Isẹri-Ise Utu O rẹ Wha Oghọghọ Ze
1 Nọ o je vi ilele 70 kpohọ usiuwoma ota, Jesu ọ kẹ rae ohrẹ kpahe ẹme nọ a rẹ ta, ọ ruẹrẹ e rai fihọ itu ọ imimava, je dhesẹ ẹkwotọ nọ a rẹ jọ ta usiuwoma kẹ ae. Onana u fiba oghọghọ rai. (Luk 10:1-17) Epọvo na re nẹnẹ, isẹri-ise utu u re fi obọ họ kẹ ahwo Ọghẹnẹ thọ oma kpahe ziezi, koko ai họ, jẹ tuduhọ ae awọ rọkẹ iruo usiuwoma ota na.
2 Ekpako E rẹ k’Obaro: Ekpako i wo abọ ologbo evaọ obọ nọ a re fihọ kẹ ahwo kpobi re a w’obọ evaọ iruo usiuwoma ota na kẹse kẹse. Ọsẹro usiuwoma ota na ọ rẹ k’obaro evaọ ọruẹrẹfihotọ nọ o re ru kẹ usiuwoma ota ọ udevie-oka. Ọsẹro uwuhrẹ obe-ukoko kpobi o wo owha-iruo nọ o re ro ru ọruẹrẹfihotọ kẹ iruẹru utu riẹ, maero evaọ urere-oka. Evaọ ẹsejọ nọ ukoko na soso u te kokohọ rọkẹ usiuwoma ota, wọhọ oriruo okenọ a te ru Uwuhrẹ Uwou-Eroro na no, ọsẹro uwuhrẹ obe-ukoko kpobi ọ rẹ rẹrote ẹgwọlọ utu riẹ.
3 ‘Kpatiẹ je Lele Ọruẹrẹfihotọ’: Ohwo nọ a ro mu re o ru uwuhrẹ ọ omakokohọ kẹ usiuwoma ota na o re muhọ ẹruoke yọ o re ru uwuhrẹ na kpẹre te iminiti 10 hayo 15. O rẹ mai woma re ọ ghale ahwo na je dhe ẹkwotọ na (ajokpanọ ọsẹro uwuhrẹ obe-ukoko na ọvo ọ be rẹrote ẹghale na, wọhọ epanọ ma kake ta no vẹre na) taure ọ tẹ te rehọ olẹ kuhọ. Onana u re ru nọ iwhowho-uvie i gbe ro su koko họ oria jọ eva ẹkwotọ na ha, onọ o rẹ sai sino ọghọ iruo mai na. O tẹ jẹ rọwokugbe ohrẹ Pọl na inọ: “U fore a ru eware kpobi ziezi gba kiete.” (1 Kọr. 14:40) Ahwo nọ a kpohọ iwuhrẹ nana kpobi a rẹ zọhọ fihọ ewoma ọruẹrẹfihotọ na ẹkwoma ẹnya evaọ ẹruoke, ẹmeoyo vọvọ rọkẹ ọnọ ọ be k’obaro na, jegbe ẹnya vrẹ ẹruoke kpohọ ẹkwotọ na nọ a tẹ nwani si obọ no utu na no.
4 Oma Kokohọ Evaọ Okugbe Ọvo: Isẹri-ise utu o rẹ kẹ omai obọdẹ uvẹ nọ ma rẹ rọ riẹ amọfa evaọ ukoko na. Dede nọ o rrọ oware uyoma ha re ohwo o ru ọtamuo kugbe omọfa jọ nọ a rẹ gbẹ nya usu, o rẹ sae kẹ omai erere re ma kpohọ iwuhrẹ ọ omakugbe kẹ usiuwoma ota ababọ ọruẹrẹfihotọ nọ ma ru kẹ omobọ mai no. A rẹ sai dhe omai re ma lele ohwo jọ nọ ma riẹ ziezi hi nya usu, o vẹ lẹliẹ omai ru uyoyou mai ‘kẹre viere.’—2 Kọr. 6:11-13.
5 Isẹri-ise utu o rẹ tuduhọ omai awọ je si omai kpekpe wọhọ ‘ibe iruiruo eva uzẹme na.’ (3 Jọn 8) Wha joma jariẹ w’abọ vọvọ!