Abọ Avọ 12: Eru Ebe-Iwuhrẹ Ebaibol nọ E rẹ Nyaharo
Obọ Ufihọ kẹ Emọ-Uwuhrẹ re A To Ebe-Iwuhrẹ Ebaibol họ je Ru Uwuhrẹ Na
1 Nọ emọ-uwuhrẹ Ebaibol mai a te mu obọ họ ewo no evaọ odibọgba na, ozọ epanọ a rẹ rọ to obe-uwuhrẹ Ebaibol họ je ru uwuhrẹ na o rẹ sai mu ai. Ẹvẹ ma sai ro fi obọ họ kẹ ae wo aruọwha evaọ abọ odibọgba mai nana nọ o wuzou gaga na?—Mat. 24:14; 28:19, 20.
2 Nọ ọmọ-uwuhrẹ Ebaibol o te te epanọ ọ rẹ rọ jọ owhowho-uvie nọ ọ re họ-ame he no, yọ ẹsejọhọ o mu ẹme họ eru no evaọ Isukulu Odibọgba Esuo-Ọghẹnẹ. Uwuhrẹ nọ a be kẹe evaọ okenọ ọ be ruẹrẹ oma kpahe je ru ẹme nọ a kẹ riẹ evaọ isukulu odibọgba na u re fi obọ họ kẹe wo ona ewuhrẹ nọ ọ gwọlọ mi “oruiruo ọnọ ọ kare omaovuọ, nọ rẹ yọrọ ẹme uzẹme na ziezi.”—2 Tim. 2:15.
3 Rọ Ẹkwoma Oriruo Ra Wuhrẹ: Jesu o wuhrẹ ilele riẹ ẹkwoma ithubro ivevẹ nọ ọ kẹ rai gbe emamọ oriruo nọ o fihotọ. Ọ ta nọ: “Ohwo kpobi nọ a wuhrẹ ziezi ọ rẹ jọ wọhọ owuhrẹ riẹ.” (Luk 6:40) Aro nọ who re ro kele Jesu ẹkwoma emamọ oriruo nọ who re fihotọ evaọ odibọgba ra u wuzou gaga. Nọ ọmọ-uwuhrẹ ra ọ be ruẹ oriruo nọ who bi fihotọ kẹe evaọ odibọgba na, o ti vuhumu inọ ẹjiroro izihebro nọ a re ru họ re a to ebe-iwuhrẹ Ebaibol họ.
4 Ru ei vẹ kẹ ọmọ-uwuhrẹ na inọ okenọ ma tẹ be to obe-uwuhrẹ Ebaibol họ kugbe ohwo, o nwane gwọlọ re ma dhesẹ epanọ uwuhrẹ na o te jọ kpobi hi. Evaọ ẹsibuobu, o rẹ mai woma re ma rehọ edhe-ẹme ọvo hayo ivẹ nọ ma re se no obe jọ nọ a re wuhrẹ ze ro dhesẹ epanọ ma te hai ru uwuhrẹ na. A rẹ sae ruẹ iroro-ejẹ epanọ a re ro ru onana evaọ ẹwẹ-obe avọ 4 ọrọ Odibọgba Uvie Mai nana gbe ẹwẹ-obe avọ 6 Odibọgba Uvie Mai ọrọ January 2002.
5 Nọ u te fo, zizie ọmọ-uwuhrẹ na re o lele owhẹ hayo owhowho-uvie ọfa nọ o wo ona ziezi kpohọ ebe-iwuhrẹ Ebaibol. Ọ sai wobọ ẹkwoma edhe-ẹme hayo ikere jọ nọ ọ rẹ kpahe fihọ. Fikiere, ẹkwoma ẹro nọ o re muhọ otọ, ọmọ-uwuhrẹ na o ti wuhrẹ eware buobu kpahe epanọ o re ro ru ebe-iwuhrẹ nọ e rẹ nyaharo. (Itẹ 27:17; 2 Tim. 2:2) Hai jiri ei, jẹ ta epanọ ọ sai ro wo ẹnyaharo kẹe.
6 Ewuhrẹ nọ a re wuhrẹ iwhowho-uvie ekpokpọ re a jọ enọ i re wuhrẹ amọfa Ẹme Ọghẹnẹ ziezi, o te ruẹrẹ ai họ kpahe kẹ “iruo iwoma” erọ ẹtohọ gbe eru ebe-iwuhrẹ Ebaibol. (2 Tim. 3:17) O rẹ ginẹ kẹ evevọwẹ gaga re a ruiruo kugbe ai evaọ ẹwhaharo uzizie na: “Whai e nọ uruame u re kpe a nyaze obonẹ re wha mi ame uzuazọ na.”—Evia. 22:17.