Sẹro Riẹ

Eru Ebe-Iwuhrẹ Ebaibol nọ E rẹ Nyaharo

Uko-obeva nana yọ ọgbakugbe igogo-eme nọ a ro no izoẹme sa-sa erọ eru ebe-iwuhrẹ Ebaibol nọ e rẹ nyaharo nọ e rọ oma via no evaọ Odibọgba Uvie Mai. Ma be tuduhọ ohwo kpobi awọ re ọ sẹro uko-obeva nana jẹ rehọ iẹe ruiruo nọ wha te bi ru ebe-iwuhrẹ Ebaibol. Fibae, a te hae tẹme kpahe igogo-eme no uko-obeva nana ze evaọ okenọ a kokohọ kẹ iwuhrẹ kẹ usiuwoma ota, yọ esẹro usiuwoma ota a sae rehọ iẹe ruiruo nọ a bi weze kpohọ itu obe-uwuhrẹ ukoko na.

Abọ 1: Eme Họ Obe-Uwuhrẹ Ebaibol?

Otẹrọnọ whọ be rehọ Ebaibol na gbe obe ukoko na jọ nọ a fodẹ rọ t’ẹme kugbe ohwo nọ o wo isiuru kẹse kẹse, etoke ẹmeọta na ọ tẹ make kpẹre, yọ obe-uwuhrẹ Ebaibol who bi ru na. U te no orọ ọsosuọ nọ who ro dhesẹ oghẹrẹ nọ a re ru uwuhrẹ na kẹ ohwo na no, who te ru uwuhrẹ na te isiava efa no, a rẹ sae nẹ iyẹrẹ obe-uwuhrẹ na otẹrọnọ who wo imuẹro nnọ uwuhrẹ na o te nyaharo.—km-IS 7/04 ẹwẹ. 1.

Ebe nọ A Sai ro Ruiruo:

◼ Eme Ọghẹnẹ Ọ Gwọlọ Mi Omai?

◼ Eriariẹ Nọ I Re Su Kpohọ Uzuazọ Ebẹdẹ Bẹdẹ

◼ Gọ Ọghẹnẹ Uzẹme Ọvo Na

◼ A rẹ sae rehọ ibroshọ na Whọ Rẹ Sae Jọ Ogbẹnyusu Ọghẹnẹ! ro ru uwuhrẹ kugbe ahwo nọ a wo eriariẹ tere he hayo enọ e riẹ ese te ere he.

Abọ Avọ 2: Oma Oruẹrẹ Kpahe kẹ Eru Uwuhrẹ Na

O gwọlọ nọ ma re wuhrẹ ọmọ-uwuhrẹ na evaọ edhere nọ o re duobọte udu riẹ. Onana o gwọlọ oma oruẹrẹ kpahe ziezi avọ ọmọ-uwuhrẹ na nọ ma re wohọ iroro.—km-IS 8/04 ẹwẹ. 1.

Epanọ A rẹ rọ Ruẹrẹ Oma Kpahe:

◼ Roro kpahe uzoẹme na, izoẹme-esese, gbe eware nọ a rẹ rọ ẹro ruẹ nọ e rrọ uzou hayo uwuhrẹ na.

◼ Vuhu iyo enọ na mu, kpoka họ igogo-eme gbe ihie-eme nọ i wuzou na ọvo.

◼ Salọ ikereakere nọ who ti se evaọ etoke uwuhrẹ na. Kere eme fihọ akotọ obe na nọ a kere oware ovo fihọ ha na re u fiobọhọ k’owhẹ.

◼ Ruẹrẹ ọkiẹkpemu ọkpẹkpẹe ọrọ igogo-eme kpahotọ.

Ru Uwuhrẹ na Kiehọ Ẹgwọlọ Ohwo Na

◼ Lẹ kpahe ọmọ-uwuhrẹ na gbe ẹgwọlọ riẹ.

◼ Daoma kaki roro kpahe igogo-eme nọ e te jọ bẹbẹ kẹ ọmọ-uwuhrẹ na re o wo otoriẹ rai hayo nọ e te jọ bẹbẹ kẹe re ọ rọwo.

◼ Nọ oma ra nọ: ‘Eme u fo nọ o re wo otoriẹ riẹ hayo ru iruo kpahe re ọ sai wo ẹnyaharo abọ-ẹzi? Ẹvẹ mẹ sae rọ rehọ eme na nyate udu riẹ?’

◼ O tẹ gwọlọ ere, ruẹrẹ ọtadhesẹ jọ họ, epanọ who re ro ru ẹme na vẹ, hayo enọ sa-sa re i fiobọhọ kẹ ọmọ-uwuhrẹ na wo otoriẹ ẹme hayo ikere jọ.

Abọ Avọ 3: Ikereakere na I ro Ru Iruo Ziezi

Ẹjiroro nọ ma bi ro ru ebe-iwuhrẹ Ebaibol họ re ma “ru ilele” ẹkwoma obọ nọ ma re fihọ kẹ ahwo re a wo otoriẹ jẹ rọwo iwuhrẹ Ẹme Ọghẹnẹ, re a je fi ai họ iruo evaọ uzuazọ rai. (Mat. 28: 19, 20, NW; 1 Tẹs. 2:13) Fikiere, uwuhrẹ na i re no Ikereakere na ze.—km-IS 11/04 ẹwẹ. 4.

Wuhrẹ No Ẹme Ọghẹnẹ Ze

◼ Dhesẹ kẹ ọmọ-uwuhrẹ na epanọ ọ rẹ rọ jọ Ebaibol riẹ duku igogo ikere jọ.

◼ Se jẹ ta kpahe ikere Ebaibol nọ i dhesẹ oria nọ ẹrọwọ mai o no ze.

◼ Rehọ enọ ro ruiruo. Ukpenọ who re ru ikere Ebaibol vẹ kẹ ọmọ-uwuhrẹ na, ta kẹe re o ru ei vẹ k’owhẹ.

◼ Ru ei lọhọ. Whaha abọ ikereakere na kpobi nọ whọ rẹ gwọlọ ru vẹ evaọ uwuhrẹ na. Eware nọ i wuzou nọ whọ rẹ sai ro ru ẹme nọ wha bi wuhrẹ na vẹ ọvo who re kugbei.

◼ Dhesẹ efihiruo ẹme na. Fiobọhọ kẹ ọmọ-uwuhrẹ na re ọ ruẹ epanọ ikere Ebaibol nọ wha se na i ro kie kpahe ọye-omariẹ.

Abọ Avọ 4: Epanọ A re ro Wuhrẹ Ọmọ-Uwuhrẹ na re Ọ Ruẹrẹ Oma Kpahe

Ọmọ-uwuhrẹ nọ o re se oria nọ a bi ti wuhrẹ kpahotọ, kpoka họ iyo na, je roro epanọ ọ rẹ rọ rehọ eme obọriẹ kẹ iyo na o re wo ẹnyaharo abọ-ẹzi vẹrẹ vẹrẹ. Fikiere, nọ whọ tẹ tuọ obe-uwuhrẹ Ebaibol họ no, lele ọmọ-uwuhrẹ na rehọ uwuhrẹ jọ ruẹrẹ oma kpahe re who dhesẹ epanọ a rẹ rọ ruẹrẹ oma kpahe kẹe. Rọkẹ emọ-uwuhrẹ buobu, o rẹ mai fiobọhọ re wha rehọ uzou hayo uwuhrẹ jọ soso ruẹrẹ oma họ kugbe.—km-IS 12/04 ẹwẹ. 1.

Oka Ukpehọ gbe Eme nọ A re Kere Fihọ Akotọ Obe Na

◼ Dhesẹ kẹ ọmọ-uwuhrẹ na epanọ a rẹ rọ ruẹ uzedhe uyo orọ enọ nọ a nọ na.

◼ Eva obe nọ wha bi wuhrẹ na, dhesẹ ora nọ who je kpoka họ igogo eme hayo ihie-eme na kẹ ọmọ-uwuhrẹ na.

◼ Fi obọ họ kẹe vuhumu inọ ikereakere kpobi nọ a fodẹ e tha ẹme jọ evaọ edhe-ẹme na uke, je dhesẹ kẹe epanọ o re ro kere eme kpẹkpẹe fihọ akotọ obe nọ o bi wuhrẹ na.

Ọdhẹduwu gbe Ọkiẹkpemu:

◼ Dhesẹ kẹ ọmọ-uwuhrẹ na inọ ọ rẹ sae kake kiẹ oware nọ o bi ti wuhrẹ na ẹkwoma ẹkiẹriwi uzoẹme na, izoẹme-esese, gbe iwoho nọ e rrọ obe na.

◼ Tuduhọ ọmọ-uwuhrẹ na awọ inọ taure o te ti ku omaruẹrẹhọ riẹ họ, jọ ọ hai ru ọkiẹkpemu igogo-eme nọ e rrọ uwuhrẹ na.

Abọ Avọ 5: Iroro-Ejẹ Epanọ Oria nọ A re Wuhrẹ U re Theri Te

Epanọ oria nọ a bi wuhrẹ u re theri te o roma wha ẹgba gbe iyero owuhrẹ na gbe ọmọ-uwuhrẹ na.—km-IS 1/05 ẹwẹ. 1.

Bọ Ẹrọwọ Ọgaga

◼ Whaha ovẹrẹ nọ who re ro ru uwuhrẹ na nọ ọmọ-uwuhrẹ na o gbe wo erere vọvọ no uwuhrẹ na ze he.

◼ Raha oke nọ o gwọlọ kpobi re who fiobọhọ kẹ ọmọ-uwuhrẹ na wo otoriẹ jẹ rọwo oware nọ o bi wuhrẹ na.

◼ Rehọ oke ru igogo-eme vẹ je se ugogo ikereakere nọ i dhesẹ otọhotọ oware nọ wha bi wuhrẹ na via.

Tọ Ẹro vi Uwuhrẹ Na

◼ Otẹrọnọ ọmọ-uwuhrẹ na ọ gwọlọ rehọ oke thethei ro gbiku oma riẹ, o sae gwọlọ nọ ma ru ọruẹrẹfihotọ nọ ma rẹ rọ ta eme yena nọ ma te ku uwuhrẹ na họ no.

◼ Whọ ta eme bu hrọ evaọ etoke uwuhrẹ na ha. Eme jọ nọ e nwani kpomahọ ewuhrẹ na dẹẹ hẹ gbe oware jọ nọ o via nọ ma rẹ ta kpahe o rẹ sai fiobọhọ evaọ uwuhrẹ, rekọ jọ e nwani bu hrọ hayo theri te epanọ e rẹ rọ whaha ọmọ-uwuhrẹ na ewo eriariẹ egbagba orọ ugogo iwuhrẹ Ebaibol na ha.

Abọ Avọ 6: Nọ Ọmọ-Uwuhrẹ Ọ tẹ Nọ Onọ

Nọ a tẹ to obe-uwuhrẹ Ebaibol họ ziezi no, o rẹ mai woma re a ta kpahe iwuhrẹ Ebaibol na unọjọ utọjọ, orọnikọ a rẹ la no uzoẹme ruọ uzoẹme he. Onana u re fiobọhọ kẹ ọmọ-uwuhrẹ na wo otọhotọ eriariẹ egbagba je wo ẹnyaharo abọ-ẹzi.—km-IS 2/05 ẹwẹ. 6.

Dhesẹ Orimuo

◼ A rẹ sae kẹ iyo enọ nọ i kpomahọ uwuhrẹ na ẹsiẹsiẹe.

◼ Enọ nọ i kie kpahe uwuhrẹ na ha hayo nọ o gwọlọ nọ who ru ekiakiẹ re whọ sae kẹ uyo na ziezi, wha rẹ sae t’ẹme kpahe ae eva okiofa. Nọ who te kere enọ itieye na fihotọ o rẹ sai fiobọhọ.

◼ Otẹrọnọ ọmọ-uwuhrẹ jọ ọ be rọwo ugogo uwuhrẹ Ebaibol jọ họ, rri ebe efa nọ e ta ziezi kpahe oware nọ Ebaibol e ta kpahe ẹme na.

◼ Otẹrọnọ ọmọ-uwuhrẹ na ọ gbẹ rọwo ghele he, k’ẹme na uvẹ bọo oke ofa, re who ru uwuhrẹ riẹ na haro.

Jọ Owowa

◼ Otẹrọnọ uyo onọ jọ u gbe vẹ owhẹ ẹro ho, who du rọ okpakpa kẹ uyo onọ na ha.

◼ Romatotọ dhesẹ kẹ ọmọ-uwuhrẹ na epanọ o re ro ru ekiakiẹ

Abọ Avọ 7: Olẹ nọ A rẹ Lẹ Evaọ Uwuhrẹ Na

Re ọmọ-uwuhrẹ Ebaibol ọ sai wo ẹnyaharo abọ-ẹzi, o gwọlọ oghale Jihova. Fikiere, u woma re a rehọ olẹ ro mu uwuhrẹ nọ a tohọ no fihọ jẹ rọ olẹ ku ei họ.—km-IS 3/05 ẹwẹ. 4.

Epanọ A rẹ rọ To Olẹ Họ

◼ Ro kugbe ahwo nọ a wo isiuru egagọ, ma rẹ sae jọ uwuhrẹ ẹdẹ ọsosuọ na to olẹ họ.

◼ Nọ ma te bi ru uwuhrẹ kugbe emọ-uwuhrẹ efa, ma rẹ sae jiroro oke nọ u kiehọ nọ ma rẹ rọ to olẹ họ.

◼ Whọ rẹ sae rehọ Olezi 25:4, 5 gbe 1 Jọn 5:14 ro fiobọhọ kẹ ọmọ-uwuhrẹ na re ọ riẹ oware nọ ma jẹ lẹ.

◼ Whọ vẹ rehọ Jọn 15:16 ro dhesẹ epanọ u wuzou te re ma rọ ẹkwoma Jesu Kristi lẹ se Jihova.

Eware nọ A rẹ Sae jọ Olẹ na Tẹme Kpahe

◼ U woma re ma kẹ Jihova ujiro wọhọ ọnọ ọ rọ Ehri ithubro.

◼ Ma re ku eme nọ i dhesẹ uvi isiuru nọ ma wo kpahe ọmọ-uwuhrẹ na kugbe olẹ na.

◼ Ma re ku ovuhumuo nọ ma wo kẹ ukoko nọ Jihova o bi ro ruiruo kugbe olẹ na.

◼ Lẹ se Jihova inọ ọ ghale omodawọ ọmọ-uwuhrẹ na re o fi eware nọ o bi wuhrẹ họ iruo.

Abọ Avọ 8: Ọmọ-Uwuhrẹ na nọ A rẹ Kpọ Rri Ukoko Na

Orọnikọ ute mai nọ ma bi ro ru ebe-iwuhrẹ Ebaibol họ re ma wuhrẹ ahwo eriariẹ ọvo ho, rekọ re ma je fiobọhọ kẹ emọ-uwuhrẹ na re a kuomagbe ukoko Ileleikristi na. Jọ uwuhrẹ na rehọ umutho iminiti jọ koka koka rọ ta kẹ ae kpahe ukoko Jihova.—km-IS 4/05 ẹwẹ. 8.

Iwuhrẹ Ukoko

◼ Dhesẹ iwuhrẹ ukoko na ọvuọvo kẹ ọmọ-uwuhrẹ na. Jọ umuo ẹdẹ ọsosuọ nọ whọ rọ to obe-uwuhrẹ Ebaibol họ kugbe ai na zizie ai re a ziọ iwuhrẹ ukoko mai.

◼ Ta ugogo eware jọ nọ a jọ iwuhrẹ na ta kpahe kẹ ae.

◼ Bọ isiuru rai kẹ Emu Owọwọ Olori na, ikokohọ, gbe iweze ọsẹro okogho.

◼ Rehọ iwoho nọ e rrọ ebe mai ro fiobọhọ kẹ ae re a jọ iroro rai ruẹ oware nọ ma re ru evaọ iwuhrẹ mai.

◼ Tuduhọ ae awọ re a se ibroshọ na Isẹri Jihova—Oghẹrẹ Ahwo Vẹ A Rrọ? Eme A Rọwo?

Rehọ Ividio rọ Kpare Isiuru Ahwo

◼ Jehovah’s Witnesses—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Abọ Avọ 9: Ọmọ-Uwuhrẹ na nọ A re Wuhrẹ re O Se Isẹri Oke-Gheghe

Nọ emọ-uwuhrẹ Ebaibol a bi mu ẹrọwọ họ efihọ oware nọ a bi wuhrẹ na, oma o rẹ wọ ae re a tẹme kpahe iẹe.—km-IS 5/05 ẹwẹ. 1.

Tuduhọ Ae Awọ re A Ta Usiuwoma

◼ Kọ a wo egbẹnyusu hayo ahwo uviuwou nọ a rẹ sai zizie re a ku oma gbae evaọ uwuhrẹ na?

◼ Kọ ibe-iruiruo rai, ibe emọ-isukulu, hayo amọfa jọ a dhesẹ isiuru kpahe emamọ usi na no?

Oware nọ A Rọwo nọ A rẹ Ta kẹ Amọfa

◼ Nọ wha te ru uwuhrẹ na te eria sa-sa no, nọ ọmọ-uwuhrẹ na nọ: “Ẹvẹ whọ sae rọ rehọ Ebaibol na ru uzẹme nana vẹ kẹ ahwo uviuwou ra?”

◼ Fiobọhọ kẹ ọmọ-uwuhrẹ na wo otoriẹ oware nọ u je fo nọ a dhesẹ adhẹẹ gbe ẹwo evaọ okenọ a bi lele amọfa tẹme kpahe Jihova Ọghẹnẹ gbe ẹjiroro riẹ.

◼ Emọ-uwuhrẹ Ebaibol a rẹ sae rehọ ibroshọ na Isẹri Jihova—Oghẹrẹ Ahwo Vẹ A Rrọ? Eme A Rọwo? ro fiobọhọ kẹ uvi egbẹnyusu gbe ahwo uviuwou re a wo otoriẹ iruẹru gbe ẹrọwọ mai nọ o no Ebaibol ze na.

Abọ Avọ 10: Ọmọ-Uwuhrẹ na nọ A re Wuhrẹ Kpahe Usiuwoma Ota Nuwou Ruwou Na

Nọ ekpako na a tẹ jiroro nọ ọmọ-uwuhrẹ o te epanọ ọ rẹ rọ jọ owhowho-uvie nọ ọ re họ-ame he no, ọ sai mu oma họ ekugbe ukoko na evaọ usiuwoma ota nuwou ruwou na.—km-IS 6/05 ẹwẹ. 1.

Oma nọ Wha rẹ Ruẹrẹ họ Kugbe

◼ Dhesẹ kẹ ọmọ-uwuhrẹ na oria nọ ọ jẹ sae ruẹ idhere usiuwoma ota nọ a jiroro rai kẹ omai.

◼ Fiobọhọ kẹe salọ edhere ọlọlọhọ jọ nọ o kiehọ nọ a sai ro lele ohwo tẹme evaọ ẹkwotọ ukoko rai.

◼ Tuduhọ iẹe awọ re ọ rehọ Ebaibol na ruiruo evaọ odibọgba riẹ.

◼ Wha wariẹ edhere usiuwoma ota nọ wha ruẹrẹ họ no kugbe. Dhesẹ kẹe epanọ ọ sae rọ rehọ ona kiyo eme nọ ahwo a rẹ kpahe ẹsikpobi evaọ ẹkwotọ ukoko rai.

Usu nọ Wha rẹ Jọ Kugbe Evaọ Usiuwoma Ota

◼ Ta kẹ ọmọ-uwuhrẹ na re o muẹrohọ epanọ whọ te rọ t’ẹme nọ whẹ avọ iẹe a ruẹrẹhọ kugbe na kẹ ohwo.

◼ Wo oghẹrẹ nọ ọmọ-uwuhrẹ na ọ rrọ gbe epanọ ẹgba riẹ o te họ iroro. Evaọ ẹsejọ, o rẹ mai woma re a ta kẹe nnọ ọ ta abọjọ ẹme nọ wha gbẹ ruẹrẹ họ kugbe na.

◼ Fiobọhọ kẹ owhowho-uvie ọkpokpọ na re o wo omaa ẹsikpobi nọ o re ro wo obọ evaọ odibọgba na.

Abọ Avọ 11: Obọ Ufihọ kẹ Iwhowho-Uvie Ekpokpọ re A Ru Izihebro

Omaruẹrẹhọ kẹ ozihebro u re muhọ no iweze ọsosuọ na ze. Tuduhọ ọmọ-uwuhrẹ na awọ re o dhesẹ uvi isiuru kẹ ahwo nọ ọ be ta usiuwoma kẹ. Wuhrẹ ọmọ-uwuhrẹ ọkpokpọ na re ọ ta kẹ ahwo na nọ a ta oware nọ ọ rrọ iroro rai, re ọ gaviezọ kẹ eme nọ a be ta, re o je muẹrohọ eware nọ e rrọ ọdawẹ kẹ ae.—km-IS 7/05 ẹwẹ. 1.

Omaruẹrẹhọ re A Zihe

◼ Kiẹ eme nọ a jọ iweze ọsosuọ na ta riwi, re who dhesẹ kẹ ọmọ-uwuhrẹ na epanọ ọ rẹ rọ salọ uzoẹme jọ nọ u ti si ohwo nọ ọ ta ẹme kẹ na urru.

◼ Wha ruẹrẹ edhere-ẹmeọta jọ họ kugbe nọ a rẹ jọ rehọ oria ikere Ebaibol ọvo gbe edhe-ẹme jọ evaọ obe mai jọ nọ a re ro ru uwuhrẹ ro ruiruo.

◼ Ruẹrẹ onọ jọ họ nọ a rẹ sae nọ evaọ obọ ekuhọ ẹme na.

Nya Lele Isiuru na Ziezi

◼ Tuduhọ ọmọ-uwuhrẹ na awọ re o zihe vẹrẹ vẹrẹ bru ahwo kpobi nọ a dhesẹ isiuru.

◼ Fiobọhọ kẹ ọmọ-uwuhrẹ na riẹ oware nọ o jẹ gwọlọ ithihakọ re a sai di ahwo nọ a rẹ kake jọ uwou hu họ.

◼ Dhesẹ kẹ owhowho-uvie ọkpokpọ na epanọ o re ro ru ọruẹrẹfihotọ nọ ọ rẹ rọ wariẹ zihe, je fiobọhọ kẹe wo otoriẹ oware nọ o jẹ roja re o zihe wọhọ epanọ ọ yaa kẹ ohwo na.

Abọ Avọ 12: Obọ Ufihọ kẹ Emọ-Uwuhrẹ re A To Ebe-Iwuhrẹ Ebaibol họ je Ru Uwuhrẹ Na

Aro nọ who re ro kele Jesu ẹkwoma emamọ oriruo nọ who re fihotọ evaọ odibọgba ra u wuzou gaga. Nọ ọmọ-uwuhrẹ ra ọ be ruẹ oriruo nọ who bi fihotọ kẹe evaọ odibọgba na, o ti vuhumu inọ ẹjiroro izihebro nọ a re ru họ re a to ebe-iwuhrẹ Ebaibol họ.—km-IS 8/05 ẹwẹ. 1.

Ẹtohọ Obe-Uwuhrẹ Ebaibol

◼ Ru ei vẹ kẹ ọmọ-uwuhrẹ na inọ o nwane gwọlọ re ma dhesẹ epanọ uwuhrẹ na o te jọ kpobi hi.

◼ Evaọ ẹsibuobu, o rẹ mai woma re ma rehọ edhe-ẹme ọvo hayo ivẹ nọ ma re se no obe jọ nọ a re wuhrẹ ze ro dhesẹ epanọ ma te hai ru uwuhrẹ na.

◼ Kiẹ riwi je ru odhesẹvia iroro jọ nọ a jẹ fihọ nọ a rẹ rọ to obe-uwuhrẹ Ebaibol họ.—km-IS 8/05 ẹwẹ. 4; km-IS 1/02 ẹwẹ. 6.

Ewuhrẹ nọ A re Wuhrẹ Emọ-Uwuhrẹ Ebaibol re A jọ Iwuhrẹ

◼ Tuduhọ emọ-uwuhrẹ Ebaibol awọ re a fi obe họ kẹ Isukulu Odibọgba Esuo-Ọghẹnẹ na.

◼ Ru ọruẹrẹfihotọ nọ iwhowho-uvie ekpokpọ i re ro lele owhẹ kpohọ ebe-iwuhrẹ Ebaibol efa nọ a jẹ sai wobọ evaọ ewuhrẹ na.