Abọ Avọ 7: Eru Ebe-Iwuhrẹ Ebaibol nọ E rẹ Nyaharo
Olẹ nọ A rẹ Lẹ Evaọ Uwuhrẹ Na
1 Re ọmọ-uwuhrẹ Ebaibol ọ sai wo ẹnyaharo abọ-ẹzi, o gwọlọ oghale Jihova. (1 Kọr. 3:6) Fikiere, u woma re a rehọ olẹ ro mu uwuhrẹ nọ a tohọ no họ jẹ rọ olẹ ku ei họ. Ẹsibuobu ma rẹ sai mu onana họ evaọ ẹdẹ ọsosuọ nọ ma bi ro ru uwuhrẹ kugbe ahwo nọ a wo isiuru egagọ. Nọ ma te bi ru uwuhrẹ kugbe emọ-uwuhrẹ efa, ma rẹ sae jiroro oke nọ u kiehọ nọ ma rẹ rọ to olẹ họ. Whọ rẹ sae rehọ Olezi 25:4, 5 gbe 1 Jọn 5:14 ro fiobọhọ kẹ ọmọ-uwuhrẹ na re ọ riẹ oware nọ ma jẹ lẹ, whọ vẹ rehọ Jọn 15:16 ro dhesẹ epanọ u wuzou te re ma rọ ẹkwoma Jesu Kristi lẹ se Jihova.
2 Ono ọ rẹ lẹ evaọ obe-uwuhrẹ Ebaibol? Otẹrọnọ oniọvo-ọmọzae nọ ọ họ-ame no o lele oniọvo-ọmọtẹ kpohọ obe-uwuhrẹ Ebaibol, oniọvo-ọmọzae na ọ rẹ lẹ, rekọ oniọvo-ọmọtẹ na ọ sai ru uwuhrẹ na avọ uzou riẹ nọ ọ rẹ fare. (1 Kọr. 11:5, 10) Eva abọdekọ riẹ, otẹrọnọ oniọvo-ọmọzae nọ ọ re họ-ame he o lele oniọvo-ọmọtẹ kpohọ obe-uwuhrẹ, oniọvo-ọmọtẹ na ọ rẹ lẹ. Evaọ uyero utioye, oniọvo-ọmọtẹ na ọ rẹ fare uzou riẹ re o te mu olẹ na họ gbe okenọ o bi ru uwuhrẹ na.
3 Eware nọ A rẹ Sae jọ Olẹ na Tẹme Kpahe: U du gwọlọ re elẹ nọ a rẹ jọ obe-uwuhrẹ Ebaibol lẹ e jọ thethei hi, rekọ e rẹ jọ avọ ugogo ẹjiroro. U te no eghale Ọghẹnẹ nọ ma rẹ lẹ kpahe uwuhrẹ na gbe uyere nọ ma rẹ kẹe fiki uzẹme nọ ma wuhrẹ no, u woma re ma kẹ Jihova ujiro wọhọ Ehri ithubro. (Aiz. 54:13) Ma rẹ jẹ sai ku eme nọ i dhesẹ uvi isiuru nọ ma wo kpahe ọmọ-uwuhrẹ na gbe ovuhumuo nọ ma wo kẹ ukoko nọ Jihova o bi ro ruiruo. (1 Tẹs. 1:2, 3; 2:7, 8) Jihova nọ ma rẹ lẹ se inọ ọ ghale omodawọ ọmọ-uwuhrẹ na re o fi eware nọ o bi wuhrẹ họ iruo o rẹ sai fiobọhọ kẹe ruẹ epanọ u wuzou te re ọ jọ ọnọ o re ‘ru ẹme na.’—Jem. 1:22.
4 Irere buobu i re no olẹ ze. O rẹ wha oghale Ọghẹnẹ ze. (Luk 11:13) U re fi ẹgba họ epanọ ewuhrẹ Ẹme Ọghẹnẹ ọ roja te. Nọ ọmọ-uwuhrẹ ọ be kezọ kẹ elẹ mai na, yọ o bi wuhrẹ epanọ ọ rẹ rọ lẹ. (Luk 6:40) Ofariẹ, elẹ nọ i re no udu nọ o vọ avọ uyoyou kẹ Ọghẹnẹ gbe ọjẹrehọ kẹ ekwakwa riẹ nọ i wo ibe he ze o rẹ sai fiobọhọ kẹ ọmọ-uwuhrẹ na mu usu kugbe Jihova.
[Study Questions]
1. (a) Fikieme u je woma re ma rọ olẹ muhọ je kuhọ eva obe-uwuhrẹ Ebaibol? (b) Ẹvẹ ma sae rọ to olẹ họ evaọ obe-uwuhrẹ Ebaibol?
2. Otẹrọnọ oniọvo-ọmọzae nọ ọ họ-ame no hayo ọnọ ọ re họ-ame he o lele oniọvo-ọmọtẹ kpohọ obe-uwuhrẹ Ebaibol, ono ọ rẹ lẹ?
3. Eme vẹ i wuzou nọ ma re fiba elẹ nọ ma rẹ lẹ evaọ obe-uwuhrẹ Ebaibol?
4. Didi eghale olẹ nọ ma re ro mu obe-uwuhrẹ Ebaibol họ je kuhọ o rẹ wha ze?