Fi Obọ Họ kẹ Ọsẹro Uwuhrẹ Obe Ukoko Ra
1 Omomọvo mai o re wo irere buobu no Uwuhrẹ Obe Ukoko na ze. Amara n’okpo ma ta kpahe epanọ ọsẹro Uwuhrẹ Obe Ukoko na o re ru iruo riẹ. Rekọ eme ma rẹ sai ru ro fi obọ họ kẹ e re o wha erere s’omai gbe amọfa?
2 Nya k’Oka k’Oka: Fikinọ itu uwuhrẹ obe ukoko e rẹ jọ kakao, ẹnya ra ọ r’oja gaga. Ru ei fihọ ute ra re whọ hae nya k’oka k’oka. Whọ rẹ sai je fi obọ họ ẹkwoma ẹnya evaọ ẹruoke, keme onana o rẹ lẹliẹ ọsẹro na mu uwuhrẹ na họ evaọ edhere nọ ọ rrọ kpatiẹ.—1 Kọr. 14:40.
3 Iyo Ọbọga: Oma nọ ma rẹ ruẹrẹ họ ziezi gbe iyo ọbọga nọ ma rẹ kẹ yọ edhere ọfa nọ ma sai ro fi obọ họ. Iyo nọ e riobọ họ ugogo ẹme ọvo e rẹ mai w’oma, yọ onana o rẹ jẹ tudu họ amọfa awọ re a kpahe ẹme. Whaha eme ọ edhe-ẹme na soso nọ whọ rẹ kpahe fihọ. Otẹrọnọ ẹme jọ evaọ oria ewuhrẹ na o t’owhẹ udu, fiba ewoma ewuhrẹ na ẹkwoma iroro ra na nọ whọ rẹ ghale kugbe amọfa evaọ ọkpahefihọ ra.—1 Pita 4:10.
4 Who te wo uvẹ-ọghọ nọ who re ro se idhe-eme na kẹ utu na, ru iruo na avọ osegboja. Emamọ isase i re fiba ewoma uwuhrẹ na.—1 Tim. 4:13.
5 Isẹri-Ise Utu: A rẹ jọ eria uwuhrẹ obe ukoko buobu ru iwuhrẹ kẹ usiuwoma ota, yọ uketha ra kpahe eruẹrẹfihotọ nana u re fi obọ họ kẹ ọsẹro na nọ ọ be k’obaro evaọ iruo usiuwoma ota na. Rri eruẹrẹfihotọ nana wọhọ uvẹ nọ who re ro sikẹle inievo ra viere jẹ tudu họ ae awọ.
6 Iyẹrẹ Usiuwoma Ota: Iyẹrẹ usiuwoma ota ra nọ who re si obọ no ẹruoke eva urere amara kpobi yọ edhere ọfa jọ nọ whọ rẹ rọ tha ọsẹro na uke. Whọ rẹ sae rehọ iyẹrẹ ra họ ẹe obọ hayo fi ei họ etehe nọ a ruẹrẹhọ kẹ iyẹrẹ usiuwoma ota nọ ọ rrọ Ọgwa Uvie na. Okere-obe na ọ rẹ sae jọ etehe na tọlọ iyẹrẹ nọ esẹro uwuhrẹ obe ukoko na a mi na.
7 Ẹmeoyo ra kẹ ọsẹro Uwuhrẹ Obe Ukoko ra o te were iẹe gaga. Maero, o rẹ sai mu owhẹ ẹro nnọ Jihova ọ te ‘jọ kugbe ẹzi nọ who bi dhesẹ na.’—Fil. 4:23.