Kọ Whọ Sai Siobọno Uwou Ra?
1 Evaọ ikpe-udhusoi ọsosuọ na, Ileleikristi buobu a siobọno iwou rai re a jarae ru iwuhrẹ. (1 Kọr. 16:19; Kọl. 4:15; Filim. 1, 2) Evaọ ikoko jọ nẹnẹ, eria nọ a rẹ jọ ru Uwuhrẹ Obe Ukoko gbe iwuhrẹ kẹ usiuwoma ota e riẹ tere he. Onana o sae wha ae ze nọ itu obe uwuhrẹ jọ i re ro wo ahwo bu te 30 hayo bu vi ere, yọ onana o vrẹ ole ahwo 15 nọ a jiroro riẹ na thethabọ.
2 Emamọ Uvẹ Ọghọ: Kọ whọ sai roro kpahe obusino uwou ra kẹ Uwuhrẹ Obe Ukoko jọ no? Ukpẹ nọ u whrowhro nọ o rẹ fuafo, nọ elo ọ rrọ nọ a sae jọ ruẹ ude ziezi, gbe onọ ofou o re fou rueva ziezi u fo kẹ ẹjiroro nana. Nọ uwuhrẹ obe utu na o rrọ ewuhrẹ ukoko, jẹ rrọ abọ ọruẹrẹfihotọ nọ Jihova o bi ro wuhrẹ ahwo riẹ na, uwuhrẹ obe ukoko nọ a rẹ jọ uwou ra ru yọ emamọ uvẹ ọghọ. Ibuobu e ta nnọ a wo erere abọ-ẹzi no fikinọ a siobọno iwou rai evaọ edhere ọnana.
3 Otẹrọnọ who roro nnọ uwou ra u kiehọ, iviena daoma jẹ ekpako na riẹ. Ẹsejọhọ a be gwọlọ eria efa. Otẹrọnọ o gbẹ lọhọ re a jọ uwou ra ru uwuhrẹ utu hu, kọ a sae jariẹ ru iwuhrẹ kẹ usiuwoma ota? O tẹ make rọnọ ẹgwọlọ ọ riẹ eva oke nana ha, eva e te were ekpako na re a riẹ nnọ uwou ra u wo uvẹ. Whọ sae reawere uvẹ-ọghọ na evaọ obaro.
4 Edhesẹ Emamọ Uruemu: Okenọ ma te bi kokohọ uwou ohwo jọ, u fo nnọ ahwo nọ a bi kokohọ etẹe na kpobi a re wo adhẹẹ kẹ ekwakwa ohwo nọ o wo uwou na. Esẹgbini i re mu ẹro họ nnọ emọ rai e keria oria nọ a ruẹrẹ họ kẹ ewuhrẹ na, a rẹ nya ruọ eria efa uwou na hayo ighẹ na ha nọ e rrọ kẹ erara ha. A re je dhesẹ ororokẹ rọ kẹ erivẹ na, avọ omayọrọ re a whaha iruemu nọ i re kie họ ae oma ha.—2 Kọr. 6:3, 4; 1 Pita 2:12.
5 Ahwo Hibru 13:16 o ta udu họ omai awọ nnọ ma “se oware uwoma gbe ọghoruo ba ha, keme iwẹgọ itieye na e rẹ were Ọghẹnẹ gaga.” Uwou ra nọ who re rovie kẹ ewuhrẹ ukoko yọ emamọ edhere nọ whọ rẹ rọ ghale emamọ eware kugbe amọfa jẹ ‘rehọ eyero ra kẹ Jihova adhẹẹ.’—Itẹ 3:9.