Rehọ Ebe Mai nọ A Kere No Ebaibol Ze na Ro Ruiruo avọ Areghẹ
1 “Anwọ 1965 ze me bi ro se ebe rai. Me re se oria Ebaibol nọ a rehọ ẹme na no ze nọ me te bi se ebe rai, yọ eware kpobi nọ e rrọ ebe rai e rọwo kugbe Ebaibol na. Mẹ ginẹ gwọlọ riẹ uvi uzẹme kpahe Ọghẹnẹ gbe Jesu, yọ mẹ sae ginẹ ta inọ mẹ be ruẹ iyo egbagba ẹkwoma ebe rai gbe Ebaibol na.” Ere ọzae jọ o kere kpohọ Oria nọ u w’uzou Isẹri Jihova. Evaọ ileta evona, ọ yare inọ ohwo jọ ọ nya ze ti ru obe-uwuhrẹ Ebaibol kugbei.
2 Wọhọ ọzae yena nọ o dhesẹ ovuhumuo na, ima ahwo buobu wariẹ akpọ na họ a wo ovuhumuo kẹ ebe nọ ‘ọrigbo nọ o wo ẹrọwọ avọ areghẹ na’ o bi kere no Ebaibol ze na. (Mat. 24:45) Kukpe kukpe, a bi kere ebe buobu ro fiobọhọ kẹ ahwo udu-oruọzewọ re a “ze te riẹ uzẹme na.” (1 Tim. 2:4) Ẹvẹ ma sae rọ rehọ ebe mai nọ a kere no Ebaibol ze na ruiruo avọ areghẹ?
3 Wha Raha Ae Kufiẹ Hẹ: Ẹsejọ, re ma te rri otọ mu, ma rẹ sae rehọ ebe bu vi epanọ ma ginẹ gwọlọ ro ruiruo. Eme ma rẹ sai ru re ma siọ ebe eghaghae mai na ba ẹraha kufiẹ? O gwọlọ nọ ma dhesẹ orimuo nọ ma tẹ be rehọ ebe nọ ma re ro ruiruo eva usiuwoma ota. Ukpenọ ma rẹ rehọ obe jọ buobu nọ ma ti fihọ ada, ma rẹ sae rehọ ọvo hayo ivẹ, ma ve zihe nyae rehọ efa nọ ma te fi eyena họ ada no. Onana u re ru nọ ebe na i gbe kiọkọ omai obọ buobu eva obọ uwou hu. Ere ọvona re, otẹrọnọ emagazini nọ ma sai fihọ ada ha e vọ omai obọ, u re woma re ma bru unu nọ ma rẹ rehọ kpotọ.
4 Ebe nọ I Bu Obọ Ga Hrọ: Otẹrọnọ ebe jọ i bu ukoko jọ obọ bu hrọ, ọsẹro ebe na ọ sae nyae nọ mi ikoko efa nọ e kẹle rai sọ a sae jọ ebe nọ e vọ rai obọ na rehọ ejọ. Iwhowho-uvie e sai fi ebe nọ i kri no họ-ada kẹ ahwo uviuwou rai nọ e rrọ ukoko ho, emọ-uwuhrẹ Ebaibol, gbe amọfa. O te were ahwo nọ a bi kurẹriẹ ze ukoko na obọ re a wo ebe anwae nana fihọ evuẹ-ebe rai.
5 Ma gwọlọ nọ ebe mai i ru ẹjiroro nọ a ro kere ai gba, koyehọ, re i fiobọhọ kẹ ahwo nọ a dhesẹ uvi isiuru wuhrẹ kpahe ẹjiroro ogbunu Jihova. Wọhọ epanọ Jesu o ku emu nọ o kiọkọ fiẹ hẹ evaọ okenọ ọ rọ edhere igbunu kuọ ogbotu na no, ute mai o rẹ jọ re ma rehọ ebe eghaghae mai nọ a kere no Ebaibol ze na ruiruo ziezi. (Jọn 6:11-13) Ovuẹ nọ o rẹ kẹ uzuazọ nọ o rrọ ebe mai na o rẹ sai te ahwo udu-oruọzewọ obọ họ otẹrọnọ ebe na e rrọ omai obọ eva obọ uwou hayo ekpa mai. Fikiere, ma re dhesẹ areghẹ nọ ma tẹ be rehọ ebe nọ ma rẹ wha kpohọ usiuwoma ota, jẹ rehọ ai ruiruo avọ areghẹ ro fiobọhọ kẹ amọfa.—Fil. 4:5.
[Study Questions]
1, 2. Ẹvẹ ahwo buobu a rri ebe mai, kọ enọ vẹ onana o wha ze no?
3. Eme ma rẹ sai ru nọ ma gbẹ raha ebe mai kufiẹ hẹ?
4. Eme a rẹ sai ru otẹrọnọ ebe i bu ukoko jọ obọ hrọ?
5. Ẹvẹ ma sai ro dhesẹ nọ ma wo ovuhumuo kẹ ebe mai?