Kọ Whọ be Rehọ Ibroshọ Gwọlọ na ro Muọ Ebe-Uwuhrẹ Họ?
1 Kọ whọ riẹ nnọ otẹrọnọ whọ be rehọ obe ukoko na jọ nọ a fodẹ rọ t’ẹme Ebaibol kugbe ohwo nọ o wo isiuru kẹse kẹse, makọ etoke ẹmeọta na ọ kpẹre, yọ who bi ru obe-uwuhrẹ Ebaibol? Ẹhẹ, ere o rrọ o tẹ make rọnọ unuẹthẹ hayo evaọ ifonu a jọ ru uwuhrẹ na. Kọ eme whọ gbẹ daoma gaga evaọ etoke May gbe June re who mu uwuhrẹ utioye họ evaọ ibroshọ Gwọlọ na ha?
2 Ruẹrẹ Oma Kpahe kẹ Obokparọ: Okenọ who te bi fi ibroshọ Gwọlọ na họ ada, wo oware nọ whọ gwọlọ t’ẹme kpahe na fihọ iroro vevẹ. Who te bi ru ozihebro, roro kpahe ẹme nọ wha ta evaọ iweze ọsosuọ na. Nọ omobọ ra nnọ: ‘Edhe-ẹme vẹ evaọ ibroshọ na mẹ rẹ t’ẹme no ze rọ bọ fihọ ẹme ọyena re u su kpohọ uwuhrẹ Ebaibol?’ Whọ tẹ rrọ usiuwoma ota n’uwou ruọ uwou, roro izoẹme nọ i re si ọmọ ikpe ikpegbọ urru, ọkpako, ọzae, hayo aye. Kiẹ izoẹme ibroshọ na riwi, re whọ salọ uzoẹme jọ nọ u re siuru. Nọ whọ tẹ jiroro edhere ẹmeọta jọ no, wuhrẹ iẹe unuẹse buobu. Onana yọ usiavẹ obokparọ jọ.
3 Uko-obeva ọ Odibọgba Uvie Mai ọrọ January 2002 o kẹ “Iroro-Ejẹ Epanọ A re ro Fi Ibroshọ Gwọlọ na họ Ada” nọ i bu te eree. Ẹkpẹti na “Edhere ọ Emuhọ Ovavo” o dhesẹ oghẹrẹ nọ a rẹ rehọ ibroshọ na ro muọ iwuhrẹ họ. Whọ sai nwene iroro-ejẹ ọsosuọ na fihọ edhere otiọna:
◼ “Kọ whọ riẹ nnọ evaọ umutho iminiti jọ ọvo, whọ sai duku uyo kẹ onọ Ebaibol jọ nọ u w’uzou? Wọhọ oriruo, fikieme egagọ nọ i se oma rai Ileleikristi i je bu te enẹ? Kọ who roro kpahe oyena no ẹdẹjọ?” Ohwo na ọ tẹ kpahe ẹme no, rovie kpohọ uwuhrẹ avọ 13 re whọ ta kpahe idhe-ẹme ivẹ ọsosuọ na. Oke o tẹ riẹ, se jẹ t’ẹme kpahe ikereakere ọvo hayo ivẹ jọ. Who ve se onọ urere evaọ obehru ẹwẹ-obe na, whọ vẹ ta nnọ: “Abọ nọ o kiọkọ evaọ uwuhrẹ na o fielo họ eware isoi nọ a re ro vuhu egagọ uzẹme. O te were omẹ re me zihe ze re ma ta kpahe enana.”
4 Whọ d’Obọ Ji Hi: Rehọ uvẹ kpobi nọ u rovie ro ru odhesẹvia obe-uwuhrẹ Ebaibol evaọ ibroshọ Gwọlọ na. Yare oghale Jihova. (Mat. 21:22) Ẹkwoma omodawọ ra nọ whọ rẹ ruabọhọ, whọ sai wo oghọghọ orọ obufihọ kẹ ohwo jọ re ọ j’owọ lele emamọ usi na!