Isukulu nọ E rẹ Thomai Kpahe kẹ Eware nọ E Mae r’Oja

¹ Ahwo a re kpohọ isukulu nya i wuhrẹ eware nọ i re fi obọ họ kẹ ae le itee rai evaọ uzuazọ t’obọ. Dede na, ute vẹ o rẹ sai w’uzou vi ejiri ọ uzedhe Ọnọkẹ uzuazọ na gbe obọ nọ a re fihọ kẹ amọfa evaọ ewuhrẹ kpahe ẹjiroro gbe idhere riẹ? Ọvuọvo ho. Ẹjiroro ọ Isukulu Odibọgba Esuo-Ọghẹnẹ na họ re o ruẹrẹ omai kpahe re ma wuhrẹ amọfa ẹrọwọ mai. Fikiere, nọ ma bi kpohọ isukulu na k’oka k’oka na, ma bi wo ona nọ o rẹ thomai kpahe kẹ iruo nọ e mae r’oja evaọ uzuazọ.

² A fi “Omaa Isukulu Odibọgba Esuo-Ọghẹnẹ ọrọ 2003” na họ ukere Odibọgba Uvie Mai ọrọ amara n’okpo. Eme kpahe epanọ a ti ru isukulu na e rrọ omaa na. Whọ sae te ruẹ nnọ u re woma re who fi omaa na họ obe ọ Wo Erere no Ewuhrẹ ọ Isukulu Odibọgba Esuo-Ọghẹnẹ Ze na, onọ whọ rẹ wha lele oma kpohọ Isukulu Odibọgba Esuo-Ọghẹnẹ na k’oka k’oka na. Roro kpahe abọjọ ọrọ Isukulu Odibọgba Esuo-Ọghẹnẹ ọrọ 2003 na.

³ Okwakwa Ẹmeọta: Muhọ evaọ January, ewuhrẹ isukulu na kpobi o ti muhọ avọ ẹme iminiti isoi kpahe okwakwa ẹmeọta jọ hayo abọjọ isase, uwuhrẹ omobọ ohwo, hayo ewuhrẹ amọfa. Ọsẹro isukulu na o ti ru ẹme emuhọ nana, hayo ọ rẹ sae rehọ iẹe kẹ ọkpako ọfa jọ nọ o te re o ru ẹme nana. Ọnọ o bi ru ẹme na ọ rẹ sae ta kpahe otofa okwakwa ẹmeọta na gbe epanọ u w’uzou te. Ọ vẹ t’ẹme na kẹre haro ẹkwoma ẹta kpahe iriruo Ikereakere jọ jẹ kẹ edhesẹ epanọ a re ro fi okwakwa na họ iruo, t’ovao vi epanọ ere oruo o sai ro ru odibọgba mai w’oma viere.

⁴ Ẹme 1: Ma be wariẹ ta kẹ inievo emezae nọ a rọ ẹme uthubro na kẹ re a “t’ẹrovi aghare efihiruo ovuẹ nọ a be t’ẹme kpahe na.” Onana u dhesẹ nnọ a re dhesẹ kẹ ukoko na epanọ a rẹ rọ rehọ ovuẹ na ruiruo. A tẹ kẹ owhẹ ẹme nana, kpohọ ẹwẹ-obe avọ 48-49 ọrọ obe-uwuhrẹ ọ Isukulu Odibọgba na kẹ iroro-ejẹ kpahe epanọ a rẹ rọ ruẹrẹ oma kpahe, je wuhrẹ eria nọ a riobọ kpohọ evaọ abọ ọruẹrẹhọ-izoẹme obe na evaọ otọ “Uvi efihiruo.”

⁵ Omaa Isase Ebaibol: Otẹrọnọ evaọ okenọ u kp’emu na, whọ jẹ sae nya lele isase Ebaibol ẹkpoka na ha, eme whọ gbẹ gbaemu re whọ nya lele omaa na enukpe nana ha? Ahwo nọ a ru ere a ti se Ikereakere Ileleikristi Griki na reno evaọ urere ukpe na. A ta kpahe irere ọ Ikereakere Griki Ileleikristi na nọ a re ro mu omaa isase Ebaibol họ evaọ ẹwẹ-obe avọ 10, edhe-ẹme avọ 4, ọrọ obe ọ Isukulu Odibọgba na.

⁶ Oruvẹ no Isase Ebaibol Ze: A ru abọ nana thei te iminiti ikpe no re ogbotu na ọ sae kpahe eme fihọ isase ẹkpoka na. Ahwo nọ a kẹ ẹme na a rẹ nya lele oke nọ a fihọ na. A ti ru ei k’oka k’oka, te oka ọkiẹkpemu ọ ọkpahefihọ unu na. Nọ who bi se izou nọ a ruẹrẹhọ kẹ isase na, rri gwọlọ owọ-eme nọ e te k’owhẹ erere evaọ uwuhrẹ uviuwou ra, evaọ odibọgba ra, hayo evaọ eyero uzuazọ ra. Didi ekwakwa Jihova i dhesẹ oma via evaọ oghẹrẹ nọ o ro yeri kugbe ahwo gbe erẹwho? Eme who wuhrẹ evaọ isase na nọ o bọ ẹrọwọ ra ga jẹ bọ ovuhumuo ra kẹ Jihova viere? Whọ sae kpahe fihọ owọ-ẹme kpobi nọ u j’owhẹ evaọ izou nọ a ruẹrẹhọ kẹ isase na, tube no awọ nọ a te jọ Ẹme Avọ 2 se ze dede, keme oniọvo ọmọzae nọ o ti se isase na ọ te kpahe fihọ awọ na ha.

⁷ Ẹme Avọ 2: Ẹme ọmọ-isukulu ọsosuọ na k’oka k’oka ọ tẹ jọ onọ a re ro wuhrẹ isase ẹgbede. U te no isase urere ọ amara kpobi no, a ti si isase na no oria isase Ebaibol ẹkpako na ze. A ti si isase urere amara na no Uwou-Eroro Na ze. Ọmọ-isukulu na o re se oria nọ a kẹ riẹ na ababọ eme emuhọ hayo eme ekuhọ nọ ọ rẹ ta. Evaọ edhere nana, ọ rẹ sae tọ ẹro vi ona isase riẹ dẹẹ.—1 Tim. 4:13.

⁸ Ẹme Avọ 3 gbe ọrọ Avọ 4: A si eme nana jọ no obe Ọzae nọ Ọ Mae Rro na ze unuẹse buobu vi ebe efa; uzoẹme na ọvo ejọ i wo. Ahwo nọ a kẹ eme nọ eria nọ a si rai no ze i theri hi hayo enọ i wo uzoẹme na ọvo a ti wo uvẹ nọ a re ro koko ẹme rai họ ẹkwoma ekiakiẹ nọ a re ru evaọ ebe Ileleikristi mai. Onana o sai ru ei lọhọ viere kẹ inievo emetẹ re a kpọ eme rai rri ethabọ rai.

⁹ Oghẹrẹ Ẹkeria-Ẹmeọta: Wọhọ epanọ a dhesẹ evaọ ẹwẹ-obe avọ 45 ọrọ obe Isukulu Odibọgba na, ọsẹro isukulu na ọ rẹ sae kẹ oghẹrẹ ẹkeria-ẹmeọta jọ. Ọ gbẹ kẹ ọvuọvo ho, inievo-emetẹ e sae salọ ẹkeria-ẹmeọta jọ no enọ a kere fihọ ẹwẹ-obe avọ 82 na ze. Otẹrọnọ oniọvo-ọmọtẹ o bi ru ẹme ẹsiẹvo evaọ emerae ivẹ, oghẹrẹ ẹkeria-ẹmeọta 30 na e rẹ kẹ oghẹrẹ ẹkeria sa-sa nọ a re ro ruiruo lehie te ikpe isoi. Inievo emetẹ nọ e salọ oghẹrẹ ẹkeria-ẹmeọta ọrọ avọ 30, koyehọ, “Oghẹrẹ ẹkeria-ẹmeọta ọfa nọ o kiehọ oria rai,” a re kere oghẹrẹ ẹkeria-ẹmeọta na fihọ obotọ hayo uke ọ ẹwẹ-obe ẹme-oruo rai na (S-89). Ọsẹro isukulu na o ti kere ideti ẹme ọmọ-isukulu na fihọ ẹwẹ-obe avọ 82 ọrọ obe riẹ kẹle oghẹrẹ ẹkeria nọ o ro ru ẹme na. Ọ rẹ sai ru onana evaọ oke ovona nọ o bi ro kpoka họ efọmo uthubro ọmọ-isukulu na.

¹⁰ Efọmo Uthubro: A ru efọmo uthubro ra fihọ evaọ obe ra. O rrọ ẹwẹ-obe avọ 79-81. Fikiere, o gwọlọ nnọ whọ rẹ rọ obe ra kẹ ọsẹro isukulu na okenọ who te ru ẹme kpobi nọ a k’owhẹ no. O gwọlọ nnọ ọsẹro isukulu na o re kere eria uthubro nọ emọ-isukulu na e be jọ ruiruo na.

¹¹ 3Ọkiẹkpemu Ọkpahefihọ Unu: Unu ọvo a ti ro ru ọkiẹkpemu Isukulu Odibọgba Esuo-Ọghẹnẹ na. Ẹsiẹvo emerae ivẹ a ti ru ei yọ o ti thei te iminiti 30. Enọ nọ a ti ro ru ọkiẹkpemu na e te gbẹ jọ Odibọgba Uvie Mai. Otẹrọnọ oka nọ a m’omaa ọkiẹkpemu ọkpahefihọ unu fihọ na u kie fihọ oka ọ okokohọ okogho hayo iweze ọsẹro okogho, a re ru eme oka n’otha evaọ oka oyena, a vẹ va ọkiẹkpemu ọkpahefihọ unu na kpohọ oka obaro na.

¹² Eklase Efa: Evaọ ikoko nọ ahwo nọ a fi odẹ h’otọ evaọ isukulu na a jọ bu vi 50, ekpako na a rẹ sae jiroro eklase efa nọ a re wo. “A rẹ sae jọ obei ru eme ọmọ-isukulu na kpobi hayo ivẹ urere na ọvo.” (Isukulu Odibọgba, ẹwẹ. 285) Ma kẹ iroro-ejẹ avivẹ na rọ kẹ ikoko nọ inievo-emetẹ buobu e rrọ rekọ nọ inievo-emezae nọ i re ru ẹme isase e jẹ rrọ kakao. Ekpako na a rẹ salọ inievo emezae nọ i te ziezi re a rẹrote eklase enana.

¹³ Ọkohrẹ Obufihọ: Wọhọ epanọ a dhesẹ evaọ omaa Isukulu Odibọgba Esuo-Ọghẹnẹ na, ugboma ekpako na o rẹ rehọ ọkohrẹ obufihọ mu re ọ jọ obemu rọ ohrẹ kẹ ekpako gbe idibo iruiruo nọ i bi ru oruvẹ Ebaibol gbe ẹme uthubro. Oniọvo nọ a ro mu re o ru onana ọ rẹ jọ ohwo nọ o wo ona, ọnọ ekpako edekọ e rẹ rọ adhẹẹ kẹ ohrẹ riẹ. Ọ rẹ kẹ uvi ohrẹ, jiri ohwo nọ o wo emamọ ona ẹmeọta gbe ewuhrẹ jẹ kẹ iroro-ejẹ edhere ọvo hayo ivẹ jọ nọ a re ro ru ẹnyaharo. U du fo ho re a kẹ oniọvo nọ o re ru ẹme kẹse kẹse ohrẹ evaọ ẹsikpobi nọ o te ru ẹme no. Dede na, oniọvo nọ a ro mu re ọ jọ ọkohrẹ obufihọ na o re dhesẹ orimuo je vuhumu nnọ a rẹ sai fi obọ họ kẹ makọ inievo nọ e be kẹ ovuẹ ogbotu enẹna re a nyaharo viere.—1 Tim. 4:15.

¹⁴ Oware nọ O re Mu Ẹro họ: Eme ọ rẹ sai fi obọ họ kẹ ọkohrẹ evaọ ẹwawo ẹme nọ a ru? Etehe avọ esa evaọ ibuobu ọ izou 53 nọ a kẹ inọmba evaọ obe Isukulu Odibọgba na u wo orukpẹre kpẹkpẹe kpahe oware nọ o re mu ẹro họ. Ọsẹro isukulu na o re je mu ẹro họ ekareghẹhọ hayo iroro-ejẹ efa nọ e rrọ obe na nọ i re fi obọ họ kẹe wawo oghẹrẹ nọ a ruẹrẹ ẹme na họ te gbe epanọ a riẹ ẹme na ta te. Wọhọ oriruo, mu ẹro họ uhie enọ nọ e rrọ obehru ẹwẹ-obe avọ 55 gbe iroro-ejẹ nọ e rrọ edhe-ẹme urere evaọ ẹwẹ-obe avọ 163 na.

¹⁵ Kere Eme Fihọ Eria Ifofe Na: Fiba akotọ ọkẹkẹe riẹ, obe ọ Isukulu Odibọgba na u wo eria ifofe nọ who re kere eme fihọ evaọ etoke uwuhrẹ omobọ ra gbe okenọ who te kpohọ Isukulu Odibọgba Esuo-Ọghẹnẹ na. (Rri ẹwẹ-obe avọ 77, 92, 165, 243, 246, gbe 250.) Ruẹ nnọ whọ wha obe ra lele oma k’oka k’oka. Rri lele ọnọ ọ be t’ẹme na evaọ oke ẹme emuhọ na. Rovie obe ra fihọ evaọ abọ nọ o kiọkọ evaọ isukulu na kpobi. Mu ẹro họ iroro-ejẹ nọ ọsẹro isukulu na ọ kẹ. Mu ẹro họ idhere ewuhrẹ, enọ, iriruo, eme ọtakpeze, etadhesẹ, iwoho, gbe eme ẹwawo nọ ọnọ ọ be t’ẹme na o ro ruiruo. Ẹkwoma eme nọ i w’uzou nọ who re kere fihọ otọ evaọ ewuhrẹ na, whọ te sae kareghẹhọ jẹ rehọ obọdẹ eware buobu nọ who wo no isukulu na ze ro ruiruo.

¹⁶ Jesu Kristi ọ riẹ nnọ ewhowho emamọ usi Uvie Ọghẹnẹ na họ uvẹ-ọghọ nọ o mae rro kpobi nọ o rẹ sai te ohwo obọ. Oye o jọ ugogo iruo nọ a kẹ riẹ. (Mak 1:38) Ọ ta nnọ: “Mẹ rẹ vuẹovuẹ usiuwoma uvie Ọghẹnẹ . . . ; keme fiki onana a je vi omẹ ze.” (Luk 4:43) Wọhọ enọ e jẹ uzizie nọ a re ro lele ei rehọ no, ma du oma họ ewhowho emamọ usi na re, yọ ma be daoma ẹsikpobi re ma ru “iwẹegọ ejiro” mai woma viere. (Hib. 13:15) Fiki ẹjiroro nana, jọ ma gbae mu re ma w’obọ evaọ Isukulu Odibọgba Esuo-Ọghẹnẹ na kẹse kẹse, isukulu nọ i ti fi obọ họ k’omai ruẹrẹ oma họ kẹ oware nọ o mai w’uzou evaọ uzuazọ.