Ekpohọ Orẹwho Ofa Evaọ Edhere nọ O Wọso Uzi—Yọrọ Oma kẹ Enwoma Idhere nọ E Riẹ
1 Nọ uyero akpọ o be ga haro kẹdẹ kẹdẹ na, ahwo jọ a la izi vrẹ kpohọ erẹwho nọ igho e mae rrọ no re a sai wo emamọ iruo. Ẹsejọ, iviuwou soso i koko igho rai họ hayo a momo igho buobu no re a sai vi ohwo uviuwou rai jọ kpohọ obọ ẹwho iyibo. Ẹruore rai họ, igho nọ o ti wo no okọ na ze i ti si uvuhu no ai oma. Kọ eware vẹ omọvo idibo Jihova o re roro taure o te ti ku ei họ nnọ o re kpohọ orẹwho ofa?
2 Ono Họ Ọnọ O Kpohọ Orẹwho Ofa Evaọ Edhere nọ Ọ Wọso Uzi? Ohwo nọ o kpohọ orẹwho ofa evaọ edhere nọ ọ wọso uzi họ ọnọ ọ kwa kpohọ orẹwho ofa ababọ ebe egbagba uzi nọ e kẹ riẹ uvẹ nọ ọ rẹ rọ rria etẹe. Onana yọ uziothọ. Ebaibol ọ kẹ Ileleikristi ujaje nnọ a yo ẹme kẹ izi Siza kpobi nọ e wọso uzi Ọghẹnẹ hẹ. (Iruẹru 5:29; Rom 13:1) A vẹ rọ enẹ wo iroro efuafo jẹ whaha uye nọ a rẹ kẹ ae. Oleleikristi ọ tẹ thọ abọjọ uzi Siza, ọ rẹ wha owha gbe uye nọ u no owọjẹ riẹ na ze.—Rom 13:3-5.
3 U yoma gaga inọ, iwhowho-uvie ọ emamọ usi na jọ a jẹ ohrẹ Ikereakere obehru na fiẹ no. A kpohọ orẹwho ofa je mu iruo họ no evaọ edhere nọ ọ wọso uzi. Ẹsibuobu owojẹ uzioraha iwhayo efa i re lele onya utioye na, wọhọ udioriọ gbe eru ebe iwhayo erọ erẹ-ọnya.—2 Kọr. 4:2.
4 Enwoma Eva Onya Erẹ Na: Fikinọ ebe iwhayo a wo, ibuobu e rẹ rọ idhere emu nọ o rẹ sai su kpọhọ enwoma ilogbo kpohọ erẹ na. Ejọ i whu no fiki okọ nọ u zue hayo idhere e re rae evaọ okenọ a jẹ fa ithẹ nọ e vọ avọ enwoma vrẹ. Ohọwo u kpe ejọ whu no evaọ udhude hayo a kru rai fihọ evuẹ iruo olahiẹ hayo a zihe ruọ igberẹ. O rrọ oware aghẹruẹ hẹ re a yo kpahe ohwo nọ o kpohọ orẹwho ofa nọ a gbẹ riẹ oria nọ a rrọ họ yọ a gbe yo urru riẹ viere he. Kọ o sae jọ nnọ evaọ oghẹrẹ jọ ahwo otiọye na jọ a whu no evaọ okenọ a je kpohọ ẹkwotọ nọ a wo họ iroro hayo inọ a fi rai họ uwou-odi?
5 Enwoma Abọ-Ẹzi: Ahwo egbulegbu nọ e rẹ hwariẹ imu zẹ jẹ thueki igberẹ a re fi obọ họ kẹ ahwo nọ a re kpohọ orẹwho ofa evaọ edhere nọ ọ wọso uzi, a vẹ gba ae họ ru onọ a ta kẹ ae kpobi. Osẹri jọ nọ ọ nyaku ahwo otiọye jọ buobu taure a tẹ te wọ onya kpohọ orẹwho ofa evaọ edhere nọ ọ wọso uzi, o kere eme obotọ na se uwou-ogha Society jọ:
6 “U re lehie he, aro rai o ve rovie a ve ti vuhu oghẹrẹ nọ ‘iruo’ rai e ghinẹ rrọ mu. A ve mi ai ebe-erẹ rai no a vẹ gba ae họ re a ‘ruiruo’ [igberẹ] t’uvo t’aso re a hwa ‘osa’ na zihe. O rẹ sae rehọ ikpe buobu re a wo ugho utioye na.”
7 Kọ a sai bo bru egọmeti kẹ ọthọwẹ? Iyẹrẹ na e nyaharo nnọ: “A gbẹ rọwo [kugbe ahwo ugbarugba na] ha a ve kpe ai jẹ gba ai du bẹsenọ oma o rẹ lọhọ ae, a vẹ rọwo nọ a re ru lele izi rai. U te no olahiẹ nọ a rẹ kẹ ae dẹẹ no, ega ọ ukoko na a re guegue ai inọ, a te gu kẹ iporisi hayo gwọlọ obufihọ hayo nọ a tẹ daoma re a dhẹ, a ti kpe esẹgbini hayo imoni rai nọ e rro obọ uwou no hayo nwae oma. Abọjọ ‘uzi’ ẹgba na họ a rẹ ruẹ nnọ a nwene oria nọ a fi emetẹ na họ taure a tẹ te riẹ oria nọ a rrọ na ziezi, re a gbẹ sai dhẹmu oria ovo ho a vẹ jẹ kare obufihọ, o vẹ sae jọ lọlọhọ re a kpọ ae epanọ u je.”—Wawo 1 Timoti 6:9, 10.
8 Kọ whọ rẹ kuvẹ re edikihẹ abọ-ẹzi ọmọ hayo omoni ra ọ raha te ere fiki erere ugho? Uzẹme, ahwo jọ a rẹ sai te obonọ a be nya ababọ oghẹrẹ ebẹbẹ nọ ma fodẹ na. Rekọ fiki ozọ egọmeti nọ o re kru ohwo, a re dhere ẹsikpobi, fikiere o vẹ jọ bẹbẹ kẹ ae re a kpohọ iwuhrẹ ukoko kẹse kẹse hayo kpohọ usiuwoma, o vẹ rehọ ere fi edikihẹ abọ-ẹzi rai họ ọza.—Mat. 24:14; 28:19; Hib. 10:23-25.
9 Nọ ma be nya diwi viere ruọ edẹ urere ọ eyero omuomu nana, iyero e te ga haro viere. (2 Tim. 3:1-5) Uzẹme, omomọvo gbe enọ i w’uzou uviuwou a wo owha-iruo nọ a rẹ rọ gwọlọ k’oma rai gbe iviuwou rai. (Ẹf. 4:28; 1 Tim. 5:8) Rekọ ma gbe wo owha-iruo nọ o mae rro nọ ma rẹ rọ rẹrote ẹgwọlọ abọ-ẹzi mai?—Mat. 16:26.
10 Fikiere, o rrọ oware areghẹ kẹ omomọvo gbe enọ i w’uzou uviuwou re a roro enwoma idhere abọ-ẹzi rai ziezi taure a tẹ te jiroro sọ a rẹ rehọ fiki uyero ogaga kpohọ orẹwho ofa hayo a rẹ nya ha. Otẹrọnọ o gbahọ nnọ whẹ hayo omọvo uviuwou ra jọ o re kpohọ orẹwho ofa fiki uyero ogaga, wo ebe uzi nọ e rẹ k’owhẹ uvẹ ruọ eva orẹwho na e vẹ jẹ kẹ uvẹ nọ who re ro ruiruo evaọ obei. Oke oyena, otẹrọnọ whọ rẹriẹ aro dhẹ oghẹrẹ ẹbẹbẹ jọ nọ ọ rẹ sai fi edikihẹ abọ-ẹzi ra họ awa whọ rẹ sae dhẹ bru idu-esuo nọ Siza o fihọ re a kẹ ẹruọsa na. Whọ rẹ sae sẹro usu ra kugbe Jihova nọ whọ be daoma re whọ ‘yọrọ orọwọ gbe iroro ezi na, onọ ahwo jọ a jẹ fiẹ, ae ọvo a je zue okọ orọwọ rai no.’—1 Tim. 1:19.