Isukulu nọ I bi Fiobọhọ k’Omai Fi Oware nọ Ma Wuhrẹ họ Iruo
1 Nọ ma te nya lele omaa ewuhrẹ orọ Isukulu Odibọgba Esuo-Ọghẹnẹ ọrọ 2006 na, ma rẹ daoma re ma wo erere no ewuhrẹ Ikereakere na ze ẹkwoma efihiruo uthubro na evaọ egagọ mai gbe uzuazọ ikẹdẹ kẹdẹ mai. Ma re ru ei fihọ ute mai re ma fi eware nọ ma wuhrẹ họ iruo.—Jọn 13:17; Fil. 4:9.
2 Ẹme Ọkpahefihọ: Omaa ukpe nana u fi uminiti ofa ba oke nọ ogbotu na a rẹ rọ kpahe ẹme evaọ abọ oruvẹ Ebaibol na. Onana u dhesẹ nọ oniọvo nọ a kẹ ẹme oruvẹ Ebaibol na o re ku ẹme riẹ họ eva iminiti isoi viukpọ ezeza. Ahwo nọ a be kpahe ẹme no oria nọ a keria ze a re wo oke nọ a kẹ rai họ iroro. Nọ ohwo o te wo ẹme nọ ọ be te kpahe họ iroro ziezi, ọ rẹ sae rọ emaharo 30 hayo kpẹre viere rọ tẹme nọ ahwo a rẹ sai wo erere no ze. Ahwo nọ a te oware wọhọ imakpe a rẹ sae rọ iminiti isoi nọ a fihọ re ogbotu na ọ rọ kpahe ẹme na rọ ta eme nọ ahwo a re wo erere no ze.
3 Eme nọ I re Wuhrẹ: Oruvẹ Ebaibol gbe ẹme uthubro na e rẹ tẹro vi aghare epanọ ẹme na o ro kie kpahe odibọgba mai gbe abọfa uzuazọ ikẹdẹ kẹdẹ mai. Orọnikọ isiuru nọ e rẹ wọ ahwo jẹ owọ ọvo ohwo nọ o bi ru ẹme ọ rẹ ta họ ae oma ha. O re dhesẹ owojẹ nọ onana o gwọlọ, epanọ a sai ro ru ei, je dhesẹ irere nọ i re te ohwo nọ o te ru ere. Ọ rẹ sae ta nọ, “Enẹ ikere na e rọ k’omai ọkpọvio,” hayo “Enẹ ma sae rọ rehọ ikere nana ruiruo evaọ iruo odibọgba na.” Ekpako ukoko gbe idibo iruiruo nọ e riẹ iyero oborai a rẹ daoma dhesẹ epanọ a sae rọ rehọ ẹme na ruiruo eva oborai te epanọ o rẹ lọhọ te kpobi.
4 Iriruo Ebaibol nọ a rẹ fodẹ i re wiruo ziezi nọ a te dhesẹ epanọ a re ro fi ẹme na họ iruo. Nọ oruẹme ọ tẹ ta kpahe oriruo Ebaibol no, ọ rẹ sae ta nọ, “Whọ rẹ sae rẹriẹ ovao dhe oghẹrẹ uyero utionana.” O re muẹrohọ inọ oriruo Ebaibol kpobi nọ o re dhesẹ o rẹ rọwo kugbe ẹme na, rọwo kugbe iwuhrẹ Ebaibol na kpobi, jẹ rọwo kugbe oware nọ ‘ọrigbo ẹrọwọ avọ areghẹ’ na o kere.—Mat. 24:45.
5 Ẹgba nọ a rẹ sae rọ rehọ eriariẹ gbe otoriẹ ruiruo ziezi oye họ areghẹ. Areghẹ o wuzou gaga. (Itẹ 4:7) Nọ ma be ruabọhọ ewo uvi areghẹ ẹkwoma iwuhrẹ nọ a be k’omai eva Isukulu Odibọgba Esuo-Ọghẹnẹ na, joma daoma wo ẹnyaharo evaọ ona nọ ma re ro wuhrẹ amọfa.