Mẹ Gwọlọ Wo Uwuhrẹ Ebaibol!
1 Ibuobu mai a wo isiuru kẹ ewo uwuhrẹ Ebaibol no, yọ fiki iroro ezi. Iruo uwuhrẹ Ebaibol na họ oria nọ ma je le ute mai orọ eruo ilele ekpokpọ t’obọ. (Mat. 28:19, 20) Ghele na ibuobu mai a ta usiuwoma emerae buobu no, ẹsejọhọ ikpe dede, ababọ ewo uvi oghọghọ nọ u re no ohwo nọ a re wuhrẹ uzẹme na ze. Kọ eme ma re ru kpahe onana evaọ November? Nọ ma bi fi obe ọ Eriariẹ na họ ada na evaọ amara ọnana, ma rẹ sae daoma ziezi re ma rehọ iẹ mu iwuhrẹ Ebaibol ekpokpọ họ.
2 Ruẹrẹ Urere-Oka Ọvo Hayo Bu Viere Họ: Ma tudu họ ohwo kpobi awọ re ọ ruẹrẹ oke jọ fihọ evaọ amara ọnana re a tẹrovi emuhọ uwuhrẹ Ebaibol okpokpọ. Enọ i bi wuhrẹ evaọ Uwuhrẹ Obe Ukoko a rẹ salọ urere-oka ovo hayo bu viere nọ a re ro ru ugogo ẹjiroro ọnana a vẹ ruẹrẹ itu rai họ re a daoma kugbe evaọ iruo ozihebro na.
3 Wha obe ọ izihebro ra lele oma ziọ iwuhrẹ ọ usiuwoma ota enana. Who ve zihe bru enọ i dhesẹ isiuru kpobi, enọ e rehọ ebe, hayo enọ e ziọ iwuhrẹ. Ru ozihebro kpobi avọ ẹjiroro ọ emuhọ obe uwuhrẹ.
4 Ru Odhesẹvia Uwuhrẹ Ebaibol: Eva iwuhrẹ ọ usiuwoma ota nọ a salọ na, a re ru odhesẹvia nọ a ruẹrẹ ziezi, nọ o re dhesẹ epanọ a re ro muọ uwuhrẹ họ evaọ ozihebro. Whọ sae ta nọ: “Ahwo buobu a wo Ebaibol, rekọ a riẹ hẹ inọ iyo enọ nọ i w’uzou nọ ma rẹriẹ ovao ku evaọ uzuazọ e rọ eva riẹ. [Dhesẹ uhie eme nọ e rọ obe ọ Eriariẹ na kẹe, jẹ fodẹ izoẹme ọ avọ 3, 5, 6, 8 gbe 9.] Ẹkwoma efihiruo ọrọ obufihọ uwuhrẹ onana evaọ auwa ọvo evaọ ẹkpoka, whọ rẹ sae wo ugogo otoriẹ Ebaibol na evaọ umutho emerae jọ. Otẹrọnọ whọ jọ izoẹme enana salọ ọjọ, o te were omẹ re me dhesẹ epanọ omaa na o rọ k’owhẹ.” Otẹrọnọ ohwo na ọ se uwuhrẹ fiki uvẹ, ru ei vevẹ kẹe nọ ma wo ọruẹrẹfihọ ọkpẹkpẹ jọ. Dhesẹ ibroshọ Gwọlọ na, re whọ ta kẹe nọ whọ te nyaze re wha hai wuhrẹ uwuhrẹ okpẹkpẹ ẹsiẹvo ẹkpoka evaọ iminiti 15 rite 30.
5 Otẹrọnọ mai kpobi ma daoma kugbe re ma muọ iwuhrẹ họ jẹ lẹ kẹ oghale Jihova kpahe omodawọ mai, ma te ghinẹ ruẹ ebe iwuhrẹ ekpokpọ! (1 Jọn 5:14, 15) Otẹrọnọ whọ gwọlọ wo uwuhrẹ Ebaibol, onana o sae jọ uvẹ nọ who re ro mu ojọ họ.