Ẹkpẹti Onọ

◼ Didi eware a rẹ t’ẹme kpahe evaọ iwuhrẹ kẹ usiuwoma Ota?

Ẹjiroro iwuhrẹ kẹ usiuwoma ota họ re u fiobọhọ k’omai tẹrovi iruo nọ i ti lele iei na—odibọgba na. Fikiere, ọnọ ọ be rẹrote iei na ọ rẹ ruẹrẹ oma kpahe ziezi re ọ kẹ uzedhe oware nọ o rẹ kẹ uduotahawọ, onọ a re fihọ iruo. Otẹrọnọ ikere okpẹdẹ na e t’ẹme kpahe iruẹru usiuwoma ota, a rẹ sai sei jẹ t’ẹme kpahe iẹe kpẹkpẹe. Dede na, ewuhrẹ na ọ rẹ mae tẹrovi iruo odibọgba na, fiobọhọ kẹ ahwo kpobi nọ a be te nyai w’obọ evaọ iruo isẹri na re a thoma kpahe viere je ru odibọgba na gba evaọ ẹdẹ ọyena.—2 Tim. 4:5.

A rẹ sae t’ẹme kpahe igogo eme nọ i fo nọ e rọ Odibọgba Uvie Mai re u ru ahwo kpobi riẹ kpahe ebe nọ ma bi fihọ ada gbe epanọ a re ro ru ei. A rẹ sai ru odhesẹvia jọ rono uzoẹme na “Ẹme nọ Whọ rẹ Ta Kpahe Emagazini Na” ze evaọ Ẹdẹ Emagazini. Rọkẹ usi ovravra efa, a rẹ sai fielo họ odhesẹvia ọvo hayo ivẹ jọ evaọ omobe ọ Ebaibol E rọ Jiroro na nọ i kie kpahe ẹkwotọ obonẹ. A rẹ sae t’eme kpahe hayo ru odhesẹvia jọ kpahe abọjọ odibọgba na, wọhọ oriruo epanọ a rẹ rọ rehọ Ebaibol na ruiruo evaọ unuẹthẹ, epanọ a rẹ rọ kpahe fihọ eme nọ i re bru ẹme dhe, epanọ a re ro dhesẹ uwuhrẹ Ebaibol, hayo epanọ a rẹ rọ nya lele isiuru.

Iwuhrẹ kẹ usiuwoma ota i re theri vrẹ iminiti 10 rite 15 ho, te ẹghale ahwo, ẹghale ẹkwotọ, gbe olẹ nọ a rẹ lẹ. Okenọ a te kuhọ no, ohwo kpobi nọ ọ rrọ etẹe ọ rẹ riẹ ohwo nọ a ti lele gbe oria nọ a ti jo ruiruo, a vẹ nya kpohọ ẹkwotọ na ababọ oke oraha. Fikinọ ewuhrẹ na ọ rẹ jọ kpẹkpẹe na, u wuzou re ahwo kpobi a kaki te etẹe. Okenọ iwuhrẹ kẹ usiuwoma ota i te bi lele iwuhrẹ ukoko, wọhọ Uwuhrẹ Uwou-Eroro na, o rẹ kpẹre viere. U du fo re a t’ẹme kpahe ikere okpẹdẹ na ha, nọ o rọnọ a reawere emamọ ẹmeọta Ikereakere no na.

A rẹ ghale inievo-emezae nọ i te nọ e họ-ame no kpahe re a rẹrote ewuhrẹ kẹ usiuwoma ota ọvuọvo. Otẹrọnọ uvumọ oniọvo-ọmọzae nọ ọ rẹ kobaro ọ gbẹ riẹ evaọ uzedhe ẹdẹ jọ họ, ekpako na e rẹ ta kẹ oniọvo-ọmọtẹ nọ ọ họ-ame no re o ru ei evaọ okenọ ẹgwọlọ na ọ tẹ romavia. Evaọ ẹkeria, oniọvo-ọmọtẹ na ọ sai mu ẹmeọta ikere okpẹdẹ na hayo igogo eme efa nọ i kie kpahe usiuwoma ota na họ, o re ru ẹmeọta riẹ jọ kpẹkpẹe. O re ruru uzou riẹ.

Iwuhrẹ kẹ usiuwoma ota yọ uvẹ obọdẹ nọ o rẹ tuduhọ omai awọ jẹ th’omai kpahe re ma w’obọ evaọ odibọgba na. Epanọ ọnọ ọ be rẹrote i na ọ ruẹrẹ oma kpahe te, ere ahwo kpobi a re wo erere te.