Dhesẹ Uzẹme Kpahe Jesu Via kẹ Amọfa
1 Ileleikristi nọ a wholo, enọ egbẹnyusu rai erọ igodẹ efa a bi fi obọ họ kẹ na, ‘a wo iruo isẹri-ise kẹ Jesu.’ (Evia. 12:17) Onana yọ iruo nọ i w’uzou, keme obọ riẹ ọvo esiwo o re no ze.—Jọn 17:3; Iruẹru 4:12.
2 ‘Edhere na, Uzẹme, gbe Uzuazọ’: Jesu ọ ta nnọ: “Mẹ họ edhere na, gbe uzẹme, gbe uzuazọ; ohwo ọvo o [re] bru Ọsẹ na ze he, rekọ fiki mẹ.” (Jọn 14:6) Ẹkwoma Jesu ọvo, “edhere na,” ma sai ro bru Ọghẹnẹ evaọ olẹ je wo usu nọ ọ jẹrehọ kugbe Ei. (Jọn 15:16) Jesu họ “uzẹme” na keme eruẹaruẹ gbe eware iwoho nọ e rrọ Ikereakere Hibru na e jọ oma riẹ rugba. (Jọn 1:17; Kọl. 2:16, 17) Uzẹme, ugogo ẹjiroro ọ eruẹaruẹ uzẹme họ re i fi elo họ ọkwa ologbo riẹ evaọ erugba ẹjiroro Ọghẹnẹ. (Evia. 19:10) Ofariẹ, Jesu họ “uzuazọ.” Re ma wo okẹ uzuazọ ibẹdẹ bẹdẹ, mai kpobi ma re fi ẹrọwọ họ idhe ẹtanigbo riẹ hrọ.—Jọn 3:16, 36; Hib. 2:9.
3 Ọnowuzou gbe Ovie nọ O bi Su: O gwọlọ nọ ahwo a re je vuhu udu-esuo ulogbo nọ Jihova o mu họ Ọmọ riẹ obọ. A rehọ Jesu mu no wọhọ Ovie ọrọ Uvie Ọghẹnẹ—‘ẹme riẹ ahwo na kpobi a re yo.’ (Emu. 49:10) Fibae, Jihova ọ rehọ e riẹ mu no wọhọ Ọnowuzou ukoko na. (Ẹf. 1:22, 23) O gwọlọ re ma fi obọ họ kẹ emọ-uwuhrẹ Ebaibol mai vuhu epanọ Jesu ọ be rọ kpọ ukoko na jẹ be rehọ ẹkwoma ‘ọrigbo nọ o wo ẹrọwọ avọ areghẹ na’ kẹ ‘emu abọ-ẹzi evaọ ẹruoke.’—Mat. 24:45-47.
4 Ozerẹ Okpehru nọ Ọ Vọ avọ Ohrọ: Fikinọ edawọ gbe uye i te riẹ wọhọ ohwo-akpọ, Jesu “o wo ogaga nọ ọ rẹ sai ro fiobọhọ kẹ [enọ] e rọ eva odawọ.” (Hib. 2:17, 18) Ẹvẹ o rẹ sasa udu te re ahwo-akpọ nọ a gba ha a riẹ nnọ Jesu o re weri kẹ ethobọ rai gbe nnọ ọ be rehọ ẹwo lẹ kẹ ae! (Rom 8:34) Ẹkwoma idhe Jesu gbe ẹkwoma iruo riẹ wọhọ Ozerẹ Okpehru, ma rẹ sai bikẹle Jihova avọ “ufuoma ẹmeọta” re ma ruẹsi wo “obufihọ evaọ ẹruoke.”—Hib. 4:15, 16, NW.
5 Jọ omodawọ mai re ma vuẹ amọfa uzẹme na kpahe Jesu o wọ ae kuomagbe omai yoẹme kẹ e jẹ gba odibo kẹe.—Jọn 14:15, 21.