Ebe Ifihọ-Ada Evaọ Ẹkwotọ nọ A rẹ Jọ Ta Evẹrẹ Buobu
1 Evaọ eria buobu, ahwo nọ a no erẹwho efa ze a rrọ ekwotọ nọ ma be jọ ta usiuwoma. Ibuobu rai a rẹ riẹ je wo otoriẹ uzẹme na vẹrẹ gaga nọ a te wuhrẹ ai evaọ ẹvẹrẹ obọrai. Didi eruẹrẹfihotọ e riẹ nọ a rẹ rọ kẹ ahwo nọ a wo isiuru ebe nọ a kporo no Ebaibol ze evaọ ẹvẹrẹ nọ a rẹ mai wo otoriẹ riẹ?
2 Okenọ A Re Ro Fi Ebe Ẹvẹrẹ Ọfa họ Ada: Nọ ikoko ivẹ hayo bu viere nọ e be ta evẹrẹ sa-sa a te bi ru ẹkwotọ ọvona, igboma ekpako ikoko na a rẹ rehọ ẹkwoma esẹro usiuwoma ota rai ru ọruẹrẹfihotọ nọ ikoko na e rẹ rọwo kugbe re a ruẹsi se isẹri kẹ utu ẹvẹrẹ kpobi. Nọ a tẹ be ta usiuwoma n’uwou ruọ uwou, iwhowho-uvie i re fi ebe họ ada evaọ ẹvẹrẹ ọ ikoko edekọ họ. Dede na, okenọ iwhowho-uvie a te bi se isẹri ọ oke-gheghe hayo evaọ eria ẹgbede, a rẹ sai fi ebe họ ada evaọ evẹrẹ nọ a rẹ jọ okegbe na ta.—Rri Ẹkpẹti Onọ evaọ Odibọgba Uvie Mai ọrọ October 1990 (ọrọ Oyibo).
3 Okenọ A Re Ro Wo Ebe na Evaọ Ukoko: Eme a rẹ sai ru otẹrọnọ ahwo nọ a rẹ ta ẹvẹrẹ ọfa a dina re buobu evaọ oria jọ rekọ uvumọ ukoko nọ o rẹ ta ẹvẹrẹ ọyena o riẹ hẹ? Evaọ iyero itieye na, ukoko na o sai wo umutho ugogo ebe ẹvẹrẹ yena jọ, wọhọ emebe-evẹvẹ, ibroshọ Gwọlọ gbe Ogbẹnyusu Ọghẹnẹ jegbe obe Eriariẹ na. Iwhowho-uvie e sai fi ebe nana họ ada evaọ oke kpobi nọ a tẹ nya ku ahwo nọ a rẹ sai se ẹvẹrẹ ọyena.
4 Epanọ A re ro Vi Ebe: Otẹrọnọ ukoko na u gbe wo ebe ọ ẹvẹrẹ nọ ohwo nọ o wo isiuru o re se he, ẹvẹ a sai ro wo ebe ẹvẹrẹ ọyena? Owhowho-uvie na ọ rẹ nọ mi odibo ẹruọsa ebe re ọ riẹ ebe ẹvẹrẹ ọyena nọ e riẹ re a sae jọ ayare ebe ukoko n’ọtha vi ebe nọ a gwọlọ.
5 O tẹ gwọlọ ovẹrẹ, owhowho-uvie na ọ rẹ sae nọ omọvo Ogbẹgwae Iruo Ukoko na sọ a rẹ sai vi ayare ebe na taure oke ayare ebe amara na u te ti te. Otẹrọnọ a rọwo onana, ọsẹro ebe na hayo ohwo nọ o vi ọ rẹ sai vi ayare ebe se uwou-ogha kpata kpata ẹkwoma ipostọfisi hayo ifonu. A ti vi ebe na kpohọ adrẹse ebe nọ a re vi ebe ukoko na kpohọ vẹre na hayo adrẹse ọfa nọ wha kẹ, a tẹ gwọlọ ere. A tẹ gwọlọ nọ i t’obọ aso-hẹrioke hayo evaọ edẹ ivẹ, ukoko na oye o rẹ hwa araha ugho na.
6 Joma rehọ ebe Ileleikristi mai na ru iruo ziezi ro fi obọ họ kẹ “ahwo kpobi,” makọ oghẹrẹ ẹvẹrẹ rai kẹhẹ, re a ‘ti wo eriariẹ egbagba uzẹme na re a wo usiwo.’—1 Tim. 2:3, 4.
[Study Questions]
1. Fikieme ikoko buobu i je wo ẹgwọlọ rọkẹ ebe ọ ẹvẹrẹ ọfa?
2. Didi ọrọwokugbe o gwọlọ evaọ okenọ ikoko ivẹ hayo bu vi ere nọ e be ta evẹrẹ sa-sa a tẹ be jọ ẹkwotọ ọvona ta usiuwoma?
3. Oke vẹ ukoko o sae rọ yare ebe ẹvẹrẹ ọfa fihọ ukoko rai?
4. Ẹvẹ a sai ro wo ebe ẹvẹrẹ ọfa nọ a jọ ukoko rai wo ho t’obọ?
5. Eme a rẹ sai ru otẹrọnọ a gwọlọ ebe jọ taure ebe nọ ukoko o yare i te ti kpozi?
6. Eme họ ute mai evaọ ebe Ileleikristi mai nọ ma rẹ rọ kẹ ahwo?