Epanọ Ma re ro Wo Erere no Utu Usiuwoma Ota Mai Ze
1. Irere Uwuhrẹ Obe-Ukoko na vẹ e gbẹ rrọ utu usiuwoma ota mai?
1 Kọ u wo eware jọ nọ e jẹ hae lẹliẹ Uwuhrẹ Obe Ukoko na were owhẹ? Itu na e jọ kakao nọ o whariẹ ze nọ whọ sae rọ kpahe ẹme ababọ udubro. Onana u ru rie lọhọ re ohwo o wo emamọ egbẹnyusu nọ e rẹ tuduhọ iẹe awọ. (Itẹ 18:24) Ọsẹro Uwuhrẹ Obe-Ukoko na ọ riẹ omai omomọvo ziezi, yọ ọ jẹ hae tuduhọ omai awọ nọ ma te wo ẹbẹbẹ jọ. (Itẹ 27:23; 1 Pita 5:2, 3) Irere nana e gbẹ rrọ utu usiuwoma ota mai.
2. Ẹvẹ ma sae rọ jọ utu mai wo egbẹnyusu nọ e rẹ tuduhọ omai awọ?
2 Go Kẹle Ahwo Utu Ra: Itu usiuwoma ota e gbẹ rrọ kakao wọhọ epanọ e jọ vẹre. Ma te bi “kuomagbe” ahwo utu mai kpohọ usiuwoma, ma ti wo usu okpekpe kugbe ai. (Fil. 1:27) Bro ahwo who lele kpohọ usiuwoma no evaọ utu ra? Kọ amọfa a gbẹ riẹ nọ who ri lele nya ha? (2 Kọr. 6:13) Ma sae jọ utu mai zizie ohwo jọ ẹsejọ re o kuomagbe omai evaọ Egagọ Uviuwou mai hayo emuọriọ. Evaọ ikoko jọ, nọ oniọvo jọ o te no ẹwho ọfa ze ti ruẹme evaọ ukoko rai, a rẹ ghale ẹruorote riẹ fihọ itu na. Evaọ oka nọ a ghale kẹ ae, utu na u re kokohọ kẹ emuọriọ gbe uduotahawọ, te ọrara rai na o ti kuomagbe ai hayo o ti kuomagbe ai hi.
3. Ẹvẹ o sae rọ lọhọ re a tuduhọ iwhowho-uvie nọ e rrọ itu usiuwoma ota awọ?
3 Dede nọ edivẹ ọvo ma be hai kpohọ ewuhrẹ enẹna, orọnikọ onana u dhesẹ nọ a sino oke nọ a rẹ rọ tuduhọ inievo na awọ họ. A rehọ esẹro utu mu re a tuduhọ iwhowho-uvie nọ e rrọ utu rai, je wuhrẹ ai onaa usiuwoma ota. Otẹrọnọ ọsẹro utu ra o ri lele owhẹ kpohọ usiuwoma ota ha, ta kẹe inọ whọ gwọlọ nọ whẹ avọ iẹe a gbe kpohọ usiuwoma. U te no ere no, ọsẹro usiuwoma o re kuomagbe utu kpobi ẹsiẹvo amara kpohọ usiuwoma evaọ Ẹdẹ-Ọmaha gbe Ẹdoka. Evaọ ikoko nọ i wo itu bu hu, ọ sai kuomagbe utu kpobi isiava ẹgbukpe. Kọ whọ be hae gbobọnẹ eware jọ re who kpohọ usiuwoma nọ ọ tẹ nyaze utu ra?
4. (a) Ẹvẹ a re ro kokohọ kẹ usiuwoma? (b) Fikieme ma rẹ rọ kuvẹ re a kokohọ uwou mai?
4 O rẹ mai woma re utu kpobi u kokohọ oria riẹ sa kẹ usiuwoma evaọ Ẹdẹ-Ọmaha gbe Ẹdoka. A te bi kokohọ ọvuọ oria riẹ, je kokohọ oke ọvona na, u re ru ei lọhọ kẹ inievo na re a sai te oria nọ a bi kokohọ vẹrẹ je te ẹkwotọ rai vẹrẹ. A rẹ sae ghale ahwo vẹrẹ, je kpohọ usiuwoma ababọ oke oraha. U re je ru ei lọhọ kẹ ọsẹro utu na re ọ rẹrote ahwo nọ e rrọ utu riẹ. Ghele na, oware jọ o sae whae ze nọ itu ivẹ hayo bu viere a re ro kuomagbe. Otẹrọnọ ukoko na kpobi a re kuomagbe evaọ Ẹdẹ-Ọmaha ọsosuọ amara hayo nọ a te ru Uwuhrẹ Uwou-Eroro no, o rẹ mai woma re utu kpobi o keria oria riẹ sa, a vẹ kẹ esẹro itu na uvẹ nọ a rẹ rọ ghale ahwo utu rai re a tẹ te rọ olẹ kuhọ.—Rri ẹkpẹti na “Kọ Whọ Sae Kuvẹ re A Kokohọ Uwou Ra?”
5. Dede nọ Uwuhrẹ Obe-Ukoko ọ gbẹ riẹ hẹ, irere vẹ ma gbe bi wo?
5 Dede nọ Uwuhrẹ Obe-Ukoko ọ gbẹ riẹ hẹ, Jihova o gbe bi fi obọ họ kẹ omai ru oreva riẹ. (Hib. 13:20, 21) Fikiere oware ovo o kare omai hi. (Ol. 23:1) Ma rẹ jọ utu usiuwoma mai wo irere buobu. Ma te bi ru ẹkabọ mai jẹ “kọ buobu,” ma te “kọrọ buobu.”—2 Kọr. 9:6.
[Ẹkpẹti nọ o rrọ ẹwẹ-obe avọ 6]
Kọ Whọ Sae Kuvẹ re A Kokohọ Uwou Ra?
Evaọ ikoko jọ, itu na kpobi a re kokohọ oria ọvo evaọ Ẹdẹ-Ọmaha gbe Ẹdoka keme iwou nọ a re kokohọ i bu hu. Omakugbe kẹ usiuwoma ota yọ ọruẹrẹfihotọ ukoko na, fikiere onana yọ ọghọ ologbo kẹ oniọvo nọ ọ kuvẹ re a kokohọ uwou riẹ. Kọ whọ sae kuvẹ re a kokohọ uwou ra? Whọ tẹ gwọlọ nọ a hai kokohọ uwou ra, vuẹ ọsẹro utu ra. Who roro nọ uwou ra u woma te he he. Ekpako na a ti rri oria nọ uwou ra o rrọ gbe eware efa nọ a jẹ hai roro kpahe okenọ a jẹ salọ iwou nọ a re kokohọ kẹ Uwuhrẹ Obe-Ukoko na.