Ewuhrẹ Omakugbe kẹ Usiuwoma Ota
1. Fikieme o jẹ r’omai oja re ma kpohọ usiuwoma ota evaọ edhere ọkpakpatiẹ?
1 Jesu o fi oriruo h’otọ ọrọ epanọ a sai ro ru iruo usiuwoma ota na ziezi evaọ edhere ọkpakpatiẹ. Ere ọvona o rrọ isiuru enọ e be rọ ẹro te iruo usiuwoma ota akpọ soso na nẹnẹ re a ru iruo nana kpatiẹ ziezi. Be nya lele edhere ọvo nana, ikoko nọ e rrọ akpọ na soso a be rọ ẹkwoma iwuhrẹ kẹ usiuwoma ro koko iwhowho-uvie họ kẹ usiuwoma ota.—Mt 24:45-47; 25:21; Luk 10:1-7.
2. Eme a re ru evaọ ewuhrẹ omakugbe kẹ usiuwoma ota?
2 Emamọ Ọruẹrẹfihotọ: A rẹ jọ iwuhrẹ kẹ usiuwoma ota kẹ uduotahawọ, ta kpahe oghẹrẹ onaa sa-sa nọ a rẹ rọ ta usiuwoma, jẹ kẹ ahwo nọ a bi kpohọ usiuwoma ota ekpọvio epanọ a rẹ nya. A sae rọ omoke kpẹkpẹe se ikere okpẹdẹ na nọ u te kiekpahe odibọgba na. Evaọ ẹsejọ, ọnọ ọ be wha ahwo kpohọ usiuwoma ota na ọ rẹ rehọ igogo eme jọ no Odibọgba Uvie Mai, omobe ọ Epanọ A ro Muhọ Jẹ Ruabọhọ Ebaibol E rọ Jiroro, obe Reasoning na, hayo obe Isukulu Odibọgba na ze rọ kareghẹhọ ahwo nọ a bi kpohọ usiuwoma ota evaọ ẹdẹ yena. A sai je ru odhesẹvia ọkpẹkpẹe ọrọ epanọ a re ro fi obe nọ a bi fihọ ada evaọ amara yena họ ada. A sae lẹ olẹ ekuhọ na taure a tẹ te ghale ahwo gbe ẹkwotọ nọ a te jọ ta usiuwoma, hayo nọ a tẹ lẹ olẹ ekuhọ na no. Ohwo kpobi ọ rẹ riẹ ohwo nọ a dhe rie kugbe, gbe ẹkwotọ nọ a be te jọ ta usiuwoma. Nọ a te ru ewuhrẹ omakugbe kẹ usiuwoma ota nọ u re lehie vrẹ iminiti 15 ho na no, ọvuọ ẹkwotọ riẹ o ve kpohọ ababọ oke-oraha.
3. Amono a wo owha-iruo nọ a re ro ru ọruẹrẹfihotọ iwuhrẹ omakugbe kẹ usiuwoma ota?
3 Oghẹrẹ vẹ A re ro Ru Ọruẹrẹfihotọ Na? Ọsẹro usiuwoma ota na o wo owha-iruo nọ o re ro ru ọruẹrẹfihotọ kẹ iwuhrẹ omakugbe kẹ usiuwoma ota. Esẹro itu usiuwoma hayo ethabọ rai a wo owha-iruo nọ a rẹ rọ wha itu rai kpohọ usiuwoma evaọ urere-oka. Ekpako hayo idibo iruiruo a sai kuomagbe itu sa-sa kpohọ usiuwoma evaọ udevie-oka. Esẹro itu a re ruiruo kugbe ọsẹro usiuwoma ota na kpekpekpe re a ruẹ nọ ẹkwotọ usiuwoma ota nọ o re te utu rai ru ziezi evaọ urere-oka ọ riẹ. Evaọ udevie oka na, ọsẹro usiuwoma ota na o re ru ọruẹrẹfihotọ ahwo nọ a rẹ wha itu na kpohọ usiuwoma ota.
4-6. (a) Fiki ẹjiroro vẹ a rẹ rọ jọ eria sa-sa kuomagbe kẹ iwuhrẹ usiuwoma ota evaọ ẹkwotọ ukoko? (b) Eme a re roro kpahe rọ jiroro eria nọ a je kuomagbe kẹ usiuwoma ota?
4 Oke gbe Oghẹrẹ Oria vẹ A rẹ Jọ Kuomagbe? Orọnikọ ukoko na soso u re kokohọ oria ovona ha, rekọ u re woma re a jọ eria sa-sa nọ i kiehọ evaọ ẹkwotọ na ru iwuhrẹ omakugbe nana, mai kiehọ kọ iwou inievo na avọ ẹjiroro ẹkwotọ ukoko na nọ wha re ru ziezi. A rẹ sae jọ Ọgwa Uvie kuomagbe re. Ikoko buobu a rẹ jọ Ọgwa Uvie ru uwuhrẹ omakugbe kẹ usiuwoma ota na nọ a tẹ nwani ru ewuhrẹ ovuẹ ogbotu gbe ọrọ Uwou-Eroro na no. A rẹ daoma ruẹ nọ oria nọ a bi kokohọ na u thabọ no ẹkwotọ nọ a be te jọ ta usiuwoma evaọ ẹdẹ yena ha. N’oke ruoke, a rẹ kiẹ ọruẹrẹfihotọ rai riwi re a ruẹ nọ eria nọ a be jọ kuomagbe i kiehọ kẹ iwhowho-uvie na nọ a be sae rọ jọ ẹkwotọ na soso ta usiuwoma ziezi.
5 Nya lele oghẹrẹ nọ ẹkwotọ na ọ rrọ, a rẹ rọ jiroro kpahe oke nọ o mai woma nọ a re ro ru iwuhrẹ usiuwoma ota na gbe unuẹse nọ a re ru iwuhrẹ na evaọ ẹkpoka hayo evaọ okpẹdẹ. Enọ nọ e rrọ obotọ na i re fi obọ họ k’owhai jiroro oria gbe oke nọ o mai kiehọ nọ a re ro ru iwuhrẹ omakugbe kẹ usiuwoma ota.
6 Ẹkwotọ vẹ o gwọlọ nọ a re gbe jo ruiruo ziezi? Oke vẹ o mai kiehọ nọ a sae rọ jariẹ ta usiuwoma nuwou ruọ uwou? Kọ owọwọ u kiehọ kẹ usiuwoma nuwou ruọ uwou manikọ ozihebro? A re fi omaa usiuwoma ota kpobi họ ebọdo evuẹ ukoko na. O rrọ isiuru mai iwhowho-uvie kpobi re ma jọ ẹkwotọ mai ta usiuwoma ziezi te epanọ ma sae rọ ta wọhọ Pọl ukọ na inọ, mẹ jọ ekwotọ mẹ kpobi ta usiuwoma na no.—Rom. 15:23.
7. Owha-iruo vẹ oniọvo nọ ọ be wha ahwo kpohọ usiuwoma ota o wo?
7 Eru Iwuhrẹ Omakugbe kẹ Usiuwoma Ota: Oniọvo nọ o bi ti ru uwuhrẹ nana o re dhesẹ adhẹẹ kẹ ọruẹrẹfihotọ Ọghẹnẹ nana ẹkwoma oma nọ ọ rẹ ruẹrẹ kpahe ziezi. A re mu uwuhrẹ na họ ẹruoke, yọ u re theri vrẹ iminiti 10 rite 15 ho. Ọnọ o bi ru uwuhrẹ na ọ rẹ riẹ ẹkwotọ nọ a be te jọ ta usiuwoma taure uwuhrẹ na u te ti muhọ. Dede nọ a rẹ hẹrẹ ahwo nọ a te nyaze whremu hu, a sae vuẹ uwou kpahotọ hẹrẹ ae kpahe ofẹ nọ utu na u ro kpohọ usiuwoma. Nọ uwuhrẹ omakugbe kẹ usiuwoma ota na o tẹ nwani kuhọ no, ahwo na kpobi a re kpohọ ọvuọ ẹkwotọ riẹ ababọ oke-oraha. Ababọ avro, uwuhrẹ omakugbe kẹ usiuwoma ota nọ a ruẹrẹ kpahe je ru ziezi u re fi obọ họ kẹ ahwo kpobi nọ a ziọ usiuwoma evaọ ẹdẹ yena.—Itẹ 11:14.
8. Idhere jọ vẹ iwhowho-uvie e sae rọ nya lele ọkpọvio inievo nọ e be wha ahwo kpohọ usiuwoma ota?
8 Uwuhrẹ Omakugbe kẹ Usiuwoma Ota nọ A rẹ Jọ: Ẹnya lele ọkpọvio ọ r’oja. (Hib. 13:17) Ọnọ ọ be wha ahwo kpohọ usiuwoma ota na ọ te ghale ahwo utu na. U re woma re iwhowho-uvie nọ i wo onaa usiuwoma ota ziezi a jariẹ re a fi obọ họ kẹ iwhowho-uvie ekpokpọ gbe enọ i wo onaa tere he. Iwhowho-uvie sa-sa nọ ma re gbe kpohọ usiuwoma o rẹ wha irere buobu ze. (Itẹ 27:17; Rom. 15:1, 2) Ohwo kpobi ọ rẹ daoma re ọ nyaze ẹruoke. Adhẹẹ nọ ma re dhesẹ kẹ ọruẹrẹfihotọ nana nọ Ọghẹnẹ o ru na gbe ororokẹ rọkẹ ibe Ileleikristi mai o rẹ wọ omai ru inwene nọ i fo kpahe onana.—2 Kọr. 6:3, 4; Fil. 2:4.
9. Evaọ obọdẹ idhere vẹ ekobaro a sae rọ tha ọruẹrẹfihotọ nana uke?
9 Uketha Ekobaro: Iwuhrẹ omakugbe kẹ usiuwoma ota nọ ekobaro i re kuomagbe u wuzou jẹ vọ avọ uduotahawọ. Avro ọ riẹ hẹ inọ ekobaro i wo ewha-iruo buobu. U te no ebe-iwuhrẹ Ebaibol gbe izihebro nọ a re ru no, owha-iruo uviuwou gbe orọ okọ rai e sae jọ abọjọ omaa okpẹdoke rai. Fikiere, ekobaro a rẹ rehọ iẹe wọhọ ọgbahọ họ inọ a rẹ jọ uwuhrẹ omakugbe kẹ usiuwoma ota kpobi nọ ukoko rai u ru, maero nọ iwuhrẹ nana e tẹ be jọ kẹdẹ kẹdẹ. O make rrọ ere na, ekobaro a rẹ daoma re a jariẹ evaọ iwuhrẹ omakugbe nana jọ koka koka. Iwuhrẹ omakugbe kẹ usiuwoma ota i re fi obọ họ wuhrẹ iwhowho-uvie, yọ eriariẹ ekobaro e sae jọ obufihọ ulogbo kẹ amọfa. Usiuwoma nọ a be hae nya ẹsikpobi na o lẹliẹ e rai wo onaa ziezi no evaọ odibọgba na. A sae rọ enana fi obọ họ kẹ amọfa. Ekobaro a rrọ uvi oriruo kẹ amọfa fiki ajọwha rai evaọ odibọgba na gbe iwuhrẹ omakugbe kẹ usiuwoma ota nọ a be hae jọ ẹsikpobi. Obọ nọ a be hai wo evaọ iwuhrẹ omakugbe kẹ usiuwoma ota na o da omai kpobi ẹro fia.
10. Fikieme u je fo re iwhowho-uvie kpobi a tha ọruẹrẹfihotọ nana uke vọvọ?
10 Wọhọ epanọ o jọ kẹ Jesu avọ ilele riẹ na, ẹkwoma usiuwoma nuwou ruọ uwou na ma be mai ro ru iruo usiuwoma ota na gba. Ẹjiroro iwuhrẹ omakugbe kẹ usiuwoma ota họ re e kẹ ọbọga jẹ lẹliẹ ohwo kpobi w’obọ ziezi evaọ iruo na. Iwhowho-uvie kpobi a rẹ tha ọruẹrẹfihotọ nana uke te epanọ o rẹ lọhọ te kpobi. (Iruẹru 5:42; 20:20) Jọ mai kpobi ma tha ọruẹrẹfihotọ nana uke vọvọ. Ma te bi ru ere, ma sai wo irẹro eghale Jihova, je ru udu Osu mai, Jesu Kristi, ghọghọ nọ ma bi whowho usi Uvie Ọghẹnẹ na.—Mat. 25:34-40; 28:19, 20.