Abọ 1: Eru Ebe-Iwuhrẹ Ebaibol nọ E rẹ Nyaharo
Eme Họ Obe-Uwuhrẹ Ebaibol?
1 Wariẹ akpọ na soso họ, ahwo Ọghẹnẹ a bi ru ebe-iwuhrẹ Ebaibol nọ i bu te oware wọhọ ima ezeza kamara kamara. Ẹkwoma emamọ ona uwuhrẹ nọ ma re ro ru iruo ziezi, ma rẹ sai fi obọ họ kẹ emọ-uwuhrẹ Ebaibol enana nyaharo te omarọkẹ gbe ame-ọhọ, je ‘te epanọ a re ro wuhrẹ amọfa re.’ (2 Tim. 2:2) Kọ o te were owhẹ re who fi obọ họ kẹ ọmọ-uwuhrẹ ra re o wo ẹnyaharo otiọye? Muhọ no umuo ukere nana vrẹ, Odibọgba Uvie Mai o te hai wo izoẹme sa-sa nọ e te ta kpahe igogo idhere nọ a sai ro ru ebe-iwuhrẹ Ebaibol nọ e rẹ nyaharo.
2 Okenọ A rẹ rọ Nẹ Iyẹrẹ Obe-Uwuhrẹ Ebaibol: Otẹrọnọ whọ be rehọ obe ukoko na jọ nọ a fodẹ gbe Ebaibol na rọ t’ẹme kugbe ohwo nọ o wo isiuru kẹse kẹse, etoke ẹmeọta na ọ tẹ make kpẹre, yọ obe-uwuhrẹ Ebaibol who bi ru na. Onana o rrọ ere o tẹ make rọnọ unuẹthẹ ohwo na wha bi jo ru uwuhrẹ na hayo evaọ ifonu. U te no orọ ọsosuọ nọ who ro dhesẹ oghẹrẹ nọ a re ru uwuhrẹ na kẹ ohwo na no, who te ru uwuhrẹ na te isiava efa no, a rẹ sae nẹ iyẹrẹ uwuhrẹ na otẹrọnọ who wo imuẹro nnọ uwuhrẹ na o te nyaharo.
3 Ibroshọ Gwọlọ na gbe obe Eriariẹ na họ ebe nọ a bi ro ru ebe-iwuhrẹ Ebaibol buobu. Nọ a te wuhrẹ ai re no, u te muẹro nọ ohwo na o bi wo ẹnyaharo, o tẹ make rrọ ẹmẹrera, yọ o bi wo ovuhumuo kẹ oware nọ o bi wuhrẹ, a rẹ sae rọ obe ọ Gọ Ọghẹnẹ na ruabọhọ uwuhrẹ na. A rẹ sae rehọ ibroshọ na Whọ Rẹ Sae Jọ Ogbẹnyusu Ọghẹnẹ! ro ru uwuhrẹ kugbe ahwo nọ a wo eriariẹ tere he hayo enọ e riẹ ese te ere he.
4 Iruo obe-uwuhrẹ Ebaibol na i bi wo ẹgba evaọ obufihọ kẹ ima ahwo buobu re a zihe ruọ ilele uzẹme Jesu Kristi. (Mat. 28:19, 20) Ẹkwoma efihiruo iroro-ejẹ nọ a kẹ evaọ izoẹme ọruẹrẹfihọ nana nọ e rrọ obaro tha na, whọ te sai ru obe-uwuhrẹ Ebaibol nọ e rẹ nyaharo.