Kpare Abọ Omarokpotọ Evaọ olẹ

“Mẹ guọlọ nọ eva oria kpobi nọ ezae e jẹ be lẹ, a rẹ kpare abọ ọrẹri kpehru ababọ ofu hayo ẹwhọ.”—1 TIMOTI 2:8.

1, 2. (a) Ẹvẹ 1 Timoti 2:8 u ro kiekpahe olẹ ahwo Jihova? (b) Kọ eme ma te ta kpahe obọnana?

JIHOVA ọ gwọlọ nọ ahwo riẹ a roma kpotọ kẹe jẹ rọ kẹ ohwohwo. Pọl ukọ na ọ rehọ omarokpotọ jẹhọ olẹ evaọ okenọ o kere nọ: “Mẹ guọlọ nọ eva oria kpobi nọ ezae e jẹ be lẹ, a rẹ kpare abọ ọrẹri kpehru ababọ ofu hayo ẹwhọ.” (1 Timoti 2:8) Ẹsejọhọ, olẹ ogbotu “eva oria kpobi” nọ Ileleikristi a koko họ Pọl ọ be ta kpahe na. Amono a re su ahwo Ọghẹnẹ evaọ olẹ eva iwuhrẹ ukoko? Ezae efuafo, ikiẹrẹe, egba-egagọ ọvo enọ e be roma kpotọ lele eme nọ Ọghẹnẹ ọ ta evaọ Ikereakere na. (Ọtausiuwoma Na 12:13, 14) A rẹ jọ fuafo evaọ abọ-ẹzi gbe uruemu jẹ roma kpobi kẹ Jihova Ọghẹnẹ.

² Ekpako ukoko a rẹ mae ‘kpare abọ ọrẹri kpehru evaọ olẹ.’ Elẹ udu rai kpobi evaọ odẹ Jesu Kristi i re dhesẹ omarokpotọ kẹ Ọghẹnẹ, u ve je fiobọhọ kẹ ae whaha ẹwhọ gbe ofu. Evaọ uzẹme, ọzae kpobi nọ o wo uvẹ-ọghọ na nọ ọ rẹ l’olẹ ogbotu evaọ ukoko Ileleikristi ọ rẹ kare ofu, egrẹ, gbe ababọ-oruọzewọ kẹ Jihova gbe ukoko riẹ. (Jemis 1:19, 20) Ekpọvio Ebaibol efa vẹ e riẹ kẹ enọ i wo uvẹ-ọghọ nọ a re ro su amọfa evaọ olẹ ogbotu? Kọ ehri-izi Ikereakere jọ vẹ ma re fihọ iruo evaọ elẹ omobọ ohwo gbe erọ uviuwou?

Roro Kparo Kpahe Olẹ

3, 4. (a) Fikieme o jẹ rọ erere re ma kaki roro tao re ma tẹ te lẹ olẹ ogbotu? (b) Eme Ikereakere na i dhesẹ kpahe epanọ elẹ i re theri te?

³ A tẹ ta k’omai nọ ma jọ ogbotu lẹ, ẹsejọhọ ma rẹ dina roro kpahe olẹ na omojọ tao. Onana uruo u re fiobọhọ k’omai ta uzedhe eme nọ i fo, ababọ olẹ uthethei, onọ eme i re jo fi omai enu kie. Whaọ, a rẹ sae lẹ elẹ omobọ ohwo do via. E rẹ sai thei te epanọ ma gwọlọ. Jesu ọ lẹ aso okioke taure ọ tẹ te salọ ikọ 12 riẹ. Rekọ, okenọ ọ rehọ Ekareghẹhọ uwhu riẹ mu, elẹ riẹ kpahe ebrẹdi gbe udi na e jọ kpẹkpẹe. (Mak 14:22-24; Luk 6:12-16) Yọ ma riẹ nọ Ọghẹnẹ ọ jẹ elẹ ekpẹkpẹe Jesu rehọ re.

⁴ Ma rehọ iẹe nọ a s’owhẹ nọ who su uviuwou evaọ olẹ re a tẹ re emu. Olẹ utioye na o rẹ jọ kpẹkpẹe—rekọ umutho eme nọ a te ta kpobi e rẹ jọ uyere kẹ emuore na. Otẹrọnọ ma be jọ ogbotu lẹ taure a te ti mu uwuhrẹ Ileleikristi họ hayo nọ u te kuhọ no, u du fo nọ ma l’olẹ uthethei nọ a rẹ jọ fodẹ eware buobu hu. Jesu ọ whọku ikere-ebe na nọ e jẹ “rehọ ẹghẹ lẹ thethei.” (Luk 20:46, 47) Ohwo Ọghẹnẹ o re ru oware utioye he. Rekọ, ẹsejọ olẹ ogbotu nọ o rẹ dina thei u re kiehọ. Wọhọ oriruo, ọkpako nọ a salọ nọ ọ l’olẹ urere eva okokohọ o re roro kpahe iẹe ziezi, yọ ọ rẹ sae gwọlọ fodẹ eware buobu. Ghele na, makọ olẹ utioye na u re theri hrọ họ.

Nyabru Ọghẹnẹ avọ Oma Ọghọ

5. (a) Eme ma re wo họ iroro nọ ma tẹ rọ ogbotu lẹ? (b) Fikieme ma jẹ lẹ evaọ edhere ọghọ gbe adhẹẹ?

⁵ Ma tẹ be jọ ogbotu lẹ ma rẹ kareghẹhọ nọ orọnikọ ahwo-akpọ ma be t’ẹme kẹ hẹ. Ukpoye, mai yọ emama erahaizi nọ e be yare Olori Osu na Jihova. (Olezi 8:3-5, 9; 73:28) Fikiere ma re dhesẹ ozodhẹ adhẹẹ nọ ma gbe ro ru ei eva dha ha ẹkwoma eme nọ ma rẹ ta gbe oghẹrẹ nọ ma rọ tae. (Itẹ 1:7) Devidi ọso-ilezi na ọ so nọ: “Rekọ mẹ, dede, fiki uyoyou ra nọ u re kpoho ho na, [mẹ] rẹ te ruọ uwou ra; mẹ rẹ te gọ avọ ozọ-odhẹ evaọ uwou egagọ-ode ẹri ra.” (Olezi 5:7) Ma te wo uruemu utioye na, didi eme ma te ta a te s’omai re ma jọ ogbotu lẹ eva ewuhrẹ Isẹri Jihova? Whaọ, otẹrọnọ ma be t’ẹme kẹ ovie ohwo-akpọ, ma rẹ rehọ oma adhẹẹ gbe ọghọ t’ẹme kẹe. Kọ elẹ mai i gbe wo ọghọ gbe adhẹẹ viere, nọ ma be lẹ se Jihova na, “Ovie ebẹdẹ bẹdẹ” na? (Eviavia 15:3) Fikiere okenọ ma be lẹ, ma rẹ whaha eme wọhọ, “Jihova, ẹvẹ,” “Ma vi uyoyou mai s’owhẹ,” hayo, “Jọ tou.” Ikereakere na i dhesẹ nọ Ọmọ ọvo Ọghẹnẹ, Jesu Kristi, ọ t’ẹme kẹ Ọsẹ obọ odhiwu riẹ ere he.

6. Eme ma re wo h’iroro nọ ma tẹ ‘rehọ evaifihọ kpohọ agbara-uvie aruoriwo’?

⁶ Pọl ọ ta nọ: “Joma rehọ . . . eva i fihọ itioye na bikẹle akaba uvie aruoriwo na.” (Ahwo Hibru 4:16) Ma rẹ sae rehọ “eva i fihọ” bru Jihova ghelọ sebaẹgba mai fiki ẹrọwọ nọ ma fihọ idhe ẹtanigbo Jesu Kristi. (Iruẹru 10:42, 43; 20:20, 21) Ghele na, orọnikọ “eva i fihọ” itieye na i dhesẹ nọ ma re lele Ọghẹnẹ gbiku hu; hayo kọ ma rẹ t’eme orivo kẹe he. Ma tẹ gwọlọ nọ elẹ ogbotu mai e were Jihova, ma rẹ rehọ uvi adhẹẹ gbe ọghọ rọ lẹ, yọ o rẹ jọ thọthọ re ma rehọ olẹ kẹ owhowhovia, hrẹ amọfa, hayo kẹ ovuẹ ogbotu.

Rehọ Ẹzi Omarokpotọ Lẹ

7. Ẹvẹ Solomọn o ro dhesẹ omarokpotọ okenọ ọ jẹ lẹ eva eromudhe etẹmpol Jihova?

⁷ Makọ ma be lẹ evaọ ogbotu hayo kẹ omobọ mai, obọdẹ ehri-uzi Ikereakere jọ nọ ma rẹ kareghẹhọ họ ma re dhesẹ uruemu omarokpotọ evaọ elẹ mai. (2 Iruẹru-Ivie 7:13, 14) Solomọn ovie na o dhesẹ omarokpotọ evaọ olẹ ogbotu riẹ eva eromuo etẹmpol Jihova evaọ Jerusalẹm. Solomọn ọ nwani ku ebabọ uwou urirẹ jọ nọ a tu bọ fihọ otọakpọ na họ no. Ghele na, ọ rehọ omarokpotọ lẹ nọ: “Rekọ ghinọ uzẹme nọ Ọghẹnẹ ọ rẹ ria eva otọ akpọ na? Whaọ riri, odhiwu gbe odhiwu nọ o kpehru vievie e rẹ gba owhẹ hẹ; kabikọ uwou nana nọ mẹ bọ na!”—1 Ivie 8:27.

8. Idhere jọ vẹ a re ro dhesẹ omarokpotọ evaọ olẹ ogbotu?

⁸ Wọhọ Solomọn, ma rẹ roma kpotọ nọ ma te bi su amọfa evaọ olẹ ogbotu. Dede nọ ma rẹ nwane r’abọ kuoma lẹ hẹ, ma rẹ sai dhesẹ omarokpotọ evaọ uvo ẹmeọta mai. Olẹ omarokpotọ orọnikọ onọ a rẹ jọ ghrẹghrẹ uvo ho. Orọnikọ u re si iroro kpohọ ohwo nọ ọ be lẹ na ha, rekọ ro se Ọnọ a be lẹ se na. (Matiu 6:5) Omarokpotọ u re je dhesẹ oma via evaọ ẹme nọ ma rẹ ta evaọ olẹ. Ma tẹ rehọ omarokpotọ lẹ, orọnikọ ma re do ku Ọghẹnẹ hẹ inọ o ru eware lele ẹgwọlọ mai. Ukpoye, ma rẹ lẹ Jihova re o ru oware nọ o rọwo kugbe oreva ofuafo riẹ. Ọso-ilezi na ọ kẹ oriruo uvi uruemu nọ ọ lẹ nọ: “Siwi omai, ma lẹ owhẹ, ỌNOWO! O ỌNOWO, ma lẹ owhẹ, kẹ omai obọokparọ!”—Olezi 118:25; Luk 18:9-14.

Lẹ no Udu Ze

9. Emamọ ohrẹ Jesu vẹ a rẹ ruẹ eva Matiu 6:7, kọ ẹvẹ a re ro fi ei họ iruo?

⁹ Otẹrọnọ elẹ ogbotu gbe erọ omobọ mai e rẹ were Jihova, i re no udu ze hrọ. Fikiere, orọnikọ ma re dhe oghẹrẹ olẹ jọ ẹwẹwariẹ gheghe he ababọ eroro kpahe eme nọ ma be ta. Evaọ Ovuẹ obọ Ugbehru riẹ, Jesu ọ k’ohrẹ nọ: “Nọ wha te lẹ wha ta eme nọ iwo otọ họ wọhọ epanọ egedhọ na a rẹ ta ha; keme a roro [thọthọ] nọ a re ti yo ẹme rai fiki ọtabuo rai.” Ẹme na họ, Jesu ọ be ta nọ: “Wha mu eme ta ha; wha mu eme wariẹ hẹ.”—Matiu 6:7; NW, ẹme-otofa.

10. Fikieme u je fo re a lẹ kpahe oware ovo na ẹsibuobu?

¹⁰ Dede na, ma rẹ sae lẹ kpahe oware ovo na ẹsibuobu. Oyena o thọ họ keme Jesu ọ ta k’omai nọ: ‘Hẹ yare, a rẹ te kẹ owhai; hẹ guọlọ wha rẹ te ruẹ; hai kporo, a re ti rovie kẹ owhai.’ (Matiu 7:7) Ẹsejọhọ ẹgwọlọ ọ riẹ kẹ ebabọ Ọgwa Uvie ọkpokpọ keme Jihova ọ be ghale iruo usiuwoma ota na. (Aizaya 60:22) U re fo re ma hae wariẹ ẹgwọlọ ọnana okenọ ma te bi ru olẹ omobọ mai hayo evaọ olẹ ogbotu eva iwuhrẹ ahwo Jihova. Ere oruo orọnikọ u re dhesẹ nọ ‘ma bi mu wariẹ eme he.’

Kareghẹhọ Uyere gbe Ujiro

11. Ẹvẹ Ahwo Filipai 4:6, 7 u ro kiekpahe olẹ omobọ ohwo gbe orọ ogbotu?

¹¹ Okenọ a gwọlọ yare oware jọ ọvo ahwo buobu a jẹ lẹ, rekọ u fo re uyoyou mai kẹ Jihova Ọghẹnẹ o w’omai kẹe uyere gbe ujiro evaọ olẹ omobọ mai te erọ ogbotu. Pọl o kere nọ: “Wha ruawa oware ovo ho; rekọ eva koware koware rọ olẹ gbe olẹ-ayare, te uyere-okẹ he ro ruẹ, [nẹ] iyei epanọ whọ guọlọ kẹ Ọghẹnẹ. Re udhedhẹ Ọghẹnẹ nọ uvi eriariẹ kpobi, ote yọrọ eva gbe iroro rai eva Kristi Jesu.” (Ahwo Filipai 4:6, 7) Ẹhẹ, fiba olẹ gbe ayare, ma re yere Jihova kẹ eghale abọ-ẹzi gbe erọ iwo. (Itẹ 10:22) Ọso-ilezi na ọ so nọ: “Wha dheidhe akpẹwẹ iwẹegọ kẹ Ọghẹnẹ, wha vẹ jẹ hwaosa eya rai kẹ Oride na.” (Olezi 50:14) Eme urirẹ enana e rọ evaọ ile olẹ Devidi jọ: “Mẹ rẹ te suole kpẹwẹ odẹ Ọghẹnẹ; mẹ vẹ te rehọ akpẹwẹ dorohọ iẹ oma.” (Olezi 69:30) Kọ ma gbe ru epọvo na evaọ olẹ ogbotu gbe orọ omobọ mai?

12. Ẹvẹ Olezi 100:4, 5 o bi ro rugba nẹnẹ, kọ eme ma re yere je jiri Ọghẹnẹ kẹ?

¹² Kpahe Ọghẹnẹ, ọso-ilezi na ọ so nọ: “Wha ruọ unuighẹ riẹ avọ akpẹwẹ, wha jiri ei evaọ egua riẹ! Wha fa emamọ odẹ riẹ! Keme ỌNOWO o re wowoma; uyoyou riẹ o rẹ jọ bẹdẹ, gbe ohrọ riẹ o rẹ jọ no ige te ige.” (Olezi 100:4, 5) Nẹnẹ, ahwo erẹwho kpobi a be rueva ighẹ aruẹri Jihova, yọ ma rẹ rehọ fiki onana kẹe ujiro gbe uyere. Kọ who bi yere Ọghẹnẹ kẹ Ọgwa Uvie rai je dhesẹ ovuhumuo ra ẹkwoma etẹe nọ who re kpohọ ẹsikpobi kugbe enọ i you rie? Nọ whọ tẹ rọ etẹe, kọ whọ be rehọ udu ra kpobi ghrẹghrẹ urru evaọ ile ujiro gbe uyere kẹ Ọsẹ obọ odhiwu oyoyou mai?

Whọ Dhomovuọ Olẹ Hẹ

13. Oriruo Ikereakere vẹ u dhesẹ nọ ma rẹ yare Jihova ma tẹ maki roro nọ ma te he fiki oruthọ?

¹³ Ma tẹ maki roro nọ ma te he fiki udu obrukpe, ma rẹ nyabru Ọghẹnẹ evaọ olẹ. Okenọ ahwo Ju a raha uzi ẹkwoma ẹrehọ eyae erara, Ẹzra o te kigwẹ, kpare abọ omarokpotọ riẹ kẹ Ọghẹnẹ, jẹ rehọ omarokpotọ lẹ nọ: “E Ọghẹnẹ mẹ, oma ovuomẹ thesiwa vi epanọ mẹ rẹ rọ kpare ovao mẹ ri owhẹ, Ọghẹnẹ mẹ, keme imuomu mai i kpehru vi omai, gbe oruthọ mai o kpehru te odhiwu. No anwọ oke esẹ mai ze rite oke onana, ma rọ evaọ oruthọ ologbo . . . Nọ iye enana i te omai no na fiki umuomu gbe oruthọ ologbo mai na, ma tẹ jẹ ruẹ no nọ, whẹ Ọghẹnẹ mai ọ kẹ omai uye kawo vi epanọ umuomu mai u te, who te je siobọno ahwo otiọna nọ i kiọkọ kẹ omai, kọ ma vẹ jẹ wariẹ uzi ra raha, re ma kuomagbe ahwo ọnana rọwo orọwo, enọ i bi ru eware oma-uzue enana? Kọ who gbe ti muofu kẹ omai bẹsenọ whọ rẹ raha omai no, nọ ohwo ọvo o gbe ti kiọkọ hayo e dhẹ vabọ họ? O Ọghẹnẹ ỌNOWO Izrẹl, whẹ họ ọnọ o kiẹrẹe, keme mai enọ ikiọkọ nọ e dhẹ vabọ, wọhọ epaọ ẹdẹ inẹnẹ na. Riri, ma rọ eva aro ra avọ iruthọ mai keme ohwo ọvo nọ o re dikihẹ aro ra evaọ onana ọ rọ họ.”—Ẹzra 9:1-15; Iziewariẹ 7:3, 4.

14. Wọhọ epanọ a dhesẹ evaọ edẹ Ẹzra na, eme o gwọlọ re a sai wo erọvrẹ Ọghẹnẹ?

¹⁴ Re ma wo erọvrẹ Ọghẹnẹ, ekurẹriẹ o re lele evafa mai gbe ẹmọ “ibi nọ iwoma te ekurẹriẹ.” (Luk 3:8; Job 42:1-6; Aizaya 66:2) Evaọ edẹ Ẹzra, ekurẹriẹ ọvo o te he rekọ a j’owọ re a kpọ eyoma na vi ẹkwoma eyae erara nọ a siobọno. (Ẹzra 10:44; wawo 2 Ahwo Kọrint 7:8-13.) Ma tẹ be gwọlọ erọvrẹ Ọghẹnẹ kẹ oware uyoma jọ nọ ma ru, j’oma feva evaọ olẹ omarokpotọ jẹ mọ ibi nọ i fo ekurẹriẹ. Ẹzi ekurẹriẹ gbe ẹgwọlọ ẹruẹhọ eyoma na o rẹ jẹ w’omai gwọlọ obufihọ abọ-ẹzi ọrọ ekpako Ileleikristi na.—Jemis 5:13-15.

Wo Omosasọ no Olẹ Ze

15. Ẹvẹ oriruo Hana u ro dhesẹ nọ ma rẹ sae ruẹ omosasọ evaọ olẹ?

¹⁵ Otẹrọnọ oware jọ o lẹliẹ omai wo edada udu, ma rẹ sae ruẹ omosasọ evaọ olẹ. (Olezi 51:17; Itẹ 15:13) Ere Hana nọ o wo omarokpotọ na o ru. Ọ jẹ rria evaọ okenọ ohwo kpobi o re y’emọ buobu evaọ Izrẹl, rekọ o yẹ ọmọ ọvo ho. Ọzae riẹ, Ẹlkena, o wo emetẹ gbe emezae mi aye ọdekọ riẹ, Pẹnina, ọnọ ọ jẹ rọ Hana jijehwẹ inọ ọga. Hana ọ tẹ lẹ gaga jẹ y’eyaa nọ otẹrọnọ o yẹ ọmọ, ọ te “rehọ iẹe kẹ ỌNOWO na evaọ edẹ uzuazọ riẹ kpobi.” Avọ oma nọ o sasa e riẹ no fiki olẹ riẹ gbe eme Ozerẹ Okpehru na, Ilai, Hana “o gbe mu ovao họ ofa ha.” O te yẹ ọmọ nọ o se Samuẹle. Uwhremu na, ọ tẹ rehọ iẹe kpohọ iruo eva aruẹri Jihova. (1 Samuẹle 1:9-28) Avọ uyere kẹ ẹwo nọ Ọghẹnẹ o dhesẹ kẹe, ọ tẹ l’olẹ uyere—onọ u jiri Jihova wọhọ ọnọ o wo ibe he. (1 Samuẹle 2:1-10) Wọhọ Hana, ma rẹ sai wo omosasọ no olẹ ze, avọ evaifihọ nnọ Ọghẹnẹ o re yo ayare nọ o rọwo kugbe oreva riẹ kpobi. Okenọ ma te rovie eva mai kẹe, ma gbe “mu ovao họ ofa ha,” keme o ti si uye mai no hayo ọ te k’omai ẹgba thihakọ riẹ.—Olezi 55:22.

16. Wọhọ epanọ oriruo Jekọp o dhesẹ, fikieme ma jẹ lẹ okenọ ma tẹ rọ ozozọ hayo awa?

¹⁶ Otẹrọnọ uyero jọ o wha ozodhẹ, edada, hayo awaọruọ ze, ma siọ Ọghẹnẹ ba ẹdhẹbru hu rọkẹ omosasọ evaọ olẹ. (Olezi 55:1-4) Ozọ u je mu Jekọp okenọ ọ nya kẹle oniọvo riẹ, Esọ. Ghele na, Jekọp ọ lẹ nọ: “O Ọghẹnẹ ọsẹ mẹ Abraham gbe Ọghẹnẹ ọsẹ mẹ Aiziki, O ỌNOWO na nọ ọ ta kẹ omẹ nọ, ‘Zihe kpobọ orẹwho ra gbe orua ra, re me ti ru owhẹ woma,’ me woma te abọvo eru kpobi gbe uzẹme kpobi nọ who dhesẹ kẹ odibo ra ha, keme mẹ avọ ọkpọ ọvo mẹ rọ nya Jọdan ọnana vrẹ; enẹna me te zihe ruọ ekuahwo ivẹ. Siwi omẹ, mẹ lẹ owhẹ, no obọ oniọvo ọmọzae mẹ, ro no obọ Esọ, keme ozọ riẹ u bi mu omẹ, re ọ seba ẹnyaze ti kpe omai kpobi, ini na avọ emọ na. Rekọ whọ ta nọ, ‘Me re ti ru owhẹ woma, je ru iruọmọ ra wọhọ uwẹkpẹ abade, nọ a rẹ sai kele he fiki ebuo.’ ” (Emuhọ 32:9-12) Esọ ọ họre Jekọp avọ ogbotu riẹ hẹ. Fikiere Jihova o ru Jekọp “woma” evaọ etẹe.

17. Rọwo kugbe Olezi 119:52, ẹvẹ olẹ o sae rọ k’omai omosasọ okenọ ma tẹ rọ odawọ ulogbo?

¹⁷ Evaọ oke olẹ mai, ma rẹ sai wo omosasọ no eware nọ a jọ Ẹme Ọghẹnẹ ta ze. Evaọ olezi nọ ọ mai theri kpobi na—olẹ uwowoma nọ a kporo ile fihọ—ẹsejọhọ Hẹzikaya ọmọ-ovie họ ọnọ ọ so nọ: “O ỌNOWO, no mẹ kareghẹhọ izi ra nọ anwae ze, me te wo oma osasọ.” (Olezi 119:52) Evaọ olẹ omarokpotọ evaọ okenọ ma tẹ rọ otọ odawọ ulogbo, ma rẹ sae kareghẹhọ ehri-uzi Ebaibol hayo uzi nọ o rẹ sai fiobọhọ k’omai le edhere nọ o rẹ wha imuẹro omosasọ ze inọ ma be were Ọsẹ odhiwu mai.

Ahwo Omarokpotọ A re Thihakọ Evaọ Olẹ

18. Fikieme a jẹ sae ta nọ ‘ọnọ ọ rọ ọrọ Ọghẹnẹ kpobi ọ rẹ lẹ sei’?

¹⁸ Ahwo nọ a be roma kpotọ kẹ Jihova Ọghẹnẹ kpobi a rẹ “lẹ kẹse kẹse.” (Ahwo Rom 12:12) Evaọ Olezi avọ 32, ẹsejọhọ onọ Devidi o kere evaọ okenọ ọ thuzi kugbe Batshẹba no, o dhesẹ akọriọ riẹ fikinọ ọ yare erọvrẹ hẹ jegbe ududhomẹno nọ ekurẹriẹ avọ evafa kẹ Ọghẹnẹ e wha sei. Devidi ọ tẹ so nọ: “Fikiere [fikinọ erọvrẹ Jihova e rọ kẹ enọ i ghine kurẹriẹ] jọ ọnọ ọ rọ ọrọ Ọghẹnẹ ọ te lẹ owhẹ, oke onana nọ a rẹ gwọlọ owhẹ ruẹ na.”—Olezi 32:6.

19. Fikieme ma jẹ kpare abọ omarokpotọ evaọ olẹ?

¹⁹ Ma te rri usu mai kugbe Jihova Ọghẹnẹ ghaghae, ma rẹ lẹ kẹ ohrọ riẹ fiki idhe ẹtanigbo Jesu. Evaọ ẹrọwọ, ma rẹ sae rehọ uvẹ ẹmeọta nana kpohọ agbara-uvie aruoriwo re ma wo ohrọ gbe obufihọ ẹruoke. (Ahwo Hibru 4:16) Rekọ ẹjiroro buobu e riẹ nọ ma rẹ rọ lẹ! Fikiere j’oma “lẹ kẹse kẹse”—ẹsibuobu avọ eme ujiro gbe uyere se Ọghẹnẹ. (1 Ahwo Tẹsalonika 5:17) T’uvo t’aso, j’oma kpare abọ omarokpotọ kpehru evaọ olẹ.

Ẹvẹ Whọ te k’Uyo?

◻ Didi erere ọ riẹ re a roro kparo kpahe olẹ ogbotu?

◻ Fikieme ma jẹ lẹ evaọ edhere adhẹẹ gbe ọghọ?

◻ Didi ẹzi ma re dhesẹ evaọ okenọ ma tẹ be lẹ?

◻ Okenọ ma tẹ be lẹ, fikieme ma jẹ kareghẹhọ uyere gbe ujiro?

◻ Ẹvẹ Ebaibol na o ro dhesẹ nọ ma rẹ sai wo omosasọ no olẹ ze?

[Picture on page 15]

Solomọn ovie na o dhesẹ omarokpotọ evaọ olẹ ogbotu riẹ eva eromudhe etẹmpol Jihova

[Pictures on page 16]

Wọhọ Hana, whọ rẹ sai wo omosasọ no olẹ ze