Ẹkpẹti Onọ

◼ Kọ ma rẹ lẹ nọ ma te bi ru uwuhrẹ Ebaibol edikihẹ evaọ unuẹthẹ?

Irere buobu i re noi ze nọ a tẹ rehọ olẹ mu uwuhrẹ Ebaibol họ jẹ rọ olẹ ku ei họ. Ma rẹ rọ ẹkwoma olẹ yare Jihova re ọ kẹ omai ẹzi ọfuafo riẹ evaọ oke uwuhrẹ na. (Luk 11:13) Olẹ u re je ru ọmọ-uwuhrẹ mai riẹ epanọ uwuhrẹ na u wuzou te je wuhrẹ iẹe epanọ ọ rẹ lẹ. (Luk 6:40) Fikiere, u fo re ma muhọ ẹlẹ kugbe ọnọ ma bi wuhrẹ obe kugbe, yọ ma sai ru ere nọ ma te ru uwuhrẹ na te umutho ẹsejọ ọvo no. Rekọ, fikinọ iyero i re wo ohẹriẹ, ọnọ o bi ru uwuhrẹ na ọ rẹ rọ areghẹ jiroro sọ ọ rẹ lẹ evaọ uwuhrẹ nọ ọ be jọ unuẹthẹ ru.

Oware jọ nọ u wuzou ma re roro kpahe họ, oria nọ ma bi jo ru uwuhrẹ na. Otẹrọnọ ma bi ru uwuhrẹ nọ o dọmu no evaọ oria nọ u sioma no, ma rẹ sae rọ olẹ okpẹkpẹe muhọ je kuhọ. Rekọ otẹrọnọ oyena o te lẹliẹ amọfa tẹrovi owhai hayo u kiehọ ọmọ-uwuhrẹ na oma ha, o rẹ mai woma re whọ hẹrẹ bọo okenọ wha re mu uwuhrẹ na họ eru evaọ oria nọ u dina sioma no. Oghẹrẹ oria kpobi nọ ma bi jo ru uwuhrẹ na kẹhẹ, u fo re ma rọ areghẹ jiroro oke nọ ma re ro mu olẹ họ ẹlẹ kugbe ọnọ ma bi wuhrẹ obe.—Rri Odibọgba Uvie Mai ọrọ March 2005, ẹwẹ-obe avọ 4.