Epanọ Ma Sai Ro Wo Onaa Ziezi Evaọ Usiuwoma Ota—Fiobọhọ Kẹ Enọ I “Wo Emamọ Eva” Zihe Ruọ Ilele

OWARE NỌ U RO WUZOU: Jihova o re ru ibi uzẹme na rro evaọ idu ahwo nọ “a wo emamọ eva nọ e gwọlọ uzuazọ ebẹdẹ bẹdẹ.” (Iru 13:48; 1Kọ 3:7) Ma re kuobọgbe Jihova ru iruo nọ ma tẹ be daoma jọ usi uwoma na tẹrovi ahwo nọ a bi ru oware nọ a wuhrẹ. (1Kọ 9:26) U fo nọ emọ-uwuhrẹ a rẹ riẹ inọ re Oleleikristi o wo esiwo ọ rẹ họ-ame. (1Pi 3:21) Ma re fiobọhọ kẹ ai zihe ruọ ilele nọ ma te bi wuhrẹ ai re a nwene uzuazọ rai, ta usi uwoma, wuhrẹ ahwo, jẹ rọ oma rai mudhe kẹ Jihova.—Mt 28:19, 20.

EPANỌ A RE RO RU EI:

• Fiobọhọ kẹ emọ-uwuhrẹ Ebaibol ra riẹ inọ ẹjiroro nọ who bi ro wuhrẹ ai họ re ‘a riẹ’ Jihova, a ve je ru eware nọ e rẹ were iẹe.—Jọ 17:3

• Re a sai kruga evaọ egagọ Ọghẹnẹ, who re fiobọhọ kẹ ai re a siobọno iruemu iyoma gbe usu kpobi nọ o sae lẹliẹ ahwo vi ẹro ku ai

• Bọ ae ga jẹ tuduhọ ae awọ taure a tẹ te họ-ame gbe nọ a tẹ họ-ame no.—Iru 14:22

WHA RRI IVIDIO NA JIHOVA ỌGHẸNẸ O TI FIOBỌHỌ KẸ OWHẸ, KẸSENA WHA VẸ KIYO ENỌ NANA:

• Eme ọ rẹ sae lẹliẹ ozọ mu ohwo nọ ọ gbẹ gwọlọ rọ oma mudhe jẹ họ-ame he?

• Ẹvẹ ekpako na a sai ro fiobọhọ kẹ emọ-uwuhrẹ Ebaibol kruga evaọ ukoko na?

• Eme Aizaya 41:10 o wuhrẹ omai kpahe Jihova?

• Iruemu vẹ jọ i re fiobọhọ kẹ omai gọ Jihova re ọ jẹ omai rehọ dede nọ ma gba ha?