Eware Jọ nọ Ma re Ru re Ewuhrẹ Omakugbe kẹ Usi Uwoma Ota O Jọ Ziezi

Iwuhrẹ omakugbe kẹ usi uwoma ota gbe iwuhrẹ ukoko nọ ma re ru na, yọ ọruẹrẹfihotọ nọ u no obọ Jihova ze nọ o bi ro wuhrẹ omai re ma dhesẹ uyoyou kẹ ohwohwo je ru iruo iwoma. (Hib 10:24, 25) U fo nọ iminiti isoi rite ihrẹ a re ro ru ewuhrẹ nana, ghale ahwo, kẹ ahwo ẹkwotọ nọ a ti ru, jẹ lẹ ro kuhọ. (Yọ otẹrọnọ ukoko na o nwani ku ewuhrẹ jọ họ no a je bi ru ewuhrẹ omakugbe kẹ usi uwoma ota na, u fo nọ o rẹ tubẹ kpẹre viere dede.) O gwọlọ nọ oniọvo nọ o ti ru ewuhrẹ na ọ rẹ ruẹrẹ oma kpahe ziezi re ọ ta kpahe eware nọ i re fiobọhọ kẹ ahwo nọ a ti kpohọ usi uwoma evaọ ẹdẹ yena. Wọhọ oriruo, Ẹdẹ-Ọmaha inievo buobu a rẹ mai kpohọ usi uwoma evaọ oka na. Fikiere o rẹ mai woma re wha ta kpahe epanọ a sai ro mu ẹme họ. Eware efa jọ vẹ wha sae ta kpahe evaọ ewuhrẹ nana?

• Oriruo usi uwoma ota jọ nọ o rrọ Obe Ewuhrẹ Uzuazọ Oleleikristi gbe Usi Uwoma Ota Mai

• Oghẹrẹ nọ a sae rọ rehọ eware nọ e be via hayo iyẹrẹ nọ a nẹ evaọ etẹlẹvisiọno hayo iredio ro mu ẹme họ

• Ẹme nọ ma rẹ sae ta kẹ ohwo nọ ọ gwọlọ bru ẹme dhe omai unu

• Epanọ ma sae rọ ta usi uwoma kẹ ohwo nọ ọ rọwo Ọghẹnẹ hẹ, ohwo nọ ọ rọwo eghrorotha, ohwo nọ ọ be ta ẹvẹrẹ ọfa, hayo ohwo nọ ọ rrọ egagọ nọ ahwo a riẹ tere he evaọ ẹkwotọ ra

• Oghẹrẹ nọ ma sae rọ rehọ oria jọ evaọ jw.org, oware jọ evaọ JW Library^®, hayo oria jọ evaọ Ebaibol na ta usi uwoma

• Oghẹrẹ nọ ma sae rọ rehọ obe hayo ividio jọ nọ o rrọ Ẹkpẹti Ekwakwa Ewuhrẹ na ta usi uwoma

• Epanọ ma sae rọ rehọ ugogo edhere jọ ta usi uwoma, wọhọ, ifonu, ileta, usi uwoma ota ẹgbede, ru izihebro, hayo ebe-iwuhrẹ Ebaibol

• Epanọ nọ ma rẹ rọ yọroma evaọ usi uwoma, nwene lele uyero ohwo na, dhesẹ emamọ uruemu, rọ emamọ ubiẹro rri ahwo, gbe eware itieye na efa

• Uwuhrẹ jọ hayo ividio jọ evaọ ibroshọ Romakẹ Isase Ẹgbede avọ Ewuhrẹ na

• Epanọ ma sae rọ tuduhọ ohwo nọ ma gbẹ rọ usi uwoma awọ je fiobọhọ kẹe wo onaa ziezi

• Oria Ebaibol jọ nọ o ta kpahe usi uwoma ota na hayo emamọ iyẹrẹ jọ nọ a wo no