ọ rẹ sae t’ẹme kugbe enwene ohwo kpobi evaọ utu na. Onana u re fi obọ họ kẹ ahwo nọ a rrọ utu ọ uwuhrẹ obe ukoko na re a sai lele ei t’ẹme ababọ ozọ evaọ okenọ a tẹ rrọ ẹbẹbẹ hayo nọ a tẹ gwọlọ uduotahawọ.—Aiz. 32:2.
3 Ọsẹro uwuhrẹ obe ukoko na ọ rẹ daoma ta udu họ ahwo kpobi nọ a rrọ utu riẹ awọ re a w’obọ evaọ etoke uwuhrẹ na. Edhere jọ nọ o re ro ru onana họ ẹkwoma uwuhrẹ na nọ o re ru evaọ edhere ẹwo, gbe edhere owowolẹ. (1 Tẹs. 2:7, 8) Ọ rẹ gwọlọ idhere nọ ahwo nọ a rrọ ogbotu na, te emaha na kpobi a re ro duomahọ ẹmeọta na. Otẹrọnọ ozọ uyo okẹ u re mu ahwo jọ, ọ rẹ sai fi obọ họ kẹ ae evaọ obọ emu ẹkwoma ẹvuẹ nọ ọ rẹ vuẹ ae kpahe otọ re a se ikere jọ hayo re a kpahe fihọ ugogo edhe-ẹme jọ. Hayo ọ rẹ sai dhesẹ epanọ a rẹ rọ rehọ ẹme obọ rai kẹ iyo.
4 Otẹrọnọ ethabọ ọsẹro uwuhrẹ obe ukoko na yọ odibo oruiruo, ọsẹro utu na o re ru ọruẹrẹfihotọ re ethabọ na o ru uwuhrẹ na ẹsiẹvo evaọ emerae ivẹ kpobi. Onana o rẹ kẹ ọsẹro na uvẹ nọ o re ro muẹrohọ ethabọ na jẹ kẹ ehrẹ obufihọ. Onana yọ obọdẹ ọruẹrẹfihotọ nọ o re fi obọ họ kẹ inievo na re a nyaharo evaọ ona ewuhrẹ rai!—Tait. 1:9.
5 Evaọ Odibọgba Na: Ovo jọ evaọ ugogo ewha-iruo ọsẹro uwuhrẹ obe ukoko na họ re ọ k’obaro evaọ usiuwoma ota. (Ik. 27:16, 17) O re ru emamọ ọruẹrẹfihotọ kẹ isẹri-ise otu jẹ daoma fi obọ họ kẹ ahwo kpobi evaọ utu na re a wo oghọghọ evaọ odibọgba rai. (Ẹf. 4:11, 12) Re o le onana t’obọ, o re ru ei fihọ ute re o lele omomọvo evaọ utu na kpohọ usiuwoma. O re je ruiruo kugbe ọsẹro usiuwoma ota na re o ru ọruẹrẹfihọ kẹ ahwo nọ a gwọlọ ru ẹnyaharo evaọ abọjọ odibọgba rai re a wo uketha no obọ iwhowho-uvie nọ i wo ona ze.
6 Wọhọ Othuru-Igodẹ Oyoyou: Ọsẹro uwuhrẹ obe ukoko na o wo isiuru kpahe ahwo nọ a rẹ sai ru umutho ọvo evaọ iruo usiuwoma ota na fiki iyero rai. Ọ rẹ ruẹ nnọ ahwo nọ oma rai o ga tere he fiki owho hayo enọ ẹyao o kru fihọ uwou gbe enọ oma o ga ha evaọ ubroke fiki ẹyao ọgaga hayo omonwa, a riẹ kpahe ọruẹrẹfihotọ nọ ọ kẹ rae uvẹ nọ a rẹ rọ n’iyẹrẹ usiuwoma ota orọ iminiti 15 ọvo, otẹrọnọ a gbẹ sae n’iyẹrẹ auwa ọsoso evaọ amara ha. (Ogbẹgwae Iruo Ukoko na u re dhesẹ ohwo nọ o te kẹ ọruẹrẹfihotọ nana.) O re je wo isiuru kpahe ahwo nọ a dhe fihọ utu na nọ a siọ usiuwoma ota ba no, jẹ daoma fi obọ họ kẹ ae wariẹ mu iruo họ evaọ ukoko na.—Luk 15:4-7.
7 Ẹvẹ eva e be were omai te fiki isiuru uyoyou nọ esẹro uwuhrẹ obe ukoko a bi dhesẹ! Ẹruorote nọ a be kẹ na o re fi obọ họ kẹ ahwo ‘kpobi nyate okugbe orọwọ na, e ruọ owawọ orro orọ ẹvọvọ Kristi.’—Ẹf. 4:13.