Kọ Whọ Be Hae Nọ re A Dhesẹ Amọfa nọ A rẹ Sai Wo Isiuru k’Owhẹ?
Otẹrọnọ who bi ru obe-uwuhrẹ Ebaibol kugbe ohwo jọ enẹna, kọ whọ gbẹ nọ ọmọ-uwuhrẹ na sọ o wo egbẹnyusu, imoni, hayo egbẹrioma jọ nọ o te were re a wuhrẹ oware nọ o rrọ Ebaibol na? Ẹsejọhọ ọmọ-uwuhrẹ na ọ te fodẹ edẹ ahwo jọ. Nọ ọmọ-uwuhrẹ na ọ tẹ rọwo nọ who se odẹ riẹ, se odẹ riẹ nọ whọ tẹ nyabru ahwo tiọye na re who wuhrẹ Ebaibol kugbe ai. Whọ sae ta nọ, “[Odẹ ọmọ-uwuhrẹ na] ọ be reawere uwuhrẹ Ebaibol na, yọ o roro nọ o te were owhẹ re who wo erere no omaa uwuhrẹ Ebaibol ọvọvẹ nọ ma re ru kugbe ahwo ze.” Kẹsena whọ vẹ rehọ obe ọ Ebaibol Wuhrẹ na ro dhesẹ epanọ a re ru uwuhrẹ na.
Otẹrọnọ who wo ọmọ-uwuhrẹ nọ o bi wo ẹnyaharo ziezi, whọ sae tuduhọ iẹe awọ re o gbiku ọruẹrẹfihotọ uwuhrẹ na kẹ egbẹnyusu gbe ahwo uviuwou riẹ enọ o rẹ sae were. Ọ sai zizie ai re a jariẹ evaọ oke uwuhrẹ na. Hayo otẹrọnọ oyena o lọhọ họ, ọ sai ru epanọ whọ rẹ rọ rue rai re who dhesẹ epanọ uwuhrẹ na o rẹ jọ kẹ ai. Onana uruo u ti fiobọhọ kẹ ọmọ-uwuhrẹ na re o mu eriariẹ Ebaibol nọ o bi wuhrẹ na họ ẹta kẹ amọfa.
Ahwo nọ who re weze bru kẹse kẹse a sai je dhesẹ amọfa k’owhẹ, o tẹ make rrọ nọ ae omarai a re jẹ obe-uwuhrẹ Ebaibol ikẹse kẹse rehọ họ. Nọ whọ tẹ rehọ obe ọ Ebaibol Wuhrẹ na kẹ ai, whọ rẹ sae nọ inọ, “Kọ whọ riẹ ohwo jọ nọ o te were re o wo obe nana?”
Fikinọ oke na o be dhẹ kpata kpata, ma gwọlọ rehọ edhere nọ o rẹ sae lọhọ kpobi ro fiobọhọ kẹ ahwo yo je dede emamọ usi na rehọ. Kọ Whọ Be Hae Nọ re A Dhesẹ Amọfa nọ A rẹ Sai Wo Isiuru k’Owhẹ?