Wo Erere Vọvọ No Ewuhrẹ Omakugbe kẹ Usiuwoma Ota Ze
1 Ewuhrẹ omakugbe kẹ usiuwoma ota nọ a riẹ ru ziezi o rẹ kẹ emamọ uduotahawọ gbe uvi ekpọvio taure ma te ti kpohọ usiuwoma ota. Onana u re ru nọ ma je wobọ evaọ isẹri-ise ogbotu nọ a jẹ sai dhe omai kugbe amọfa re ma sai fi obọ họ kẹ ohwohwo je wuhrẹ mi ohwohwo. (Itẹ 27:17; Ọtausi. 4:9, 10) Eme ma rẹ sai ru re ma wo erere no omakugbe nana ze vọvọ?
2 Ọnọ O Bi Ru Uwuhrẹ Omakugbe Na: U wo ugogo omaa nọ a ma fihọ nọ a rẹ rehọ eme na no ze ro ru uwuhrẹ nana ha. Fikiere, o gwọlọ nọ ohwo nọ o bi ti ru uwuhrẹ omakugbe na ọ rẹ ruẹrẹ oma kpahe ziezi. Orọnikọ ẹsikpobi nọ wha kokohọ kẹ usiuwoma ota who re se ikere okpẹdẹ na ha, rekọ whọ sae jọ ẹmeọta na dhunu tei otẹrọnọ u kpomahọ odibọgba na dẹe. Roro kpahe oware nọ u ti gine fi obọ họ kẹ ahwo nọ a bi kpohọ usiuwoma ota evaọ ẹdẹ yena. Wọhọ oriruo, whọ sae gwọlọ ta kpahe hayo ru odhesẹvia edhere usiuwoma ota jọ. Whọ sae ta kpahe oware jọ rono omobe ọ Ebaibol E rọ Jiroro na, obe ọ Isukulu Odibọgba, hayo abọ Ewuhrẹ Odibọgba jọ nọ a ru kẹle ze. Eva oke-ofa, whọ sae ta kpahe oghẹrẹ nọ a re ru nọ a tẹ nyaku use-abọ jọ evaọ ẹkwotọ rai, hayo whọ sae ta kpahe epanọ a sae rọ bọ isiuru ohwo ga jẹ to obe-uwuhrẹ Ebaibol họ, maero nọ a te bi kpohọ ozihebro. Makọ oghẹrẹ oware nọ whọ tẹme kpahe kẹhẹ, jọ ẹme ra ọ jọ jajaja avọ ọbọga nọ ọ rẹ kẹ ahwo.
3 Mu uwuhrẹ na họ ẹruoke, whọ tẹ make riẹ nọ ahwo jọ a te kake nyaze he. Rọ areghẹ ghale itu na, je dhesẹ ẹkwotọ nọ a te jọ ta usiuwoma kẹ ahwo nọ a gwọlọ ẹkwotọ. Uwuhrẹ oma ukokohọ kẹ usiuwoma ota na u re theri vrẹ iminiti 10 rite 15 hi, o rẹ kpẹre vi ere otẹrọnọ u lele uwuhrẹ ukoko. Taure who te ti ku uwuhrẹ na họ, ohwo kpobi ọ rẹ riẹ ohwo nọ a ghale riẹ kugbe gbe ẹkwotọ nọ a be te jọ ta usiuwoma na. A rẹ rọ olẹ ku uwuhrẹ na họ.
4 Whọ Sai Fi Obọ Họ: Wọhọ epanọ ma be hai ru evaọ iwuhrẹ ukoko na, ma re dhesẹ adhẹẹ kẹ Jihova je dhesẹ ororokẹ rọkẹ amọfa ẹkwoma ẹnyaze evaọ ẹruoke. Daoma wobọ evaọ ẹmeọta na. Ohwo nọ o bi ru uwuhrẹ na ọ sae ghale owhẹ kẹ ohwo jọ, hayo whọ sai ru ọruẹrẹfihotọ obọra taure oke uwuhrẹ usiuwoma ota na u te ti te. Otẹrọnọ whọ gwọlọ ru ọruẹrẹfihotọ obọra, daoma lele iwhowho-uvie sa-sa kpohọ usiuwoma, orọnikọ egbẹnyusu ra hayo ahwo nọ a kẹle owhẹ ọvo ho. (2 Kọr. 6:11-13) Nọ a te ku uwuhrẹ usiuwoma ota na họ no, who du nwene ọruẹrẹfihotọ nọ a ru no na ha, wha vẹ nya kpohọ ẹkwotọ usiuwoma ota na ababọ oke-oraha.
5 Ẹjiroro uwuhrẹ omakugbe kẹ usiuwoma ota o wọhọ orọ iwuhrẹ ukoko efa. A ruẹrẹ e rai họ re ma sae jarae ‘jaja erivẹ mai oma, re a wo uyoyou, je ru iruo ezi kpobi.’ (Hib. 10:24, 25) Nọ ma tẹ daoma wo erere no iwuhrẹ nana ze, u ti fi obọ họ kẹ omai wha odibọgba mai haro—evaọ uzẹme, onana yọ emamọ iruo!
[Study Questions]
1. Ẹvẹ uwuhrẹ omakugbe kẹ usiuwoma ota o sai ro fi obọ họ kẹ omai?
2. Eme họ eware jọ nọ ohwo nọ o bi ru uwuhrẹ oma ukokohọ kẹ usiuwoma ota ọ rẹ sae ta kpahe?
3. Ẹvẹ uwuhrẹ omakugbe kẹ usiuwoma ota u re theri te, kọ eme a re ru evaọ etoke yena?
4. Eme o ti fi obọ họ kẹ ahwo kpobi wo erere vọvọ no uwuhrẹ kẹ usiuwoma ota ze?
5. Eme họ ẹjiroro uwuhrẹ omakugbe kẹ usiuwoma ota?