Fikieme Ma Je Dhe Ẹlẹlẹ?

“Wha he dhe ẹlẹlẹ. Wha kẹ iyere eva eware kpobi.”—1 Ahwo Tẹsalonika 5:17, 18.

1, 2. Ẹvẹ Daniẹl o ro dhesẹ nnọ o rri uvẹ olẹ ghaghae, kọ abọ vẹ oyena u wo kpahe usu riẹ kugbe Ọghẹnẹ?

WỌHỌ uruemu riẹ, Daniẹl ọruẹaro na ọ jẹ hae lẹ se Ọghẹnẹ isiasa okpẹdẹ. O re kiguẹ lẹ eva unwido ubruwou ehru orọ uwou riẹ, onọ o rẹriẹ ovao ku okpẹwho Jerusalẹm. (1 Ivie 8:46-49; Daniẹl 6:10) Makọ okenọ ujaje ovie o whaha olẹ nọ a rẹ lẹ se omọfa ajokpa Dariọs, ovie ahwo Midia na, udu u nyuhu Daniẹl oke ovo ho. Makọ u fi uzuazọ riẹ họ ọza hayo u fi rie họ ọza ha, yọ ọzae nana nọ ọ rẹ lẹ gaga na ọ jẹ lẹ se Jihova ẹsikpobi.

² Ẹvẹ Jihova o rri Daniẹl? Okenọ Gebriẹl ẹnjẹle na ọ nyaze te kuyo ayare Daniẹl jọ, o dhesẹ ọruẹaro na wọhọ ‘ohwo nọ a you gaga.’ (Daniẹl 9:20-23) Evaọ eruẹaruẹ Izikiẹl, Jihova ọ ta kpahe Daniẹl wọhọ ọzae okiẹrẹe. (Izikiẹl 14:14, 20) Eva ikpe uzuazọ riẹ, elẹ Daniẹl i ghine fi obọ họ kẹe bọ usu okpekpe kugbe Ọghẹnẹ riẹ, oware nọ Dariọs o tube vuhumu.—Daniẹl 6:16.

3. Wọhọ epanọ oware nọ o via kẹ imishọnare jọ u dhesẹ, ẹvẹ olẹ o sai ro fi obọ họ kẹ omai yọrọ ẹgbakiete?

³ Olẹ ikẹse kẹse o rẹ sai fi obọ họ kẹ omai fi edawọ ebẹbẹ kparobọ. Wọhọ oriruo, roro kpahe oware nọ o via kẹ Harold King, imishọnare evaọ China nọ a fihọ uwou-odi omọvo goli evaọ ikpe isoi. Kpahe eware nọ ọ rehọ ẹro ruẹ, Oniọvo na King ọ ta nọ: “A sae hẹriẹ omẹ no ahwo, rekọ ohwo ọvo ọ rẹ sae hẹriẹ omẹ no Ọghẹnẹ hẹ. . . . Fikiere, eva iraro ahwo kpobi nọ a rẹ sae ruẹ omẹ nọ a tẹ be nya uwou-odi mẹ vrẹ, mẹ jẹ hae kiguẹ isiasa okpẹdẹ lẹ ruarua, be kareghẹhọ Daniẹl nọ Ebaibol o gbiku riẹ. . . . Eva oke yena o wọhọ nọ ẹzi Ọghẹnẹ ọ kpọ iroro mẹ rri eware nọ e rẹ mae kẹ erere, o te je ru udu kie omẹ vi. Ẹgba abọ-ẹzi gbe omosasọ nọ me wo no olẹ ze ọ rro kẹhẹ!”

4. Enọ vẹ kpahe olẹ ma te ta ẹme te evaọ uzoẹme uwuhrẹ onana?

⁴ Ebaibol na e ta nọ: “Wha he dhe ẹlẹlẹ. Wha kẹ iyere eva eware kpobi.” (1 Ahwo Tẹsalonika 5:17, 18) Fiki ohrẹ onana, joma kiẹ enọ nana riwi: Fikieme ma je fi ẹro hotọ ziezi kẹ elẹ mai? Ẹjiroro vẹ ma wo nọ ma rẹ rọ lẹ se Jihova kẹse kẹse? Kọ eme u fo nọ ma re ru otẹrọnọ o rrọ omai oma nnọ ma te ohwo nọ ọ rẹ lẹ se Ọghẹnẹ hẹ fiki iruthọ mai?

Bọ Usu Ẹkwoma Olẹ

5. Obọdẹ usu vẹ olẹ u re fi obọ họ kẹ omai reawere riẹ?

⁵ Kọ whọ gwọlọ nọ Jihova o rri owhẹ wọhọ ogbẹnyusu riẹ? Ere o dhesẹ ọsẹ-orua na Abraham. (Aizaya 41:8; Jemis 2:23) Jihova ọ gwọlọ nọ ma bọ oghẹrẹ usu utioye na kugbei. O tube zizie omai re ma si kẹle iẹe. (Jemis 4:8) Kọ uzizie oyena u gbe ru omai roro kpahe obọdẹ ọruẹrẹfihotọ ọrọ olẹ? Ẹvẹ o bẹ te re a mi uvẹ nọ a rẹ rọ t’ẹme kugbe ohwo ologho egọmeti jọ, kabikọ usu nọ a re mu kugbei! Ghele na, Ọnọma ehrugbakpọ na ọ ta udu họ omai awọ nnọ ma nya bru ei oke kpobi nọ u je omai ẹkwoma olẹ. (Olezi 37:5) Elẹ ikẹse kẹse mai i re fi obọ họ kẹ omai bọ usu okpekpe kugbe Jihova.

6. Eme oriruo Jesu o wuhrẹ omai kpahe ẹgwọlọ nọ ma re ro “dhe ẹlẹlẹ”?

⁶ Rekọ dai rri epanọ o lọhọ te re ma rri olẹ vo! Ebẹbẹ uzuazọ ekẹdẹ kẹdẹ nọ ma rẹriẹ ovao dhe e rẹ sae rehọ oke mai kpobi te epanọ ma gbẹ sae ruẹ uvẹ nọ ma rẹ rọ lẹ se Ọghẹnẹ hẹ. Jesu ọ ta udu họ ilele riẹ awọ nọ a ‘hẹ lẹ ẹsikpobi,’ yọ ere ọye omariẹ o ru. (Matiu 26:41) Dede nọ uvẹ o jọ kẹe he no ohiohiẹ rite aso, o fi oke họ nọ ọ jẹ rọ lẹ se Ọsẹ obọ odhiwu riẹ. Ẹsejọ Jesu ọ kparoma ‘eva irioke ilogbo, nọ oke u ri rie he,’ re ọ ruẹse lẹ. (Mak 1:35) Oke ofa nọ iruo okpẹdẹ na i kuhọ no, o kpohọ oria nọ o rẹ fọfọ re ọ ruẹse lẹ se Jihova. (Matiu 14:23) Ẹsikpobi Jesu o je fi oke họ nọ ọ rẹ rọ lẹ, yọ ere u fo nọ ma re ru.—1 Pita 2:21.

7. Iyero vẹ e rẹ wọ omai lẹ se Ọsẹ obọ odhiwu mai kẹdẹ kẹdẹ?

⁷ Oke nọ u fo nọ ma rẹ rọ lẹ olẹ omobọ mai i re rovie oma fihọ ẹsibuobu eva okpẹdẹ nọ ma be rẹriẹ ovao dhe ebẹbẹ, nyaku edawọ, jẹ be jẹ iroro na. (Ahwo Ẹfẹsọs 6:18) Nọ ma tẹ be yare ọkpọvio Ọghẹnẹ evaọ kabọ kabọ uzuazọ mai, usu nọ ma wo kugbei o te ghinẹ rro haro. Kọ egbẹnyusu ivẹ a tẹ rẹriẹ ovao dhe ẹbẹbẹ ọvo, usu rai o gbẹ ga viere? (Itẹ 17:17) Epọvo na usu mai kugbe Jihova o te ga viere okenọ ma tẹ rẹro so ẹe jẹ ruẹ obufihọ riẹ.—2 Iruẹru-Ivie 14:11.

8. Ro no iriruo Nehemaya, Jesu, gbe Hana ze, eme ma wuhrẹ kpahe epanọ elẹ mai i re theri te?

⁸ Ẹvẹ eva e rẹ sae were omai te inọ Ọghẹnẹ o fi uwhru fihọ epanọ elẹ mai i re theri hayo kiti te he nọ ma tẹ be lẹ sei! Nehemaya ọ lẹ heva kpẹkpẹe taure ọ tẹ te yare oware jọ mi ovie Pasia. (Nehemaya 2:4, 5) Jesu ọ lẹ kpẹkpẹe re eva okenọ ọ yare Jihova nnọ ọ kẹe ogaga nọ ọ rẹ rọ kpare Lazarọs. (Jọn 11:41, 42) Evaọ abọdekọ riẹ, Hana ‘ọ raha oke ziezi lẹ ỌNOWO’ na eva okenọ o je horie eva riẹ kpobi kẹe. (1 Samuẹle 1:12, 15, 16) Elẹ omobọ mai e rẹ sae jọ kpẹkpẹe hayo thethei wọhọ epanọ ẹgwọlọ gbe uyero na u kie fihọ.

9. Fikieme ma je fi uyere gbe ajiri ba elẹ mai rọkẹ eware kpobi nọ Jihova o bi ru kẹ omai?

⁹ Elẹ buobu nọ e rrọ Ebaibol na i dhesẹ ovuhumuo odidi kẹ ọkwa okpehru Jihova gbe iruo igbunu riẹ. (Ọnyano 15:1-19; 1 Iruẹru-Ivie 16:7-36; Olezi 145) Jọn ukọ na ọ jọ evaọ eruẹaruẹ ruẹ ekpako 24 na—unu ogbagba orọ Ileleikristi nọ a wholo na evaọ ẹta obọ odhiwu rai—bi jiri Jihova, anọ: “Who teri, eyo Ọnowo nọ o re mie oro gbe adhẹẹ gbe ogaga, keme whẹ ọ ma eware na kpobi, jegbe fiki awere ra a rọ rọ, a rọ mae na.” (Eviavia 4:10, 11) Ma wo iroro evo na nọ ma re ro jiri Ọnọma na kẹse kẹse. Ẹvẹ eva e rẹ were ọsẹgboni te nọ ọmọ rai o te yere ai no eva ze rọkẹ oware nọ a ru kẹe! Ma tẹ be rehọ edẹro roro kpahe ẹwo Jihova jẹ be kẹ uyere no eva ze fiki rai yọ emamọ edhere jọ nọ ma re ro ru elẹ mai woma viere.

“He Dhe Ẹlẹlẹ”—Fikieme?

10. Abọ vẹ olẹ u wo evaọ ẹbọga ẹrọwọ mai?

¹⁰ Olẹ ikẹse kẹse o r’oja kẹ ẹrọwọ mai. Nọ ọ kẹ ọtadhesẹ kpahe ẹgwọlọ nọ a ‘rẹ rọ lẹ kẹse kẹse ababọ oma nọ o rẹ rrọ ae,’ Jesu ọ tẹ nọ inọ: “Nọ Ọmọ ohwo ọ te tha, kọ ọ rẹ te ruẹ ẹrọwọ eva akpọ na?” (Luk 18:1-8) Emamọ olẹ nọ u no eva ze o rẹ bọ ẹrọwọ ga. Nọ Abraham ọsẹ-orua na ọ be kpako no yọ o rri yẹ ọmọ họ, ọ lẹ se Ọghẹnẹ kpahe ẹme na. Evaọ uyo, Jihova ọ tẹ kake ta kẹe nnọ o rri idhiwu re o kele isi na, otẹrọnọ ọ rẹ sai ru ere. Kẹsena Ọghẹnẹ ọ tẹ kẹ Abraham imuẹro nọ: “Ere emọ ra i re ti bu te.” Eme họ ukuhọ riẹ? Abraham “ọ tẹ rọwo ẹme nọ ỌNOWO ọ ta na, a je kele iei gbe ẹrẹreokie kẹ e.” (Emuhọ 15:5, 6) Ma te horie eva mai kẹ Jihova evaọ olẹ, jẹ imuẹro riẹ nọ i no Ebaibol ze rehọ, je yo ẹme kẹe, ọ te bọ ẹrọwọ mai ga.

11. Ẹvẹ olẹ o sai ro fi obọ họ kẹ omai yeri kugbe ebẹbẹ?

¹¹ Olẹ o rẹ sai je fi obọ họ kẹ omai ku ẹbẹbẹ họ. Kọ uzuazọ mai gbe iyero nọ ma be rẹriẹ ovao dhe kẹdẹ kẹdẹ e be k’omai idhovẹ? Ebaibol na e ta k’omai nọ: “Gbolo owha ra kẹ ỌNOWO na, o re ti fiobọhọ kẹ owhẹ; ọ rẹ rọwa re okiẹrẹe na o kie he.” (Olezi 55:22) Nọ iroro e tẹ be bẹ omai ẹjẹ, ma rẹ sae raro kele oriruo Jesu. Ọ lẹ aso okioke taure ọ tẹ te salọ ikọ 12 riẹ. (Luk 6:12-16) Yọ eva aso taure o te whu, Jesu ọ lẹ ga te epanọ “ẹroyẹ riẹ ọ tẹ wọhọ egẹ azẹ ilogbo nọ i bi kie otọ.” (Luk 22:44) Eme o no rie ze? “A te yo kẹe fiki ozọ-odhẹ Ọghẹnẹ riẹ.” (Ahwo Hibru 5:7) Elẹ ajọwha ikẹse kẹse mai i ti fi obọ họ kẹ omai thihakọ iyero idhọvẹ gbe edawọ egaga.

12. Oghẹrẹ vẹ uvẹ olẹ u ro dhesẹ isiuru nọ Jihova o wo kpahe omai?

¹² Oware ofa nọ o rẹ lẹliẹ omai rehọ ẹkwoma olẹ si kẹle Jihova họ, o ti si kẹle omai re. (Jemis 4:8) Nọ ma te rovie udu mai kẹ Jihova evaọ olẹ, kọ ma gbe bi vuhumu nnọ o wo isiuru kpahe ẹgwọlọ mai jẹ be rẹro te omai ziezi? Ma be ruẹ uyoyou nọ Ọghẹnẹ o bi dhesẹ kẹ omai omomọvo. Jihova ọ re rehọ iruo na kẹ omọfa ha re ọ hẹ gaviezọ elẹ nọ omomọvo idibo riẹ a be hae lẹ sei wọhọ Ọsẹ obọ odhiwu rai. (Olezi 66:19, 20; Luk 11:2) Yọ o zizie omai re ma rehọ ‘iroro ejẹ mai kpobi kpahe iẹ keme ọye ọ be sẹro mai.’—1 Pita 5:6, 7.

13, 14. Ejiroro vẹ ma wo nọ ma re ro dhe ẹlẹlẹ?

¹³ Olẹ o rẹ sae kẹ omai ọwhọ viere kẹ odibọgba na jẹ bọ omai ga eva okenọ ababọ osegboja hayo ọwọsuọ e tẹ be gwọlọ ru omai si uke kpemu. (Iruẹru 4:23-31) Olẹ o rẹ sae jẹ thọ omai no “ereghẹ ukumuomu” na. (Ahwo Ẹfẹsọs 6:11, 17, 18) Okenọ ma tẹ be ya re ma fi edawọ ikẹdẹ kẹdẹ kparobọ, ma rẹ sae yare Ọghẹnẹ kẹse kẹse re ọ kẹ omai ẹgba. Olẹ oriruo Jesu u kugbe ayare na inọ Jihova o ‘si omai no obọ oyoma na,’ Setan Ẹdhọ na.—Matiu 6:13.

¹⁴ Ma tẹ ruabọhọ lẹ kẹ obufihọ nọ ma rẹ rọ kpọ iroro uzioraha mai, ma te ruẹ obufihọ Jihova. Ma wo imuẹro nana: “Ọghẹnẹ avọ ọtẹruo, ọ nọ o re je ẹdawọ nọ ọ ro vi owhẹ o te owhẹ hẹ; rekọ ọ rẹ jọ eva ẹdawọ na ru epanọ owhẹ rẹ rọ va ae abọ, re whọ ruẹse sai thihi-akọ riẹ.” (1 Ahwo Kọrint 10:13) Pọl ukọ na omariẹ o wo ẹruọsa Jihova nọ o kẹ riẹ ọbọga evaọ iyero buobu. Ọ ta nọ: “Mẹ rẹ sai ru eware kpobi eva ọnọ ọbe kẹ omẹ eri.”—Ahwo Filipai 4:13; 2 Ahwo Kọrint 11:23-29.

Ruabọhọ Olẹ Ghelọ Ethobọ

15. Eme ọ rẹ sae via otẹrọnọ uruemu mai u te itee Ọghẹnẹ hẹ?

¹⁵ Re a ruẹse kpahe fihọ elẹ mai, o gbahọ nọ ma re dede uthubro Ẹme Ọghẹnẹ rehọ. Jọn ukọ na o kere nọ: “Koware koware nọ ma jọ obọ riẹ yare u re te omai obọ, keme ma bi koko ijaje riẹ je bi ruẹ eware nọ e rẹ were iẹ.” (1 Jọn 3:22) Rekọ eme ọ rẹ sae via nọ iruẹru mai e gbẹ be nyate itee Ọghẹnẹ hẹ? Adamu avọ Ivi a dhẹ dhere okenọ a raha uzi no evaọ ọgbọ Idẹn. Oma o rẹ sai ru omai re ma si oma no “aro ỌNOWO na” re, jẹ se olẹ ba. (Emuhọ 3:8) Klaus, ọsẹro ọnyawariẹ nọ o wo ona ziezi ọ ta nọ: “Me muẹrohọ inọ owojẹ othọthọ ọsosuọ nọ enọ i bi reghe no abọ Jihova gbe ukoko riẹ a rẹ mae jẹ họ, a rẹ se olẹ ba.” (Ahwo Hibru 2:1) Enẹ o via kẹ José Ángel. Ọ ta nọ: “Eva unwenọ ikpe eree soso, udu gaga mẹ jẹ rọ lẹ se Jihova. Dede nọ mẹ gbẹ rehọ iẹe wọhọ Ọsẹ obọ odhiwu mẹ, o jọ omẹ oma nọ me gbe te ohwo nọ ọ rẹ lẹ sei hi.”

16, 17. Dhesẹ iriruo epanọ elẹ ikẹse kẹse e sai ro fi obọ họ kẹ omai fi omoyẹlẹ abọ-ẹzi kparobọ.

¹⁶ O rẹ sae jọ omai otujọ oma inọ ma te he re ma lẹ fiki omoyẹlẹ abọ-ẹzi hayo fikinọ ma kie ruọ eyoma-oruo. Rekọ oke onana họ uzedhe oke nọ o gwọlọ nnọ ma re wo erere no ọruẹrẹfihotọ olẹ ze vọvọ. Jona ọ dhẹ no iruo nọ a kẹ riẹ. Rekọ ‘Jona o bo se ỌNOWO na eva uye riẹ, o te yo kẹe; eva Ẹri na Jona o je bo, ỌNOWO o te yo uru riẹ.’ (Jona 2:2) Jona ọ lẹ, Jihova o yo olẹ riẹ, Jona ọ tẹ wariẹ kpokpọ eva abọ-ẹzi.

¹⁷ José Ángel ọ rehọ ajọwha lẹ kẹ obufihọ re. Ọ ta nọ: “Me rovie eva mẹ, mẹ tẹ yare Ọghẹnẹ kẹ erọvrẹ. Yọ o ghine fi obọ họ kẹ omẹ. Me roro nnọ mẹ hae zihe ze ukoko na ha o gbẹ rrọ obufihọ olẹ hẹ. Enẹna mẹ be hẹ lẹ ẹsikpobi kẹdẹ kẹdẹ, yọ me bi rri haro kpohọ uvẹ olẹ ikẹdẹ kẹdẹ na.” Jọ ma hẹ lẹ via kẹ Ọghẹnẹ kpahe ethobọ mai re ma jẹ rehọ oma kpotọ yare erọvrẹ riẹ. Okenọ Devidi Ovie na ọ fa izieraha riẹ, Jihova ọ rehọ iruthọ riẹ rọ vrẹe. (Olezi 32:3-5) Jihova ọ gwọlọ fi obọ họ k’omai, orọnikọ re o brukpe mai hi. (1 Jọn 3:19, 20) Yọ olẹ ekpako nọ e rrọ ukoko na e rẹ sai fi obọ họ kẹ omai eva abọ-ẹzi, keme ayare otiọye na o re “ru iruo ilogbo.”—Jemis 5:13-16.

18. Udufihọ vẹ idibo Ọghẹnẹ e rẹ sai wo ghelọ epanọ a ghoro thabọ te kẹhẹ?

¹⁸ Kọ ọsẹ jọ ọ riẹ nọ ọ rẹ se ọmọ nọ ọ roma kpotọ nya bru ei kẹ ohrẹ gbe obufihọ eva okenọ o te ru thọ? Ohare ọmọ ogbọfariẹ na u dhesẹ inọ oghẹrẹ nọ ma maki ghoro thabọ te kẹhẹ, Ọsẹ obọ odhiwu mai ọ rẹ ghọghọ nọ ma te kurẹriẹ bru ei ze. (Luk 15:21, 22, 32) Jihova ọ tuduhọ enọ i ru thọ kpobi inọ a bo se ei, ‘keme ọ rẹ te rehọ vrẹ buobu.’ (Aizaya 55:6, 7) Dede nọ Devidi ọ thọ izi ilogbo buobu, o bo se Jihova, ta nọ: “Ọghẹnẹ rovie ezọ kẹ elẹ mẹ, who kuomadhere kẹ ayare mẹ hẹ!” Ọ ta re inọ: “Makọ owọwọ hayo ohiohiẹ, te oke-uvo me re gu ẹkẹ-unu mẹ rọ kẹ e, [Jihova] o ve ti yo uru mẹ.” (Olezi 55:1, 17) Ọbọga riẹ ọ rro kẹhẹ!

19. Fikieme ma gbe ku ei họ họ inọ elẹ nọ o wọhọ nọ a be kẹ iyo rai hi na yọ imuẹro nnọ Ọghẹnẹ ọ jẹ rai rehọ họ?

¹⁹ Kọ a gbẹ kpahe fihọ elẹ mai ẹsiẹsiẹ hẹ? Koyehọ ma rẹ daoma ruẹ nnọ ayare mai o rọwo kugbe oreva Jihova gbe nnọ ma rehọ odẹ Jesu lẹ. (Jọn 16:23; 1 Jọn 5:14) Jemis olele na ọ ta kpahe Ileleikristi jọ nọ a yo elẹ rai hi fikinọ a be “yare thọ.” (Jemis 4:3) Evaọ abọdekọ riẹ, ajọ o vẹrẹ omai obọ họ re ma ku ei họ nnọ elẹ nọ o wọhọ nọ a be kẹ iyo rai hi na kpobi yọ imuẹro inọ Ọghẹnẹ ọ jẹ rai rehọ họ. Ẹsejọ, Jihova ọ rẹ kuvẹ kẹ idibo ẹrọwọ re a gbẹ hae lẹ kẹ oware jọ evaọ umutho oke taure ọ tẹ kẹ uyo. Jesu ọ ta nọ: ‘Wha gbẹ hẹ yare, a rẹ te kẹ owhai.’ (Matiu 7:7) Fikiere, o gwọlọ re ma “hẹ lẹ kẹse kẹse.”—Ahwo Rom 12:12.

Lẹ Ẹsikpobi

20, 21. (a) Fikieme o jẹ gwọlọ nọ ma hae dhe ẹlẹlẹ evaọ “edẹ urere” nana? (b) Eme o ti te omai obọ nọ ma te bi bikẹle agbara-uvie ọ aruoriwo Jihova kẹdẹ kẹdẹ?

²⁰ Itunyẹ gbe ebẹbẹ i bi vihọ evaọ “edẹ urere oke ẹbẹbẹ” nana. (2 Timoti 3:1) Yọ edawọ e rẹ sae da iroro mai fia. Dede na, olẹ ikẹse kẹse mai o te lẹliẹ omai tẹrovi ẹnyaharo abọ-ẹzi ghelọ ebẹbẹ, edawọ, gbe elọhoma nọ e rẹ roma via ẹsikpobi. Elẹ nọ ma rẹ lẹ se Jihova kẹdẹ kẹdẹ e rẹ sae kẹ omai obọdẹ uketha nọ ma gwọlọ.

²¹ Eware i re bu Jihova, “ọnọ o re yo elẹ” na, abọ hrọ họ nọ o gbe ro yo elẹ mai hi. (Olezi 65:2) Ajọ eware i bu omai abọ hrọ họ nọ ma gbẹ rọ lẹ sei hi. Usu mai kugbe Ọghẹnẹ họ oware nọ ma wo nọ o mae ghare kpobi. Jọ ma rri rie vo vievie he. “Fikiere joma rehọ fiki eva i fihọ [itieye] na bikẹle akaba uvie aruoriwo na, re ma ruẹse wo ohrọoriọ, gbe aruoriwo eva ẹdẹ okuba.”—Ahwo Hibru 4:16.

Ẹvẹ Whọ te k’Uyo?

• Eme ma wuhrẹ mi Daniẹl ọruẹaro na kpahe epanọ olẹ o ghare te?

• Ẹvẹ ma sae rọ bọ usu mai ga kugbe Jihova?

• Fikieme ma je dhe ẹlẹlẹ?

• Fikieme iroro inọ ma te he e gbẹ whaha omai ẹlẹ se Jihova ha?

[Uwoho nọ o rrọ ẹwẹ-obe avọ 14]

Nehemaya ọ lẹ h’eva kpẹkpẹe taure ọ tẹ te ta ẹme kẹ ovie na

[Uwoho nọ o rrọ ẹwẹ-obe avọ 15]

Hana ‘ọ raha oke ziezi lẹ se ỌNOWO na’

[Iwoho nọ e rrọ ẹwẹ-obe avọ 16]

Jesu ọ lẹ aso okioke taure ọ tẹ salọ ikọ 12 riẹ

[Iwoho nọ e rrọ ẹwẹ-obe avọ 18]

Uvẹ nọ a rẹ rọ lẹ i re rovie fihọ eva okpẹdẹ na soso