Obe ọ Ebaibol Wuhrẹ na—Ugogo Obe nọ Ma re ro Ru Obe-Uwuhrẹ Ebaibol
1 Ẹvẹ o jọ omawere te nọ ma rọ rehọ ẹro ruẹ obusino obe na Eme Ebaibol na O Gine Wuhrẹ? eva Okokohọ Ubrotọ “Ẹmeoyo kẹ Ọghẹnẹ” na! Eva e were ahwo nọ a jariẹ na kpobi nọ a ro wo ọvuọ ọriẹ eva ekuhọ ọruẹrẹfihotọ Ẹdẹ-Ọmaha na. Kọ ẹvẹ a te rehọ obe okpokpọ nana ruiruo riwi? A kere i rie re o jọ ugogo obe nọ ma re ro ru obe-uwuhrẹ Ebaibol. Dede nọ amara March a ti ro mu obe okpokpọ na họ efihọ ada, ma ta udu họ iwhowho-uvie awọ re a rehọ iẹe tohọ je ru ebe-iwuhrẹ Ebaibol no umuo enẹna vrẹ.
2 Ebe-Iwuhrẹ Ebaibol nọ A bi Ru no Vẹre: Iwhowho-uvie nọ e be rehọ obe Eriariẹ na hayo ibroshọ Gwọlọ na ru obe-uwuhrẹ enẹna a rẹ rehọ areghẹ jẹ iroro na kẹ omobọ rai kpahe oke gbe epanọ a re ro mu obe okpokpọ na họ ero ruiruo evaọ uwuhrẹ na. Otẹrọnọ wha mu uwuhrẹ jọ họ kẹle, wha re dhugbe muhọ no umuhọ obe okpokpọ na ze. Otẹrọnọ wha wuhrẹ obe Eriariẹ na thabọ no, wha sae jọ uzou nọ u wo oghẹrẹ uzoẹme ovona evaọ obe ọ Ebaibol Wuhrẹ na ruabọhọ uwuhrẹ na. Otẹrọnọ wha wuhrẹ obe Eriariẹ na kẹle oka no, wha sae jiroro nọ wha dhugbe wuhrẹ iẹe re no.
3 Ababọ avro, mai kpobi ma riẹ ahwo buobu nọ a ti wo erere no ewuhrẹ obe ọ Ebaibol Wuhrẹ na ze. Kọ whọ gbẹ rọ obe nana mu obe-uwuhrẹ Ebaibol họ kugbe ohwo kpobi? Wọhọ oriruo, ahwo nọ a wuhrẹ ibroshọ Gwọlọ na hayo obe Eriariẹ na re no rekiyọ a ri wo ẹnyaharo te omarọkẹ gbe ame-ọhọ họ a rẹ sae gwọlọ wariẹ ruabọhọ uwuhrẹ rai evaọ obe okpokpọ na. Esẹgbini e rẹ sae jiroro re a rọ obe nana ruiruo nọ a bi wuhrẹ emọ rai eriariẹ egbagba oreva Ọghẹnẹ na.—Kọl. 1:9, 10.
4 Ewuhrẹ Obe Avivẹ: Kọ ọruẹrẹfihotọ ọ riẹ nọ ọmọ-uwuhrẹ Ebaibol o re ro wuhrẹ obe avivẹ nọ o te wuhrẹ obe ọ Eme Ebaibol na O Gine Wuhrẹ na re no? Ee. Otẹrọnọ u muẹro inọ ọmọ-uwuhrẹ o bi wo ẹnyaharo, makọ ẹmẹrera, yọ o bi wo ovuhumuo kẹ oware nọ o bi wuhrẹ, a rẹ sae ruabọhọ uwuhrẹ na evaọ obe ọ Gọ Ọghẹnẹ Uzẹme Ọvo Na. Ma wo evaifihọ inọ obe ọ Ebaibol Wuhrẹ na o te jọ obọ mai wiruo gaga nọ ma be wha iruo ilele-iruo na haro na.—Mat. 28:19, 20.