Idhere Isoi nọ Who re ro Wo Obe-Uwuhrẹ
1. O tẹ rrọ bẹbẹ re ma jọ ẹkwotọ mai ruẹ ohwo nọ ma re wuhrẹ, eme ma re ru, kọ fikieme?
1 Kọ o rrọ bẹbẹ re whọ ruẹ ohwo nọ who re wuhrẹ Ebaibol kugbe? Gbẹ gwọlọ. Jihova o ti fi obọ họ kẹ owhẹ otẹrọnọ o gbẹ bẹ owhẹ no ho. (Gal. 6:9) Eware isoi jọ nọ e sai fi obọ họ kẹ owhẹ e rrọ obotọ na.
2. Ẹvẹ ma sae rọ rehọ obe-uwuhrẹ mu usiuwoma họ?
2 Rehọ Obe-Uwuhrẹ Muhọ: Ahwo buobu a riẹ nọ ma rẹ kẹ ahwo Uwou-Eroro Na gbe Awake!, rekọ a rẹ sae riẹ nọ ma re wuhrẹ Ebaibol kugbe ahwo ho. Kọ whọ tẹ be ta usiuwoma n’uwou ruọ uwou, u gbe ti woma re whọ rehọ obe-uwuhrẹ Ebaibol mu ẹme ra họ? Whọ sae nọ ahwo nọ a be hae gaviezọ kẹ owhẹ sọ a gwọlọ nọ whọ hae nyaze ti wuhrẹ Ebaibol kugbe ai. A gbẹ rọwo ho, whọ vẹ hae kẹ ae ebe je zihe bru ai bẹsenọ a ti wo isiuru ziezi. Ikpe buobu, oniọvo jọ ọ jẹ hai kẹ ozae-avọ-aye jọ emagazini kamara kamara. Rekọ ẹdẹjọ nọ ọ kẹ ae emagazini no, ọ tẹ nọ ae sọ a gwọlọ nọ ọ hae nyaze ti wuhrẹ Ebaibol kugbe ai. U gbe rie unu nnọ a rọwo. Obọnana a họ-ame no.
3. Kọ u fo re ma roro nọ ohwo kpobi nọ ọ ziọ ewuhrẹ o wo ohwo nọ o bi wuhrẹ iẹe no? Fikieme?
3 Ahwo nọ A Ziọ Ewuhrẹ: Who roro nọ ahwo kpobi nọ a be ziọ iwuhrẹ mai a wo ahwo nọ a bi wuhrẹ ai hi. Oniọvo-ọmọzae jọ ọ ta nọ: “Emọ-uwuhrẹ mẹ buobu yọ ahwo nọ a ziọ ewuhrẹ nọ mẹ nọ sọ a wo ohwo nọ o bi wuhrẹ kugbe ai no.” Oniọvo-ọmọtẹ jọ ọ nọ aye jọ nọ ọ rẹ dhomovuọ nọ emọ riẹ e rrọ ukoko na sọ o wo ohwo nọ o bi wuhrẹ Ebaibol kugbei. Aye na ọ ziọ ewuhrẹ te ikpe 15 no, yọ ọ rẹ nyaze okenọ ewuhrẹ ọ be te nwani muhọ, a jẹ nwane lẹ no o ve kpo. Aye nana ọ rọwo nnọ a wuhrẹ iẹe obe, yọ ọ họ-ame uwhremu na. Oniọvo-ọmọtẹ nọ o wuhrẹ i rie na o kere nọ: “O d’omẹ inọ ikpe 15 soso e vrẹ taure mẹ tẹ te nọe sọ ọ gwọlọ uwuhrẹ Ebaibol.”
4. Ẹvẹ amọfa a sai ro fi obọ họ kẹ omai wo obe-uwuhrẹ?
4 Nọ Amọfa Sọ A Riẹ Ahwo jọ nọ I Wọ Isiuru: Oniọvo-ọmọtẹ jọ o re lele inievo efa nyabru emọ-uwuhrẹ rai. O te mi oniọvo nọ o wo obe-uwuhrẹ na uvẹ no, ọ vẹ nọ ọmọ-uwuhrẹ na sọ ọ riẹ amọfa nọ a te gwọlọ nọ a wuhrẹ obe kugbe ai. Whọ tẹ be kẹ ohwo nọ whọ be hai nyabru anwẹdẹ obe Ebaibol Wuhrẹ na, whọ sae nọe nọ: “Kọ whọ riẹ omọfa nọ obe nana o te were?” Ẹsejọ o rẹ jọ bẹbẹ kẹ iwhowho-uvie gbe ekobaro re a wuhrẹ ohwo kpobi nọ ọ gwọlọ wuhrẹ. Fikiere ta kẹ inievo efa inọ whọ gwọlọ ahwo nọ who re wuhrẹ.
5. Fikieme ma jẹ nọ ọrivẹ-orọo nọ ọ rrọ ukoko na ha sọ ọ gwọlọ uwuhrẹ Ebaibol?
5 Erivẹ-Orọo nọ E Rrọ Ukoko Ho: Kọ inievo jọ e rrọ ukoko ra nọ ezae hayo eyae rai e rrọ ukoko na ha? Ahwo nana jọ a rẹ rọwo inọ ọrivẹ-orọo rai ọ ta ẹme kẹ ae kpahe Ebaibol ho, rekọ a sae rọwo inọ omọfa o wuhrẹ ai. O rẹ mai woma re ma nọ ọrivẹ nọ ọ rrọ ukoko na tao oghẹrẹ nọ ma sae rọ ruẹe oma.
6. Ẹvẹ olẹ u ro wuzou nọ whọ tẹ be gwọlọ ohwo nọ who re wuhrẹ?
6 Olẹ: Who rri olẹ vo ho. (Jem. 5:16) Jihova ọ ya eyaa nọ ọ te gaviezọ kẹ olẹ kpobi nọ u w’obọ kugbe oreva riẹ. (1 Jọn 5:14) Oniọvo jọ nọ ọ rẹ kaki wo uvẹ hẹ ọ lẹ kẹ obe-uwuhrẹ. Aye riẹ o roro nọ ọzae riẹ o ti wo uvẹ nọ o ti ro wuhrẹ ohwo obe he, maero nọ ohwo na o te wo ebẹbẹ buobu. Fikiere ọ tẹ lẹ kpahe onana okenọ ọ jẹ lẹ se Jihova re o fi obọ họ kẹ ọzae riẹ wo obe-uwuhrẹ. Nọ eka ivẹ e vrẹ no, ọkobaro jọ evaọ ukoko rai ọ tẹ ruẹ ọzae jọ nọ ọ gwọlọ nọ a wuhrẹ Ebaibol kugbei, ọ tẹ rehọ iẹe kẹ oniọvo-ọmọzae na. Aye na o kere nọ: “Jọ ohwo kpobi nọ o roro nọ ọ sai wuhrẹ obe kugbe ohwo ho ọ lẹ kpahe onana. Jọ ọ ta oware nọ o be lẹliẹe roro ere kẹ Jihova. Onana u fi obọ họ kẹ omai, jẹ wha oghọghọ ulogbo se omai.” Gbẹ hae gwọlọ ahwo nọ who re wuhrẹ, whọ te ruẹ. Yọ who ti wo oghọghọ nọ whọ tẹ sai fi obọ họ kẹ ohwo jọ ziọ “edhere nọ a re ro kpohọ uzuazọ” na—Mat. 7:13, 14.