Ewuhrẹ Omakugbe kẹ Usiuwoma nọ U bi Ru Ẹjiroro Riẹ Gba
1. Ẹjiroro vẹ ma be hai ro ru ewuhrẹ omakugbe kẹ usiuwoma?
1 Evaọ ẹdẹjọ, Jesu o koko ilele 70 riẹ họ taure a te ti kpohọ usiuwoma. (Luk 10:1-11) Ọ tuduhọ ai awọ nọ ozọ u mu ai hi keme Jihova nọ ọ rrọ “Olori ivuẹvu” na ọ rrọ kugbe ai jẹ be kpọ iruo na. Ọ tẹ jẹ kẹ ae ithubro nọ i re ru ai te kẹ iruo na je dhe ai “imimava.” Epọvo na o rrọ nẹnẹ re, ewuhrẹ omakugbe kẹ usiuwoma ota nọ ma re ru taure ma te ti kpohọ usiuwoma na o rẹ tuduhọ omai awọ, ru omai te, je koko omai họ.
2. Ẹvẹ ewuhrẹ omakugbe kẹ usiuwoma o re kri te?
2 Ma be hae rehọ iminiti 10 rite 15 ro ru ewuhrẹ omakugbe kẹ usiuwoma, te ẹghale ahwo, ẹkwotọ nọ a ti ru gbe olẹ. Obọnana u nwene no. Muhọ no Ane vrẹ, o te jọ iminiti isoi rite ihrẹ. O rẹ tubẹ kpẹre viere dede otẹrọnọ ukoko ofa u re mu ewuhrẹ họ nọ ọjọ ọ tẹ nwani kuhọ no, keme u ri kri hi nọ inievo na a rọ gaviezọ kẹ eme Ikereakere jẹ reawere ewuhrẹ jọ no na. Ma tẹ be rọ oke kpẹkpẹe ro ru ewuhrẹ omakugbe na, o te lẹliẹ omai wo oke ziezi kẹ odibọgba na. Ofariẹ, otẹrọnọ ekobaro hayo iwhowho-uvie jọ a mu usiuwoma họ no taure a tẹ te nyaze ewuhrẹ na, a rẹ gbẹ raha oke rai tere he.
3. Ẹvẹ a rẹ ruẹrẹ ewuhrẹ omakugbe na họ re iwhowho-uvie a wo erere noi ze vọvọ?
3 A re ru ewuhrẹ na evaọ oghẹrẹ nọ o rẹ mai ro fiobọhọ kẹ iwhowho-uvie na. Evaọ ikoko buobu o rẹ mai woma re iwhowho-uvie a kokohọ ọvuọ utu usiuwoma ota riẹ viukpenọ ukoko na soso u re kuomagbe evaọ oria ovo. Onana o rẹ sai ru ei lọhọ kẹ iwhowho-uvie kaki te oria omakugbe kẹ usiuwoma jẹ kaki te ẹkwotọ na. O te vẹrẹ ọsẹro utu na obọ evaọ ẹghale inievo na, ọ vẹ te jẹ riẹ oghẹrẹ nọ o re ro fiobọhọ kẹ iwhowho-uvie nọ e rrọ utu riẹ. Ugboma ekpako na a re rri oghẹrẹ nọ ẹkwotọ rai ọ rrọ jẹ jiroro onọ o mai woma. Taure a tẹ te rọ olẹ ku ewuhrẹ na họ, ohwo kpobi ọ rẹ riẹ ohwo nọ a ghale riẹ kẹ gbe ẹkwotọ nọ a be nya.
4. Fikieme ma gbe rri ewuhrẹ omakugbe kẹ usiuwoma kawo vi iwuhrẹ ukoko nọ i kiọkọ họ?
4 O Wuzou Wọhọ Iwuhrẹ Ukoko na Efa: Ẹjiroro ewuhrẹ omakugbe kẹ usiuwoma họ, re u fiobọhọ kẹ inievo nọ i bi ti kpohọ usiuwoma, fikiere orọnọ ohwo kpobi ọ rẹ jariẹ hẹ. O make rrọ ere na, orọnọ u dhesẹ nọ ma re rri rie nọ o wuzou hu hayo o kawo vi iwuhrẹ ukoko nọ i kiọkọ họ. Wọhọ iwuhrẹ nọ i kiọkọ, ewuhrẹ omakugbe kẹ usiuwoma yọ emamọ ọruẹrẹfihotọ nọ Jihova o bi ro ru omai dhesẹ uyoyou je ru ohwohwo ru iruo iwoma. (Hib. 10:24, 25) Fikiere, oniọvo nọ o bi ti ru ewuhrẹ na ọ rẹ ruẹrẹ oma kpahe ziezi re ewuhrẹ na ọ wha orro se Jihova jẹ jọ onọ inievo na a re wo erere no ze. Nọ o rrọ ere na, jọ owhowho-uvie kpobi nọ o ti kpohọ usiuwoma ẹdẹ yena ọ daoma jọ ewuhrẹ na.
Ma re rri ewuhrẹ omakugbe kẹ usiuwoma nọ o wuzou hu hayo inọ o kawo vi iwuhrẹ ukoko nọ i kiọkọ họ
5. (a) Eme họ owha-iruo ọsẹro usiuwoma ota nọ ọ tẹ be ruẹrẹ omaa usiuwoma ota họ? (b) Ẹvẹ oniọvo-ọmọtẹ o re ru ewuhrẹ omakugbe kẹ usiuwoma?
5 Omaruẹrẹkpahe Oniọvo nọ O bi ti Ru Ewuhrẹ Na: Re ohwo ọ sai ru ẹme nọ a kẹ riẹ ziezi evaọ ewuhrẹ, u fo nọ a rẹ rehọ ẹme na kẹe evaọ ẹruoke. Epọvo na o rẹ jọ kẹ ewuhrẹ omakugbe kẹ usiuwoma re. Ginọ uzẹme nọ ọsẹro utu hayo ethabọ riẹ o re ru ewuhrẹ na otẹrọnọ ọvuọ utu riẹ a be jọ kokohọ kẹ usiuwoma. Rekọ otẹrọnọ ukoko na soso u bi kokohọ oria ovo, ọsẹro usiuwoma ota na ọ rẹ rọ ewuhrẹ na kẹ oniọvo jọ. Esẹro usiuwoma jọ a rẹ rọ omaa usiuwoma ota kẹ inievo kpobi nọ i ti ru ewuhrẹ na je fi ọjọ họ ebọdo evuẹ. Re ewuhrẹ na ọ sai te inievo na udu jẹ jọ onọ a re wo erere no ze, ọsẹro usiuwoma ota na ọ rẹ salọ inievo nọ i wo onaa ewuhrẹ ziezi jẹ riẹ ahwo kokohọ. Otẹrọnọ ọkpako ukoko, odibo oruiruo hayo oniọvo-ọmọzae ọfa nọ ọ họ-ame no nọ o te ziezi ọ te jariẹ ẹdẹ jọ họ re o ru ewuhrẹ na, ọsẹro usiuwoma ota na ọ rẹ salọ oniọvo-ọmọtẹ nọ ọ họ-ame no nọ o te ziezi re o ru ewuhrẹ na.—Rri uzoẹme na “Nọ O tẹ Gbahọ nọ Oniọvo-Ọmọtẹ O re Ru Ewuhrẹ Na.”
6. Fikieme u je wuzou re oniọvo nọ o bi ru uwuhrẹ na ọ ruẹrẹ oma kpahe ziezi?
6 Nọ a tẹ kẹ omai ẹme evaọ Isukulu Odibọgba Esuo-Ọghẹnẹ hayo Ewuhrẹ Odibọgba, ma be hai rri rie jeve jeve he. Ma te gwọlọ hẹrẹ te okenọ ma mu ewuhrẹ họ ẹnya no ma te ti mu oma họ ẹruẹrẹ kpahe he. Epọvo na u fo nọ ma re rri ewuhrẹ omakugbe kẹ usiuwoma na re nọ a tẹ rehọ iẹe kẹ omai nọ ma ru. Obọnana nọ oke ewuhrẹ na o kpẹre no na, o gwọlọ nọ ma rẹ ruẹrẹ oma kpahe ziezi re inievo na a sai kru oware jọ dhobọ, ewuhrẹ na o ve je kuhọ evaọ ẹruoke. Oma nọ ma rẹ ruẹrẹ kpahe u kugbe ekade ẹkwotọ nọ ma re wo t’obọ evaọ ẹruoke.
7. Eware jọ vẹ ọnọ o ti ru uwuhrẹ na ọ rẹ sae ta kpahe?
7 Oware nọ A rẹ Ta Kpahe: Nọ orọnọ ẹkwotọ kpobi ọ rrọ epọvo ho na, “ọrigbo nọ a re fievahọ” na ọ kẹ omai omaa oghẹrẹ nọ a re ru ewuhrẹ omakugbe kẹ usiuwoma kpobi hi. Ẹkpẹti na, “Eware nọ Whọ Sae Ta Kpahe Evaọ Ewuhrẹ Omakugbe kẹ Usiuwoma” o fodẹ eware jọ nọ ma rẹ sai ru. Wọhọ epanọ ma be hai ru vẹre, oniọvo nọ o bi ru ewuhrẹ na o re gbolo enọ se ogbotu na. Evaọ ẹsejọ, ọ rẹ sai ru odhesẹvia nọ ọ ruẹrẹ kpahe ziezi hayo kporo ividio jọ nọ ọ rrọ jw.org/iso nọ o kiehọ kẹ usiuwoma. Nọ oniọvo nọ o ti ru ewuhrẹ na ọ tẹ be ruẹrẹ oma kpahe, o re roro oware nọ o te bọ inievo na ga je ru ai te kẹ usiuwoma ẹdẹ yena.
Nọ oniọvo nọ o ti ru ewuhrẹ na ọ tẹ be ruẹrẹ oma kpahe, o re roro oware nọ o te bọ inievo na ga je ru ai te kẹ usiuwoma ẹdẹ yena
8. Eme a rẹ sae jọ ewuhrẹ omakugbe kẹ usiuwoma ta kpahe evaọ Ẹdẹ-Ọmaha gbe Ẹdoka?
8 Evaọ Ẹdẹ-Ọmaha, iwhowho-uvie buobu a rẹ kẹ ahwo Uwou-Eroro Na gbe Awake! Ẹdẹ-Ọmaha inievo buobu a rẹ sai wo uvẹ kpohọ usiuwoma evaọ oka, yọ ẹsejọhọ oriruo usiuwoma ota nọ a ru evaọ etoke Egagọ Uviuwou rai o thọrọ e rai ẹro no. Fikiere, u ti kiehọ gaga otẹrọnọ ọnọ o ti ru uwuhrẹ na ọ ta kpahe iriruo usiuwoma ota nọ e rrọ uke Odibọgba Uvie Mai na. Ọ sae jẹ fodẹ epanọ a sae rọ rehọ iku oware jọ nọ o via, ehaa hayo ehọlide jọ nọ e viodẹ evaọ ẹkwotọ na rọ kẹ ohwo emagazini hayo ẹme nọ ọ te ta jẹhọ nọ o te lẹliẹe zihe ẹdẹ ọfa nọ ohwo o te mi ei emagazini. Otẹrọnọ iwhowho-uvie jọ nọ e ziọ ewuhrẹ omakugbe na a mu emagazini amara yena họ ẹrọkẹ ahwo no emuhọ amara na ze no, ọnọ o bi ru ewuhrẹ na ọ rẹ sae nọ ae re a ta oghẹrẹ nọ a sae rọ rehọ ae kẹ ahwo, hayo re a gbiku oghẹrẹ nọ a ro ru ei no. Evaọ Ẹdoka, ọnọ o bi ru ewuhrẹ na ọ rẹ sai ru epọvo na kpahe ebe nọ a be rọ kẹ ahwo evaọ amara na. Nọ orọnọ ma rẹ sae rehọ ebe nọ ma re ro wuhrẹ kugbe ahwo wọhọ ibroshọ Emamọ Usi avọ Gaviezọ kẹ Ọghẹnẹ gbe obe Ebaibol Wuhrẹ na kẹ ahwo ẹdẹ kpobi na, ọnọ o bi ru ewuhrẹ na ọ rẹ sae rehọ omoke jọ fodẹ oghẹrẹ nọ a rẹ rọ rehọ ọjọ kẹ ahwo.
9. Eme a rẹ sae ta kpahe nọ a te bi ru usi-uwhowho obọdẹ evaọ urere oka?
9 Otẹrọnọ ukoko na u bi ru usi-uwhowho obọdẹ evaọ urere oka, ọnọ o bi ru ewuhrẹ na ọ rẹ sae fodẹ oghẹrẹ nọ a re ro ku emagazini amara na gbe obe-uzizie hayo omobe-ovẹvẹ nọ a be rọ kẹ ahwo na, hayo ta oware nọ a re ru nọ a tẹ nyaku ohwo nọ o dhesẹ isiuru. Ofa họ, ọ sai dhunu te emamọ iyẹrẹ jọ nọ i dhesẹ irere nọ i re no usi-uwhowho utioye na ze.
10, 11. Fikieme omaruẹrẹkpahe iwhowho-uvie na u ro wuzou nọ a te bi kpohọ ewuhrẹ omakugbe kẹ usiuwoma?
10 Omaruẹrẹkpahe Iwhowho-Uvie: Iwhowho-uvie i wo ẹkẹ-abọ rai re, re ewuhrẹ omakugbe na ọ riẹ nya. Nọ a tẹ ruẹrẹ oma kpahe ziezi kẹ usiuwoma, ẹsejọhọ evaọ etoke egagọ uviuwou rai, a ti wo ẹme nọ a te ta nọ u ti fiobọhọ kẹ iwhowho-uvie efa. Emamọ omaruẹrẹkpahe u kugbe emagazini hayo ebe nọ a re wo t’obọ taure a te kpohọ ewuhrẹ omakugbe na, re ahwo na kpobi a kaki te obọ ẹkwotọ na ababọ oke oraha.
11 O roja re ma kaki te oria ewuhrẹ omakugbe kẹ usiuwoma na taure ewuhrẹ na o te ti muhọ. Uzẹme o rrọ inọ ma rẹ gwọlọ leti kpohọ iwuhrẹ ukoko mai hi. Rekọ ma te leti kpohọ oria omakugbe kẹ usiuwoma na, o rẹ sai ru nọ ọruẹrẹfihotọ na ọ gbẹ jọ kpatiẹ hẹ. Evaọ oghẹrẹ vẹ? Oniọvo-ọmọzae nọ o bi ru ewuhrẹ na o ti roro kpahe eware jọ tao re o te ti dhe inievo na. Otẹrọnọ iwhowho-uvie nọ e nyaze a bu hu, ọ rẹ sai dhe ai kpohọ ẹkwotọ jọ nọ a ru re he. Iwhowho-uvie jọ e tẹ nya owotọ, yọ ẹkwotọ na o thabọ, ọ rẹ sai dhe ai kugbe inievo nọ e dhẹ imoto. Otẹrọnọ ẹkwotọ nọ o re muozọ, ọ rẹ sai dhe oniọvo-ọmọzae avọ oniọvo-ọmọtẹ hayo o te dhe inievo-emetẹ ivẹ, inievo-emezae na a re thabọ no oria nọ a rrọ họ. Ọ rẹ sai dhe iwhowho-uvie nọ oma o ga tere he kpohọ ẹkwotọ nọ ikiekpotọ gbe ikpehru e rrọ họ hayo onọ iwou-ehru e rrọ tere he. Ọ rẹ sai dhe iwhowho-uvie ekpokpọ kugbe enọ i wo onaa ziezi. Rekọ otẹrọnọ iwhowho-uvie jọ i leti, ẹsejọhọ ọ vẹ te wariẹ mu ahwo na kpobi họ edhe. Evaọ ẹsejọ, oware nọ ma rẹro riẹ hẹ o rẹ sai ru omai leti. Rekọ u te kpohọ uruemu mai no, u re fo re ma nọ omai mai sọ ma wo orivo kẹ ewuhrẹ omakugbe usiuwoma na, hayo fikinọ ma be kaki ru evaọ ẹruoke he.
12. Otẹrọnọ whọ be hai ru ọruẹrẹfihotọ obọra, eme whọ rẹ sae daoma ru?
12 Evaọ ẹsejọ, iwhowho-uvie nọ i bi kpohọ usiuwoma a rẹ sai ru ọruẹrẹfihotọ obọ rai taure ewuhrẹ omakugbe na u te ti muhọ, hayo owhowho-uvie jọ ọ sae ta kẹ ọnọ o ru ewuhrẹ na re o dhei kugbe oniọvo jọ. Otẹrọnọ whọ be hai ru ọruẹrẹfihotọ obọra, kọ who gbe “rovie udu” ra ẹkwoma iwhowho-uvie efa nọ who re lele kpohọ usiuwoma viukpọ ahwo jọ ọvo nọ wha rẹ gbẹ nya? (2 Kọr. 6:11-13) Kọ whọ gbẹ daoma lele owhowho-uvie ọkpokpọ jọ kpohọ usiuwoma ẹsejọ re who fiobọhọ kẹe wo ẹnyaharo evaọ onaa uwuhrẹ? (1 Kọr. 10:24; 1 Tim. 4:13, 15) Nọ a tẹ be kẹ ithubro jẹ fodẹ ẹkwotọ nọ who ti ru, romatotọ gaviezọ. Nọ ewuhrẹ omakugbe na u te kuhọ no, whọ ta re a nwene ohwo hayo ẹkwotọ nọ a dhe kẹ owhẹ hẹ, daoma ruẹ nọ who kpohọ ẹkwotọ na ababọ oke oraha.
13. Otẹrọnọ ohwo kpobi ọ romatotọ ru ẹkẹ-abọ riẹ, erere vẹ ma re wo no iwuhrẹ omakugbe kẹ usiuwoma ze?
13 Nọ ilele 70 nọ Jesu o vi vrẹ na a ta usiuwoma kuhọ no, “a te zihe ze avọ oghọghọ.” (Luk 10:17) Ababọ avro, eme nọ ọ ta kẹ ae taure o te ti dhe ai vrẹ na i fiobọhọ kẹ ae ta usiuwoma ziezi. Epọvo na ewuhrẹ omakugbe kẹ usiuwoma u re fiobọhọ kẹ omai re. Otẹrọnọ ohwo kpobi ọ romatotọ ru ẹkẹ-abọ riẹ, iwuhrẹ omakugbe kẹ usiuwoma e te tuduhọ omai awọ, ru omai te, je koko omai họ nọ ma bi ru lele ujaje nọ ma bi ro se “isẹri kẹ erẹwho na kpobi.”—Mat. 24:14.