Ruẹrẹ Oma Kpahe Ziezi kẹ Uwuhrẹ
1. Nọ ma te bi ru obe-uwuhrẹ Ebaibol, fikieme ma jẹ tẹrovi obufihọ kẹ ọmọ-uwuhrẹ re o wo ovuhumuo kẹ oware nọ o bi wuhrẹ?
1 Nọ ma te bi ru obe-uwuhrẹ Ebaibol, o gwọlọ nọ ma rẹ ruẹrẹ oma kpahe ziezi kẹ uwuhrẹ na otẹrọnọ ma re ru ei evaọ oghẹrẹ nọ o sae rọ kẹ ọmọ-uwuhrẹ na ọwhọ nọ ọ rẹ rọ gọ Jihova. Nọ ma te fi obọ họ kẹ ọmọ-uwuhrẹ na wo ovuhumuo kẹ oware nọ o bi wuhrẹ no Ebaibol ze, o rẹ wha emamọ iyẹrẹ ze. Onana o rẹ kẹe ọwhọ. (Izie. 6:5; Itẹ 4:23; 1 Kọr. 9:26) Ẹvẹ ma sai ro ru onana?
2. Ẹvẹ olẹ o sai ro fi obọ họ k’omai nọ ma tẹ be ruẹrẹ oma kpahe?
2 Lẹ Taure Whọ Tẹ Ruẹrẹ Oma Kpahe: Jihova họ ọnọ o re ru nọ ubi uzẹme na o rẹ rọ jọ udu ọmọ-uwuhrẹ rro, fikiere o r’oja re ma lẹ kpahe ugogo ẹgwọlọ ọmọ-uwuhrẹ na taure ma te mu oma họ ẹruẹrẹ kpahe. (1 Kọr. 3:6; Jem. 1:5) Olẹ utioye o sai je fi obọ họ k’omai riẹ epanọ ma gbẹ sai ro fi obọ họ kẹe wo ‘eriariẹ egbagba’ kpahe oreva Jihova.—Kọl. 1:9, 10.
3. Ẹvẹ ma sai ro wo ọmọ-uwuhrẹ họ iroro ruẹrẹ oma kpahe?
3 Roro Kpahe Ọmọ-Uwuhrẹ Na: Jesu ọ riẹ inọ re a sai wuhrẹ ahwo ziezi, ohwo o re wo ahwo nọ o bi ti wuhrẹ na họ iroro. Evaọ iyero ivẹ sa-sa a jọ nọ Jesu onọ nana: “Eme me re ruẹ re [mẹ] reuku uzuazọ ebẹdẹ bẹdẹ?” Evaọ iyero ivẹ nana, ọvuọ edhere riẹ Jesu ọ rọ kuyo na. (Luk 10:25-28; 18:18-20) Ma re wo ọmọ-uwuhrẹ na họ iroro nọ ma tẹ be ruẹrẹ oma kpahe. Ikereakere vẹ ma ti se evaọ etoke uwuhrẹ na? Ẹvẹ oria nọ ma ti wuhrẹ u ti theri te? Eme vẹ e te jọ bẹbẹ kẹ ọmọ-uwuhrẹ na re o wo otoriẹ rai hayo rọwo? Ma te roro kpahe enọ jọ nọ ọmọ-uwuhrẹ na ọ rẹ sae nọ, ma te ruẹrẹ oma kpahe kẹ iyo rai ziezi.
4. Eme emamọ oma o ruẹrẹ kpahe o kẹre te?
4 Se Oria nọ Wha Ti Wuhrẹ Na: Makọ unuẹse nọ ma se obe na no kẹhẹ evaọ okenọ u kpemu, onana họ orọ ọsosuọ nọ ma bi ro wuhrẹ iẹe kugbe ọmọ-uwuhrẹ na. Re uwuhrẹ na o sai duobọ tei udu, o gwọlọ nọ ma rẹ ruẹrẹ oma kpahe ziezi. Koyehọ ma re ru oware nọ ma be ta kẹ ọmọ-uwuhrẹ na nọ o ru na. Wo ọmọ-uwuhrẹ na họ iroro ro se oria nọ wha bi ti wuhrẹ na, gbe ikere nọ e riẹ, whọ sai je si usi họ otọ igogo-eme na.—Rom. 2:21, 22.
5. Ẹvẹ ma sae rọ raro kele Jihova?
5 Jihova ọ gwọlọ nọ ọmọ-uwuhrẹ kpobi o wo ẹnyaharo. (2 Pita 3:9) Nọ ma tẹ be ruẹrẹ oma kpahe kẹ obe-uwuhrẹ Ebaibol kpobi, koyehọ ma be raro kele Jihova nọ o wo ọdawẹ kẹ amọfa.