Uwuhrẹ Obe Ukoko—Oware nọ Ma Rọ Gwọlọ iẹe
1 Evaọ 1895, Dawn Circles (Itu-Uwuhrẹ Ebaibol orọ Oke-Urieno) họ odẹ nọ a je se itu uwuhrẹ erọ Emọ-Uwuhrẹ Ebaibol na, wọhọ epanọ a jẹ hai se Isẹri Jihova evaọ oke yena. Iko-obe ọ Millennial Dawn a je ro ru iwuhrẹ na. Uwhremu na, a te muọ itu uwuhrẹ Ebaibol nana họ ese nọ Berean Circles (Itu Uwuhrẹ Ebaibol ọrọ Ahwo Bẹria). (Iruẹru 17:11) Ẹsibuobu ẹko umutho ahwo nana a re kokohọ iwou ahwo jọ evaọ owọwọ nọ u kiehọ utu na oma. Enẹ ọruẹrẹfihotọ Uwuhrẹ Obe Ukoko u ro muhọ.
2 Uduotahawọ gbe Uketha: Nọ itu uwuhrẹ obe ukoko e rẹ jọ kakao na, ahwo nọ a ziọ ewuhrẹ na a wo uvẹ ziezi nọ a rẹ rọ rehọ iyo nọ a be kẹ dhesẹ ẹrọwọ rai via. Oware nọ u re noi ze họ “oma osasọ kugbe eva orọwọ ovo.”—Rom 1:12.
3 Ẹro nọ ma re mu họ oghẹrẹ nọ ọsẹro uwuhrẹ obe ukoko na o bi ro wuhrẹ o sai fi obọ họ k’omai ‘yọrọ ẹme uzẹme na ziezi.’ (2 Tim. 2:15) Muẹrohọ oghẹrẹ nọ o bi ro fiẹgba họ epanọ Ikereakere na i ro kie kpahe oware nọ wha bi wuhrẹ na. Otẹrọnọ u fo rọkẹ obe nọ wha bi wuhrẹ na, ọ rẹ sai fielo họ igogo eme ẹkwoma Ebaibol na ọvo nọ o re ro ru eme ọkiẹkpemu ro kuhọ. Emamọ oriruo riẹ ọ rẹ sai fi obọ họ kẹ omai nọ ma jẹ jọ ona-uwuhrẹ mai evaọ odibọgba Oleleikristi na wo ẹnyaharo.—1 Kọr. 11:1.
4 U te no uwuhrẹ ẹkpoka nọ o re ru no, ọsẹro uwuhrẹ obe ukoko na ọ rẹ karo evaọ usiuwoma ota. Evaọ ọrọwokugbe-ọvo nọ avọ ọsẹro usiuwoma ota na a rẹ jọ, o re ru uvi ọruẹrẹfihotọ kẹ usiuwoma ota. Ọ rẹ daoma fi obọ họ kẹ ahwo utu na kpobi re a nyate owha-iruo Oleleikristi nọ a wo nọ a re ro whowho emamọ usi na je ru ilele.—Mat. 28:19, 20; 1 Kọr. 9:16.
5 Ọsẹro uwuhrẹ obe ukoko o wo isiuru abọ-ẹzi ahwo kpobi nọ a rrọ utu na. O re dhesẹ isiuru nana evaọ iwuhrẹ ukoko gbe okenọ o bi lele amọfa ruiruo evaọ odibọgba na. Ọ rẹ jẹ rehọ uvẹ nọ o ro weze bru inievo na evaọ obọ iwou rai rọ kẹ uduotahawọ abọ-ẹzi. O rẹ jọ ahwo kpobi oma sasasa re a nya bru ọsẹro uwuhrẹ obe ukoko na kẹ obufihọ abọ-ẹzi evaọ oke kpobi nọ a tẹ gwọlọ obufihọ.—Aiz. 32:1, 2.
6 Wha Bọ Ohwohwo Ga: Evaọ ekwotọ nọ a jọ fi awhaha họ iruo ahwo Ọghẹnẹ, inievo na a re kokohọ kugbe evaọ itu esese. Oniọvo-ọmọzae jọ ọ kareghẹhọ nọ: “Dede nọ a fi awhaha họ iruo Oleleikristi mai, oke kpobi nọ o tẹ lọhọ ma re ru iwuhrẹ ẹkpoka mai evaọ itu esese nọ ahwo na a rẹ jọ umuo 10 rite 15. Ma rẹ jọ iwuhrẹ na wo ẹgba abọ-ẹzi, rono uwuhrẹ Ebaibol mai gbe omakugbe mai nọ ewuhrẹ na ọ tẹ fa no ze. Ma rẹ ta eware nọ ma be rọ ẹro ruẹ via, yọ onana u fi obọ họ k’omai vuhumu nọ oghẹrẹ uye ovona mai kpobi ma rẹriẹ ovao dhe.” (1 Pita 5:9) Jọ mai kpobi, ma bọ ohwohwo ga ẹkwoma ọruẹrẹfihotọ Uwuhrẹ Obe Ukoko na nọ ma rẹ tha uke ziezi.—Ẹf. 4:16.
[Study Questions]
1. Ẹvẹ ọruẹrẹfihotọ Uwuhrẹ Obe Ukoko u ro muhọ?
2. Ẹvẹ ma sae rọ zọhọ fihọ “oma osasọ kugbe eva orọwọ ovo” evaọ uwuhrẹ obe ukoko?
3, 4. Ẹvẹ ọruẹrẹfihotọ uwuhrẹ obe ukoko na u re ro fiobọhọ k’omai ru odibọgba mai gba?
5. Uketha vẹ a rẹ sai wo tobọ ẹkwoma uwuhrẹ obe ukoko na?
6. (a) Ẹvẹ inievo mai nọ e rrọ ekwotọ efa a ro wo ọbọga no ẹkwoma ekokohọ kugbe evaọ itu esese? (b) Ẹvẹ whẹ oma ra who ro wo erere no ọruẹrẹfihotọ uwuhrẹ obe ukoko na ze no?