Esẹro nọ E be k’Obaro—Ọsẹro Isukulu Odibọgba Ọghẹnẹ Na
1 Ọsẹro Isukulu Odibọgba Ọghẹnẹ na yọ ọzae nọ ọ kpako no evaọ abọ-ẹzi nọ o re ruiruo gaga evaọ ẹmeọta gbe ewuhrẹ o te je fo kẹ adhẹẹ gbe ẹmeoyo mai. (1 Tim. 5:17) Kọ eme họ ewha-iruo riẹ?
2 Ọ rẹ sẹro evu-ebe ọ Isukulu Odibọgba Ọghẹnẹ nọ o rọ eva Ọgwa Uvie na. O wo isiuru gaga kpahe uduotahawọ enọ i te kpobi re a fi odẹ h’otọ evaọ isukulu na. Ọ rẹ ruẹ nnọ a wo emamọ okerefihotọ re a kake ghale eme evaọ edhere ọkpakpatiẹ o tẹ kao eka esa taure ẹdẹ isukulu na o te ti te. Ọ rẹ riẹ ukoko na ziezi, o ve wo ọmọ-uwuhrẹ kpobi avọ ẹgba riẹ fihọ iroro. Dede nọ ọ sai wo oniọvo ọfa nọ o re fiobọhọ kẹe evaọ ẹruẹrẹhọ omaa isukulu na, ọsẹro na ọ rẹ dabe sẹro ẹghale eme na ziezi.
3 Re ọ ruẹsi wuhrẹ ziezi evaọ isukulu na, ọsẹro na ọ rẹ ruẹrẹ oma kpahe gaga k’oka k’oka, ọ vẹ roma totọ wuhrẹ eme na. Onana u re fiobohọ kẹe re o kpare ajọwha ukoko na fihọ eme na, re ọ riẹ sọ a ru eme na ziezi, je fiẹgba họ igogo-eme nọ i w’uzou nọ a ti kugbe ọkiẹkpemu okerefihotọ na.
4 Nọ ọmọ-uwuhrẹ kpobi o te ru ẹme riẹ no, ọsẹro na o ve jiri ọmọ-uwuhrẹ na je dhesẹ oware nọ o lẹliẹ okwakwa ẹmeọta jọ w’oma hayo oware nọ ọ jẹ gwọlọ ẹnyaharo. Okenọ ohwo jọ ọ tẹ gwọlọ obufihọ evaọ ẹruẹrẹ ẹme riẹ, ọsẹro na hayo ohwo jọ nọ o vi ọ rẹ sae fiobọhọ kẹe.
5 Re ma ruẹsi wo erere vọvọ no iruo egaga ọ ọsẹro Isukulu Odibọgba Ọghẹnẹ na gbe ekohrẹ efa nọ e rọ otọ ọkpọvio riẹ ze, ma rẹ jọ isukulu na ẹsikpobi. Ma re je ru ẹme mai kpobi je fi ohrẹ nọ a k’omai avọ emọ-iwuhrẹ efa họ iruo. Evaọ edhere ọnana, ma te nya haro ẹrera evaọ ẹgba nọ ma rẹ rọ vuẹ ovuẹ Uvie na evaọ ẹgbede jegbe n’uwou ruọ uwou.—Iruẹru 20:20; 1 Tim. 4:13, 15.